Salmos 89
89
Papang pranimis Devid karak
Ezrahíta muihni Etán sumalwa kidika.
1Dawan, yang unbautayang yakat yultayang kidika ban karang
man laih minikun talnin lani kidika dutaman;
minit bayakwa balna kidika bitik yakat
dawak man laih barangniman.
2Yang yulna awaki man dalani lani dutaman kidika laih ban kaput ki bayakkiwas;
man minikun talnin lani dutaman kidika sip satuk kalwas ki,
sip satuk kalwas ki sihm makau kisang kapat.
3Devid karak pramis as yamnaman;
man dima yamyang yakat pramis yamnamandai:
4“Yamtingkat sulama balna kidika
man pāma yakat king kakawa karang ban kaput atnin.”#2 Sam 7:12-16; 1 Cr 17:11-14; Sal 132:11; Ap.w 2:30.
5Dawan,
makau kisang muihni balna bitik ayangma nuhni yayamwi barangniman kidika
dawak di taldas yamtaman balna kidika.
6¡Dawan as bik, makau kisang yakat bik diski
man karak malibitna atnin, Papang!
7Papang nuhni yamadangniman dawak,
¡makau kisang muihni balna manah ma-awaihdak duduwi!
8Dawan, Papang parasma bitik dutaman kidika,
parasni kidika bitik laih man dīma,
dawak di rahm kidika ma-awaihdakki;
¡as bik diski man kapat!
9Kuma anwa kidika man taihlakta dutaman
dawak nunuhni lalamwa balna kidika kalatang kus dawi;
10kuma paskau di anyang dutni kidika bik taihta labannaman,
sihm muih dauna as kapat;#Sal 74:13.
waihmala balna kidika kalatang uhna,
man tingma parasni kidika kau.
11Makau kisang dawak sau kidika man dima,
sau kidika man yamnaman, dawak paskau di balna bangkidika bitik.#Sal 24:1-2; 95:4-5; 1 Kor 10:26.
12Man lawa yamnaman, wadah niningkauh dawak tingpal niningkauh kidika bik;
Tabor asangni dawak Hermón asangni kidika bik,
alasna unbabauwi man ayangma kau.
13Man tingma kidika laih parasni nuhni duwi;
tingma palni kidika laih parasni ki dawak bik minit bayakyang ki.
14Man yalahdaman pāni kidika laih lā kat dawak rahmni kidikaminit yakat sakki;
dawak dalani lani di rahm kidika karak namang yakat kalahwi uiwi makalpapakwi.
15Dawan,
angdika tawanni man yakat alasna ayangma nuhni yamwi lan kidika laih alasna ki
dawak man awasma kidika kau yaringni duwi lapakwi,
16dawak man ayangma kau alasna duwi ma bitik yakat
dawak kulninna yaklauwi man barangniman kidika yulni.
17Rahm kidika laih, man kidika kuduh witing parasniman dawaknuhni yamni kidika bik;
yangna paraskina kidika baisa nuhni kalwi, man kulnam yamni dutaman kidika yulni.
18¡Mayang manakitdakyang kidika laih Dawan!
¡Mayang makingki kidika laih, Israel kaupak holi kidika ki!
19Ma bayakna balna yakat amanakau kapat yulbaunaman,
man dimayamyang barangni balna yakat diyulnaman:
“Yang tawanki paskaupak kulnin parasni duyang as walyaktik dunayang,
mayakat kaldulaunayang dawak ilp kalanayang.
20¡Yang diki yamyang Devid kidika kalpaknayang!#1 Sam 13:14; Ap.w 13:22.
Yang dīaki kidika kau kalutuhtik king ānayang,#1 Sam 16:12.
21dawak yang ilpki kidika dis-awas karang.
Yang paraski kidika parasni kalyamnayang karang,
22dawak waihnila balna kidika yaklauwi witing niningyakat kalbabauwas karang
dawak muih dudutni balna kidika yaklauwi minit bayakwas karang.
23Witing waihnila balna kidika yang lawik taihtik labanki;
¡dawak witing muhni kaupak bik yakmukki!
¡Dawak witing yakat dutni kalkukulwa balna kidika dakmukki!
24Yang dalani lani dutayang dawak barangniyang kidika karak bik kulna karang,
dawak yang munah, witing parasni kidika baisa duna karang.
