Salmos 84
84
Papang ūni yulni dukih kalawa kidika
Coro sumalniyang kaupak, Gat paswi yakisda dinidai kidika karak. Coré walanibis balna kaupak. Salmo.
1¡Pa holi kidika man pama yaksihniki,
Dawan parasma bitik dutaman kidika!
2¡Ais amput yang dukih palni yawih
man ūma watakni yakat āwinik kidika!
¡Yang ising bitik
sangka Papangki yakat unbautayang!
3Rumsik dawak mamah rarah balna
kidika bik ūnina duduwi man kau sakripais buswa pāni yakat
kidika yakat walanibis balna ūnina yamnin sip kidika,
Dawan parasma bitik dutaman kidika
yang kingki, yang Papangki.
4¡Isningnalak ki man ūma yakat yalahwa balna kidika
dawak laihwatwas man ayangma nuhni yayamwi!
5¡Isningnalakki man yakat ilp yayakwa balna kidika
man asangma kat lapakwi uinin kukulwa balna kidika!#84.5 Man asangma kat...balna kidika: barangni yulnin kat kulnin yakat sakkidika lapaknin. Hibru kau laih amangladaski.
6Sau langni makwas kidika munah bayakwarang kat
wastuna yayamwarang,
dawak was lauwa kidika bik blisinmanah bangna karang;
7parasnina kidika baisa nuhni kalna karang
dawak Sayan yakat Papang nuhni kidika tatalna karang.
8Dawan, Papang parasni bitik duwa kidika,
Jacob Papangni,
¡mikityultayang kidika dakah!
9Papang, manakitdakyang,
mamakpa yamni kau maitalah
man lawa king as walyakta ānaman kidika.
10¡Wat as watakma yakat sak atnin kidika kau yamni ki,
ma tausin ahni yakat sak atnin karak dawakat!
Papangki ūni dūrni maintalnik kauh yamni dakayang,
di dutni yayamwa pāni yakat atnin karak dawakat.
11Kat Dawan kidika laih yaringni mayawi dawak manakitdakwa bahang;
Dawan yaklauwi ayangnina nuhni yamwi, dutni as bik yayamwas balna kidika,
dawak di yamni kidika laih diawas awaski.
12Dawan parasma bitik dutaman kidika,
¡man yakat kulninna āwi duduwa balna kidika laih isningnalak ki!
Currently Selected:
Salmos 84: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
