Ribilisan 22
22
1Insal kidika yaklau was maisihni dis as nikingkana dai, sangka atnin wasni.#Ez 47:1,12; Zac 14:8. Lāih sihm batal kapat dai, dawak Papang dawak Sīp tronni kidika kaupak kalahwa dai. 2Tawan nuhni kidika tani nuhni yakat dawak was nakas bupak, sangka atnin panani#Gn 2:9. kidika barakwadai, kidika laih waiku bitik yakat minik laihwi, yuldarangkat, kurih as pasyakat wat 12 minik laihwi; dawak panani basni balna kidika laih nisan balna yakat yamni diyamna atnin dini. 3Kidika yakat laih uman la tuhna dini as bik dis karang.#Gn 3:17. Papang dawak Sīp tronni kidika laih tawan nuhni kidika yakat sakkarang, dawak dini yamyang balna kidika laih ayangni tanit nuhni yayamna karang. 4Biri biri muhnina tatalna karang,#Sal 17:15; Mt 5:8; 1 Jn 3:2. dawak ayangni kidika laih muhnina yakat duduwa karang. 5Kidika yakat laih pukta dis karang, dawak kidika yakat yalalahwarang muihni balna kidika laih awas dawak ma yaringni kidika dukih diawas karang, kat Papang Dawan witing awasni kidika diawarang bahang,#Is 60:19; Rib 21:23. dawak witingna laih ban kaput atnin king kakana karang.#Dn 7:18.
Jisas Krais watwi kainin kidikalaih ulis ki
6Insal kidika yaklau aput yayulna dai: “Adika yulni balna laih rahmki dawak bik yamni talna ki. Dawan, witing Papang kidika yaklau prapit balna yakat diyulwa kidika, witing innisal kidika sihwakat kaina sirihni palni di kalahwarang kidika witing dini yamyang balna yakat niningnakana atnin yulni.”
7“¡Sirihni aiwayang! ¡Alasna isninglak karang ki angdika muihni adika wauhnitaya akat prapit yulni ulna kidika dakawarang kat!”
8Yang, Jan, adika dini balna talnayang dawak bik dakanayang. Dawak talnayang dawak dakanayang usnit kat, insal di nikingkana kidika kalnisar yakat limbabahnayang dai, ayangni tanit nuhni yamna atnik yulni. 9Kaunah witing yaklau aput yayulna: “Kidika yamwinih, bahang yang laih Papang dini yamyang yang, man dawak wanaihma prapit balna dawak adika wauhnitaya akat ais ulna yakat dakakawa balna kapat. Papang yakat ayangni tanit nuhni yamtah.”
10Aput bik yayulna dai: “Adika wauhnitaya akat prapit yulni ulna kidika malwi duwinih, kat kidika kaput kalahnin mani kidika laih uman kaiwi uliswi. 11Dutni kidika datangkat tanit yakat dutni yamwi kiwang, dawak maisihni muihni kidika bik maisihni lani yakat kiwang; kaunah yamni muihni kidika laih di yamni kidika yamwang, dawak holi kidika laih tanit yakat holi kalwi kiwang.”#Dn 12:10.
12“Agha, sirihni aiwayang, dawak warkmana minit kidika duaitayang di balna amput yamnamana kat kaput.#Jr 17:10. 13Yang kuduh alfa dawak omega,#Rib 1:8. tatuna dawak witni kidika.”#Is 41:4; 44:6; 48:12; Rib 1:17; 2:8.
14Alasna isningnalak karang angdika muihni balna praknina susuhwa kidika sangka atnin panani#Gn 2:9; 3:22. kidika duna atnin dawak tawan nuhni dūrni balna munah kana atninna. 15Kaunah dudutni balna kidika laih ahni yakat wawatna karang, spirit dutni lan kakalwa balna kidika, la munah kalduduwas kidika, muih iyang balna, dawan dauh balna yakat ayangni tanit nuhni yayamwa kidika dawak alas yulnin yakat dalani tatalwa dawak lan kakalwa balna kidika bik.
16“Yang, Jisas, inkisal kidika sihnayang adika dini balna bitik suts balna yakat diyulna atnin. Yang kuduh sulatik alahwanayang kidika Devid sulani kaupak.#Is 11:1,10. Yang kuduh mapiris yalani yaringni kidika.”
17Spirit Holi kidika dawak Sīp maridni yal kidika kauna aput yuyulwi: “¡Aiwah!” Dawak dakawarang muihni kidika, aput yulwang: “¡Aiwah!” Dawak angdika muihni was dikih kalwarang kidika, kaiwi sangka atnin wasni kidika diwang di as bik minitlauwas.#Is 55:1; Jn 4:10,14; 7:37.
18Angdika muihni balna adika wauhnitaya akat prapit yulni ulna kidika dakakawarang balna bitik kidika, adika dini baisa kau diyultayang: Angdika muihni adika dini balna akat di as minitlakwarang kat, Papang yaklau witing yakat wah kidika minitlakwi kalana karang adika wauhnitaya ulna balna kaput. 19Dawak angdika muihni adika wauhnitaya akat prapit yulni balna ulna kidika kaupak di as yakwarang kat, Papang yaklau dakyakna karang ki sangka atnin panani yakat dawak tawan nuhni holi yakat bik witing dini balna duwa kidika adika wauhnitaya akat ulna kaput.#Dt 4:2; 12:32.
20Adika dini yulwi yakwa muihni yaklau aput yulwi: “¡Agha, sirihni aiwayang!”
Kaput karang. ¡Dawan Jisas, aiwah!
21Dawan Jisas witing minikun talnin lani duwa kidika manna bitik mamatna yakat lakwang.
Currently Selected:
Ribilisan 22: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