25Witing parasni kidika kalaki, Mediterráneo kaupak Éufrates kat.#89.25 Mediterráneo kaupak Éufrates kat: barangni yulnin kat kuma yakat bik dawak was murwa balna yakat bik.
26Witing yaklauwi yayulna karang: ‘Man laih yang Papangkiman;
yalaihta yakta dawak bik nakitdaktaman.’
27Dawak yang lawik walanibis tatuna barakni rahmni kidika maki,
sau kingni balna minitna yakat.#Rib 1:5.
28Witing niningyakat dalani talayang kidika laih ban karang,
dawak witing niningyakat prakimis bik ban yakat karang.
29Dawak witing pāni yakat sulani balna kidika king kakawarang
kidika laih ban kaput karang, makau kisang kidika ban karang mani balna yakat.
30“Kaunah yang sumaltayang balna kidika rumhwi dadawarang kat
dawak bik yang laki balna yakat bik yalalahwas karang kat,
31dawak bik lāki yakat-awas karang kat,
dawak laki balna bik dakawi yayamwas karang kat,
32witingna dutni yayamwa kidika yulni wah diaki,
pan kau diwiski;#Dt 8:5; 2 Sam 7:14; Sal 94:12; Pro 3:11-12; Hib 12:5-11.
33kaunah Devid yakat dalani talayang kidika laih datas awaki,
dawak barangniyang kidika witing niningyakat ban karang.
34Yang prakimis kidika bahtas awaki
dawak yang yulki balna yakat bik yamki.
35Wat as yang ayangki holi kidika karak libittik pramis yamnayangdai,
kidika bahang alas kalyultas awaki:
36sulani balna kidika witing pāni yakat king kakawarang,
ma kidika bayakkiwas ban karang mani balna yakat.
37¡Ban pamni sak-atnin, sihm waiku kapat!
¡Ban pamni sak-atnin, makau kisang kidika ban bayakkiwas karang mani balna yakat!”
38Kaput kaunah, dauh kalkulnaman dawak rumhta danaman
king as man yakta dūnamandai kidika;
¡witing karak kulnam daukalnaman!
39Man dimayamyang karak pramis yamnamandai kidika daukalpamnaman;
dawak witing paknin kidika sau yakat rumhtalaknaman.
40Daklana balna bitik yakat kurhta alhnaman, sulihni;
¡dawak witing tawanni nunuhni balna kidika daukalmuknaman!
41Muih bitik kidika yakamunah bayakwi, ais malkih diawa kidika mamalwi;
dawak witing yaihnitkau balna kidika yaklauwi sarahni kalyuyulwi.
42Yamtang kat witing waihnila balna kidika
tingnina alasna dulalauwi minit bayayakna kidika.
43Isninaparah baini kidika bik disyamnaman
dawak kaput bik kalbaunin yakat ilp diatasmandai.
44Witingna yamnidai kidika dakyaknaman
dawak witingna trunnina kidika sau yakat rumhlaknaman;
45dawak witingna sangninaka kurihni balna kidika dakyaknaman
dawak asalni manah dibahngnaman.
46Dawan,
¿mampatkat maldanaman kidika kaupak alahwamayah?
¿Man kulnam daukalna kidika kuhpau kapat ban dalhwarangyah?
47Dawan, ismang-aitah yang sangkika laih parahni ki;
man lawa muih al yamnaman kidika, ma parahni sangka ki.
48¡Muih as bik sip sangka awaski, dauwas ban atnin!
¡Dawak daunin parasni kaupak muih as bik sip yaklawas ki!
49Dawan,
¿man tatunakau dalani talamandai kidika angkat sakyah,
barangniman kidika kau Devid yakat pramis yamnamandai kidika?
50Dawan, ismangkattah, man dima yamyang balna yakat
muih manas yaklauwi uhuswi;
yauhuswa balna yulni kidika yang kulnik yakat duyawayang.
51Dawan,
¡kaput man waihmala balna kidika yanauhuswi!
¡Kaput bik, man walta yaknaman muihni yakat uhuswi!
52Dawan yakat yamni kalyamna karang, dawak kidika laih ban kaput karang.
¡Kaput karang!
Currently Selected:
Salmos 89: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
