Salmos 83
83
Minit yulwi yulna, Papang kidika di balna yamna atnin
Asaf unbauna dawak salnimo bik.
1Papang ¡ap dawinih!,
¡man kussakti ap dawinih!
2Waihmala balna yakat talah, man yakat dutni makukulwa balna kidika:
man namang yakat yaklalauwi.
3Witingna ais yamnin kidika uman kukulna
man tawanma niningyakat,
¡man lawa nanitnadaktaman muihni balna yakat!
4Witingna aiwi yanadaukalmuknin kukulna
yangna kidika disna atnikna nesān as yangna kidika kaupak,
kaput laih Israel ayangni kidika watwi kulninna-awas.
5Pramis as yayamna man namang yakat,
namangyakat yaklalauna kidika laih muih al aslah kapatki:
6Edom dawak Ismael uni labanni balna kidika,
Agar sulani balna dawak Moab,
7Gebal, Amón dawak Amalec,
filisteos balna, Tiro kau yalalahwa balna kidika,
8dawak Asirio balna bik witingna karak aslah kalpapakna,
kidika laih Lot sulani pararasni balna kidika.
9Madián kau diyamnaman dai kapat diyamtah,#Jue 7:1-23.
Sísara kau kalyamnamandai kapat,
dawak kaput bik Cisón wasni kungkau Jabín kau kalyamnamadai kaput bik diyamtah,#Jue 4:6-22.
10Endor yakat bitik dismuknadai kidika,
¡kidika yakat dība diyamna dai, sau kalna atnin!
11Ahal nunuhni balna dutaman kidika kau diyamtah
Oreb dawak Zeeb balna kau duta yamnamandai kaput;#Jue 7:25.
taninatuna balna bitik kau bik diyamtah
Zeba dawak Zalmuna balna karak diyamnamandai kapat,#Jue 8:12.
12Papang sirhnisirh pāni dunin kukulna balnadai kidika.
13Papangki, yamtangkat dipiramwang,
sihm dibasta kusuni kat wing purwi dukiwa kapat;
14sihm kaput bik pan paskau kuh buswa kapat
dalhwa kidika kau asangpas buswidis yamwa kapat,
15¡sihm kaput diuita yawah
dawak bilninalautah wingma parasni wauhwa kidika kau!
16¡Dawan asalnina yaktah,
man yakat mawalna atnin!
17Witingna asalnina kalahwarang kidika ban kaput karang;
¡asalnina yakwi dadauwang!
18¡Witingna amanglalawang, man manah Dawan man kidika,
man manah mayakat sakman,
sau bitik minit yakat!
Currently Selected:
Salmos 83: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
