Ribilisan 21
21
Kisang wisam dawak sau wisam
1Usnit kat kisang wisam as dawak sau bik wisam#Is 65:17; 66:22; 2 Pi 3:13. as talnayang dai; kat kisang tatuna kidika dawak sau tatuna kidika bik dis dadana dai, dawak kuma kidika bik. 2Tawan nuhni holi,#Is 52:1. Jerusalén wisam kidika talnayang dai, kisang#Gal 4:26; Rib 3:12. kaupak kaiwi bukna dai, Papang muhni kaupak. Sihm marid yal as prakni kawi yamni kalyamna kapat sakdai.#Is 61:10; Rib 19:7-8. 3Dawak kisang kaupak yulni parasni as aput yulwadai: “Waralaih Papang kidika muih balna pasyakat yalahwi. Witingna karak yalahna karang, dawak witingna laih witing tawanni balna karang,#Lv 26:11,12; Ez 37:27. dawak Papang laih witingna karak karang Papangnina kapat. 4Witingna miniknawas kidika bitik uswi buhna karang, dawak daunin,#Is 25:8; Rib 7:17. kaidinin, dawak dalani bik dis karang;#Is 35:10; 65:19. kat muhnilau kau di balna duwadai kidika dis dana bahang.”
5Trun yakat yalahna sakdai kidika yaklau aput yulna dai: “Yang lawik di balna bitik kidika wisam manah yamtayang.” Dawak aput bik yulna dai: “Ultah, kat adika yulni balna laih rahmki dawak yamni kulna atnin bik barangni ki.”
6Usnit kat aput yayulna dai: “Uman yamna ki. Yang kuduh alfa dawak omega, tatuna dawak witni. Angdika muihni was dikih kalwakat yang lawik sangka atnin wasnituna kaupak kalating dina karang, di as bik minitlauwas.#Is 55:1; Jn 4:10,14; 7:37. 7Angdika muihni minit bayakwarang kidika adika dini balna bitik dipahni kapat duna karang; dawak yang laih witing Papangni awaki dawak witing laih yang walakibis karang.#2 Sam 7:14; Sal 89:26-27. 8Kaunah bapuh muihni balna, kulwas, dutni yamyang, muih iyang, la munah kalduduwas, spirit dutni kalpakyang, dawan dauh balna yakat ayangnina tanit nuhni yayamwa, dawak alas yulyang balna bitik kidika niningnakauh laih, witingna laih sulhpa lakunni daihni yakat uina karang, kidika laih watbu daunin kidika.”#Mt 25:41; Rib 2:11; 20:14.
Jerusalén wisam kidika
9Insal balna tiaskaubu dawak sutak tiaskaubu#Rib 16:1. witni wahni balna tiaskaubu babung duduwadai kidika kaupak as kaina dai, dawak aput yayulna dai: “Aiwah, marid yal kidika namangkaki ki, Sīp yalni kidika.” 10Dawak sahmuhni amana kapat kau Spirit yaklau nikingkana kidika, insal kidika yaklau asang nuhni maluihni as kau yaduwi kiuna dai, dawak Jerusalén tawanni nuhni,#Ez 40:2. kisang Papang muhni kau kaupak kaiwi bukwa kidika nikingkana dai. 11Tawan nuhni kidika laih Papang yaringni kidika kaupak yaringni duwadai; yaringni kidika laih sihm kipala minit nuhni, kipala bulni, dawak yaringni batal kapat dai. 12Tawan nuhni kidika yaihnit yakat daklana nuhni dawak bik maluihni dai, kidika laih dūr 12 duwadai, dawak dūr balna bitik yakat insal as as duduwadai; dūr balna kidika yakat israel sulani balna 12 ayangnina kidika ulna dai. 13Ma kilwa, tingpal, wadah dawak ma kāwa niningkauh kidika dūr bās, bās duduwadai.#Ez 48:30-35. 14Tawan nuhni daklana kidika sau dinitkau rahni balna ukna kidika laih rahni as kidika kipala 12 duwadai, kidika yakat Sīp aposnitel balna#Ef 2:20. ayangnina kidika ulna duwadai.
15Insal as yang karak yulbauwa dai kidika laih gol panan as duwadai tawan nuhni kidika, dūr balna dawak daklana kidika bik kulwi talna atnin.#Ez 40:3. 16Tawan nuhni kidika laih rabutni dai; naini niningkauh kidika laih pirihta ampus kat sihm kaput dai. Insal kidika laih panani kidika kau tawan nuhni kidika kulwi talna dai: bitik kat kilometros 2,200#21.16 Kilometros 2,200: Y.y. estadio 12. duwadai; naini, maluihni dawak pirihta niningkauh kidika bik sihm kapapat duduwa dai. 17Usnit kat daklana kidika kulwi talna dai: metro 65 duwadai, insal laih sau muihni kulwi talwa kaput kulwi talna yakat.
18Daklana kidika laih kipala bulni karak yamna dai, dawak tawan nuhni kidika laih gol witing manah karak yamna dai, sihm batal buhna kapat. 19Daklana sau dinitkau rahni balna ana kidika laih kipala minit nunuhni satni balna bitik kau yamni yamna dai: tatuna kidika laih kipala bulni karak; usnit kidika laih, kipala sangni minit nuhni karak; bās kidika laih, kipala bulni yaringni karak; arungka kidika laih, sangni dibasta kapat karak; 20singka kidika laih, kipala pauni dahlwa rarauni kidika kapat karak; tiaskauas kidika laih, kipala pauni karak; tiaskaubu kidika laih, kipala lalahni sang kapat karak; tiaskaubās kidika laih, kipala sangni dibasta kapat karak; tiaskauarungka kidika laih, kipala lalahni karak; salap kidika laih, kipala dibasta sangni pihit kapat karak; 11 kidika laih, kipala pauni sa kapat karak; dawak 12 kidika laih, kipala paisa kapat karak. 21Dūr balna 12 kidika laih kipala yaringni minit nunuhni#Is 54:11-12. kidika karak yamna dai; dūr as kidika laih kipala yaringni minit nuhni kidika as karak yamna dai. Dawak tawan nuhni tani nunuhni balna kidika laih gol witing manah karak yamna dai, sihm batal pihni lāih kapat.
22Tawan nuhni yakat holi pāni as bik talasyang dai, kat Dawan, Papang parasni bitik duwa kidika, witing dawak Sīp kidika karak panina holi bahang. 23Tawan nuhni kidika laih ma dawak waiku bik yaringni kalanin dukih kalawaski, kat Papang#Is 60:19-20. yaringni kidika kaupak kalawa kidika yulni, dawak witing awasni kidika laih sīp kidika ki.#Jn 8:12. 24Nisan balna kidika laih tawan nuhni yaringni#Is 60:3. kidika yakat lapapakna karang, dawak sau kingni balna kidika laih witingna ritsnina kidika kalalana karang. 25Dūrni balna kidika laih madah putwas karangki, dawak kidika yakat laih pukta kidika diskarang ki.#Is 60:11. 26Nisan balna ritsnina dawak yaringni kidika bik kalalana karang; 27kaunah di maisihni dini#Is 52:1; Ez 44:9. as bik kawas karang, dawak muih di dutni yamyang kidik awaskat alas yulyang bik kawas karang. Sīp wauhnitaya sangka atnin wauhnitaya yakat ayangnina ulna kidika manah kakana karang.
Currently Selected:
Ribilisan 21: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
