Ribilisan 17
17
La munah kalduwas atnin lani nuhnipalni pāt yakat bukna kidika
1Insal balna tiaskaubu sutak tiaskaubu duduwa kidika kaupak as, kaiwi aput yayulna dai: “Aiwah, la munah kalduwas atnin lani nuhni was minityakat yalahna sakkidika wahni kidika namangkaki ki.#Jr 51:13. 2Sau kingni balna kidika laih kidika la munah kalduwas atnin lani kidika pasyakat kakana, dawak sau muihni balna kidika laih kidika la munah kalduwas atnin lani kidika wainni kau wasak dadauna.”#Is 23:17; Jr 51:7.
3Usnit kat, Spirit yaklau sahmuhni amana kapat kau nikingkana kidika yakat, insal kidika yaklau kauhmak wanilang yakat yaduwi kiuna dai. Kidika yakat talnayang dai muih yal as di dutni wayakani pauni as kau kilna sakkat, kidika dini dutni wayakani laih Papang niningkauh yul dudutni balna mahni ulna duwadai muihni yakat dawak tunani tiaskaubu dawak tamni balna salap duwadai.#Rib 13:1. 4Kidika yalni laih asna paisa dawak pauni kat kana kiwalikdai, dawak gol#Jr 51:7. dawi kipala minit nunuhni karak bik yamni kalyamna sakdai. Tingni yakat gol sūnitak as duwasakdai kidika pasyakat di dudutni mahni dawak la munah kalduwas lani maisihni kidika bik bung dai; 5dawak muhnityakat muih ayang amangladas as ulna duwadai: “Babilon nuhni, la munah kalduduwas balna dawak sau akat di dudutni balna bang kidika bitik nanangnina.” 6Usnit kat amanglanayang dai muih yal kidika laih wasak dauna sakdai Papang tawanni muihni balna ānina karak dawak Jisas witninis balna dadauna dai kidika ānina karak bik.
Kidika talnayang mani kat, amanglatas danayang dai. 7Bahang insal kidika yaklau aput yayulna dai: “¿Ais yulni amanglatasmahn? Kidika yalni dawak di dutni wayakani kidika tannika bik mayulki ki, tunani tiaskaubu dawak tamni balna salap duwa kidika. 8Di dutni wayakani talnaman kidika laih kidika laih muhnilau kau likdai, kaunah waralaih uman diski; kaput bik, witing baisa barang dauwas tanitkauh puksani tuhni#Dn 7:7; Rib 11:7. kidika kaupak kilwarang ki. Sau muihni balna ayangnina kidika laih sangka#Sal 69:28; Rib 3:5; 13:8. atnin wauhnitaya yakat baisa ulwas ki sau yamna mani kaupak, kidika di dutni wayakani muhnilau kau likdai kidika tatalwarang mani kat amanglalawas karang ki dawak kidika laih uman diski, kaunah kidika laih watwi kaiwarang ki.
9“Akat talwarang ki wais kidika sins duwa pa dawak amanglawa pa: Tunani balna tiaskaubu kidika laih asang balna tiaskaubu ki kidika balna minityakat muih yal yalahna sakkidika; kidika tunani balna bik king balna tiaskaubu kidika tanka. 10Adika kingni balna singka kidika laih uman bubukna, kidika balna kaupak as kidika laih waradika king kawi, dawak ūk kidika laih baisa kaiwas ki. Kaunah kaiwarang mani kat, ma mahni sak awas karang ki. 11Di dutni wayakani muhnilau kau sangka dai kidika dawak uman dis kidika, kidika laih king tiaskaubās kidika ki; kidika bik tiaskaubu balna kidika kaupak as ki, dawak kidika bik barang daunin yakat kiwi.
12“Tamni balna salap talnaman kidika laih king balna salap#Dn 7:24. baisa king kakawas kidika ki; kaunah lanina parasni kidika awar as manah duduna karang, di dutni wayakani kidika karak kalpakwi. 13Adika kingni balna salap kidika laih kulninna aslah duwi, di dutni wayakani yakat parasnina dawak lanina parasni bik kalalana karang. 14Sīp kidika niningyakat kalbabauna karang; kaunah sīp kidika yaklau minitna bayakna karang, Papang yaklau diyulwakat uina balna kidika, walwi yakna balna kidika dawak bararangni balna kidika bik duwi, kat sīp kidika laih dawan balna Daninawan dawak king balna Kingnina bahang.”#Dt 10:17; Rib 19:16.
15Innisal kidika yaklau aput bik yayulna dai: “Was balna talnaman kidika laih, kidika balna minityakat la munah kalduwas muihni yalahna sakkidika laih, tawan, muih, tuni sat sat yulyang dawak nisan balna. 16Dawak tamni balna salap talnaman kidika laih dawak di dutni wayakani kidika laih la munah kalduwas muihni yakat dutni kalyayamna karang, dawak dawak wahdis ruhmwi dadana karang; witing muihni kidika kakasna karang, dawak kuhkau bik bubusna karang. 17Papang yaklau isningna yakat āna witing amput yamninna dukih kalawa kaput: yulbauwi kulninna aslah duduna karang witingna king parasni duduwa kidika di dutni wayakani yakat kalana atninna, Papang yaklau yulna kidika kalahwarang mani kat. 18Yal talnaman kidika laih kidika tawanni nuhni sau kingni balna yakat ditaihwi duwa kidika ki.”
Currently Selected:
Ribilisan 17: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
