Salmos 92
92
Ayangni nuhni yamnin unbauna as
Satadi salnimo dawak unbaunin kidika bik.
1Dawan makau sakman kidika,
¡ais yamni asyah man yakat tingkih matnin kidika
dawak unbauna unbaunin kidika man rismapik yakat!
2Mapiris dawak pukta balna yakat yulna atnin
dalani lani nuhni dutaman kidika dawak barangniman kidika bik,
3paswi yakisdinin dini kau,
dawak tiun yudutni balna kau bik.
4Dawan,
¡man yamnaman balna kidika kau isinglak kidika yamnaman!
¡Man warkma balna kidika alasna manah yabangwi!
5Dawan,
¡warkma balna kidika ampus nunuhniyah!,
¡dawak yul kultaman kidika bik ampus tuhniyah!
6¡Tapdadas balna manah laih sip amanglalawas ki!
7Dawak muih dudutni balna kaput bik dutni yamyang balna kidika laih
dibasta kapat bararakwi dawak bik di manas duduwi,
dawak kidika balna laih dismuknin manah yulni kaput kalawi,
dismukwarang kidika laih ban kaput karangki.
8Kaunah man laih Dawan, ma yakat sakman ban kaput atnin.
9Di as kidika laih rahmki Papang:
man waihmala balna kidika laih dismukna karangki;
dawak muih dudutni balna kidika bitik laih rumhna karang.
10Man lawa baisa paraski yataman
sihm turuh almuk parasni kapat,
dawak tunaki yakat di walapni utuhtaman.
11Talnikki, amput waihkila balna bubukwa kidika;
¡dawak muih dudutni balna kakaida kidika bik talnik ki!
12Muih yayamni balna kidika laih pan kuku satni balna pululuwa kapat pululuwi
dawak bik Líbano suhunni kapat bik bararakwi.
13Kidika laih Dawan ūni yakat dahna ki;
mayang Mapapangki ūni watak yakat pululuwi.
14Muih barak kakalna bik minik yayakwi;
dawak kidika balna laih ban pararasni karang dawak bik sangni yamni karang,
15dawak bik yuyulna karang, yang Dakiwan nakitdakyang kidika laih barangni ki,
bahang witing niningyakat la kat-awas kidika diski.
Currently Selected:
Salmos 92: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
