Ribilisan 18
18
Babilon bukna kidika
1Adika usnit kat, insal ūk kisang kaupak yaklakwi kaiwakat talnayang dai; kidika laih la parasni duwadai, dawak witing yaringni kidika karak sau kidika laih yaringni duna dai. 2Parasni aput yulwadai:
“¡Babilon nuhni kidika laihuman bukna, uman bukna!#Is 21:9; Jr 51:8; Rib 14:8.
¡Walasa balna ūnina kalna,
spirit maisihni balna satni bitikpanina sulihni kalna,
di lawani balna satni bitik ūninaduduna
dawak di anyang maisihni dawakdudutni balna bik!#Is 13:21; Jr 50:39.
3Bahang nisan balna bitik laihwasak dadauna dai
la munah kalduwas wainni kidika karak;#Is 23:17; Jr 51:7.
sau kingni balna kidika laih
witing karak la munah kalduduwas dai,
dawak sau akat di bakanyang muihnibalna kidika laih
di duyang kakalna minitbayakwi dauhdisna balna kidika karak.”
4Kisang kaupak yulni ūk aputyulwakat dakanayang dai:
“Kidika tawanni nuhni kaupak alahwanauh,
manna yang tawanki mana kidika,#Is 48:20; Jr 50:8; 51:6,45.
witingna dutni yayamwa kidika yamtasatnamna yulni
wahni balna kidika bik manalaihwasatnin yulni;
5bahang dutni balna kidika laih
mahni kalwi kisang kat kilwi kana ki,#Gn 18:20-21; Jr 51:9.
dawak witing dutni balna kidika laihPapang bitik amanglana.
6Yal kidika yaklau muih ūk balnayakat diana kaput diatanauh;#Sal 28:4; 137:8; Jr 50:29.
yamna kidika kaput baisa minityakatwatbu lauta kalatanauh;
dinin dini as baisa minityakatparasni watbu bahata kalatanauh
witing muih ūk balna dinina bahanakidika karak dawakat;
7dalani dawak wauhnin bik kalatanauh
ampus witing manah kapat kaldakana
dawak bik ampus dauh manah disna kat kaput.
Bahang isning yakat aput yulwi:
‘Akat yalahna sakyang sihm king yal kapat.
Yang laih tingmak awas yang,
dawak bik dalani wauhtas awaki ki.’
8Kaput bahang, wahni balna kidika
ma aslah yakat kaiwarang ki:#Is 47:7-9.
daunin, kulwi kalbaunin dawak yuh,
dawak kuhpau yakat busna karang;
kat Papang Dawan laih parasni bitik duwi,
witing yaklau pāt yakat sihna āna kidika.”
9Sau kingni balna witing karak la munah kalduwas atnin lani yayamna kidika dawak bik dauh manah didisna kidika, witing yulni kakaidana karang buswa wayauni kidika tatalwarang mani kat. 10Witingna wahnina kidika yakat yamaduwi naikau watwi aput yuyulna karang:
“¡Alakaih, alakaih man laih,
tawan nuhni palni,
Babilon, tawan nuhni parasniman kidika!
Kat wahma kidika sirihni palnikaiwi kana.”#Ez 26:16-17.
11Sau akat di bakanyang muihni balna kidika bik kakaidana karang kidika tawanni nuhni kidika yulni, kat witingna dinina bakannin muihni kidika laih diskarang ki:#Ez 27:31,36. 12gol, lalah, kipala minit nunuhni, linin asnina yayamni balna bik, paisa dawak pauni kauna; pan satni walalapni balna kidika bik; marfil, pan minit nunuhni, bras, ayan dawak marmol kau di yamna balna bik; 13canela kau di yamna balna dawak di walalapni balna; walapni yamni busnin dini, kahnin dini walalapni dawak pan yani balna kauna; wain, disala, plawar yamni dawak plawar minik kauna; di truknin dini wail balna, sīp, aras, kar dawak warau balna kat bik, muih sangninaka duduwa balna kidika.#Ez 27:12-13,22. 14Dawak tawan nuhni yakat aput yuyulna karang:
“¡Pan minik ahauhni balna kidikalaih uman disman
dukih palni mawadai kidika;
ban kaput atnin disnaman
di yayamni yaksisihni dawak ritsmabalna dai kidika bitik!”
15Angdika muihni balna kidika dini karak lalah warkni yamwi di duyang kakalna kidika tawan nuhni kidika tunan minit munah, witingna wahnina yakat yamaniduwi naikau wawatna karang dutni dakawi kaidīnah,#Ez 27:31,36. 16dawak aput yuyulna karang:
“¡Alakaih, alakaih tawan nuhni kidika!
Linin asnina yamni kana kidika,
asna paisa dawak pauni karak,
gol, kipala yaringni minit nunuhni
dawak kipala minit nunuhni balna kauna.
17¡Dawak sirihni palni rits balnamahni didisna!”
Kuma kuring nunuhni wauhyang balna dawak kuma yakat awawaihwa balna kidika, kuma kuring yakat tunan kayang balna dawak kuma yakat wark kalahwi sangka balna kidika bitik, naikau wawatna dai#Is 23:14; Ez 27:26-30. 18dawak, tawan nuhni buswa wayauni kidika tatalna mani kat, aput yulwi sararahna: “¿Angdika tawanni nuhni ūk kidika sipyah adika tawanni nuhni adika karak libitna atnin?”#Ez 27:32. 19Dawak tunanina yakat sau yahamni kidika uhuhna dai, dutni dakawi kaidīnah, dawak aput yulwi sararahna dai:
“¡Alakaih, alakaih tawan nuhni kidika!
Ritsnina balna karak di duyangkakalna dai
kuma yakat kuma kuring duduwa daikidika balna bitik.
¡Dawak sirihni palni bitik daukalna!”#Ez 27:30-34.
20Kisang, man alasna alahwah
kidika tawanni nuhni yulni;#Dt 32:43; Jr 51:48.
dawak manna alasna alahwanauh,
Papang tawanni muihni balna,
dawak apostel dawak prapit balna bik,
kat Papang yaklau pāt yakat ānamani kat,
manna yakat la kat kidika manayamna.
21Bahang insal parasni as kipala as dulauna dai, di tiknin kinipala kapat dai, dawak kuma yakat ruhm āwi aput yulna dai:
“Man laih kaput sau yakat maruhmwiāna karang,
Babilon, tawan nuhni palni,#Jr 51:63-64.
dawak wat bik matatalwas karang.#Ez 26:21.
22Tama nunuhni balna yakat wat bikdakakawas karang
paswi yakisdinin dini balna dawaktrumpit balna bik,#Is 24:8; Ez 26:13.
dawak man pasmang yakat
wark sat kalahyang muihni balna bikdis karang,
dawak man pasmang yakat
di tiknin kinipala parasni yulwakidika bik dis karang.
23Man pasmang yakat wat bik awas
yaringni kidika dahlwas karang,
dawak marid kasnin alasnina yakat
muih balna parasni yuyulwa kidika bikdis karang,#Jr 7:34; 25:10.
man tawanma yakat
di bakanyang muihni balna kidika
sau akat pararasni dai karang bik
dawak nisan balna bitik yakat
alas diyulnaman di talaman balnakidika karak.”
24Bahang kidika tawanni nuhni yakat prapit balna dawak Papang tawanni muihni balna ānina bik utuhna, dawak sau akat ihina muihni balna kidika ānina bik.#Jr 51:49.
Currently Selected:
Ribilisan 18: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
