Salmos 81
81
Papang kulnin dalani kidika dawak Israel dutni yamwa kidika
Coro sumalniyang kaupak, Gat paswi yakisdadai kidika karak. Asaf kaupak.
1¡Papang yakat alasna unbautanauh, witing kuduh mayang maparaski!
¡Jacob Papangni yakat parasni sarahta ayangni nuhni yamtanauh!
2Kilinghnin dinikau kilingta unbautanauh,
dawak paswi yakisdinin dini balnakau bik.
3Trompit puhtanauh, waiku wisamni yaklawak,
kaput bik sihm yamtanauh waiku diknipih mani yakat bik,
kidika yakat kuduh mayang alasna duda mani kidika.#Nm 10:10.
4Kat kidika laih la as bahang
Jacob Papangni kidika yaklauwi Israel yakat kalana dai bahang;
5dawak kaput bik kidika lani kidik José yakat kalana dai
Papang kidika Egipto niningkauh yaklauna kat.
Dinit yulwak dakanayangdai kaunah kidika dinit laih amanglatasyangdai:
6“Turuknam kidika salahma kaupak laknayang,
wark parasni alahwamandai kaupak ingni mayaknayang.
7Kulnam kaida kidika yayultangkat malaihtik yaknayangdai;
dawak mukuskau alwana yulwa kidika kaupak nangmatlanayangdai;
dawak Meribá wasni yakat traima talnayangdai.#Ex 17:7; Nm 20:13.
8Yadakah yang tawanki, yang ismangpaktayang kidika;
¡Israel, yadakamakat!
9Sau ūk Papangni dauh balna kidika duwinih;
sau uk Papangni dauh balna yakat mamatyulwinih.#Ex 20:2-3; Dt 5:6-7.
10Yang kuduh Dawan man Papangma,
Egipto sauni kaupak mayakna kidika;#Ex 20:2.
tamapas wakahtah, dukihman yakat maki.
11“Kaunah yang tawanki laih yadakakih kalawasdai;
¡Israel yulki dakakawasdai!
12Kidika bahang dating kat witing yamkih yakat yamna,
dawak witingna yalalahwadai amput dukih diawa yakat.
13¡Yang tawanki kidika yul yultayang kidika dakanakatlaih!
¡Israel, yang taki munah kiwitdai,
14makpa sipik sahmuhwa kapat kat
witing waihnila balna kidika sau yakat laktitikdai
dawak niningkauh yaklalauwa balna kidika wah diana atnin!”
15Dawan yakat dutni kaltatalwa muihni balna kidika muihsak dauwi bubukwitdai,#81.15 Muihsak dauwi bubukwitdai: satuk wirlana yakat yulwi: yamni auhni dakakawitdai.
dawak dutni yakat uinin kidika laih barangni yamwi dawitdai.
16Papang yaklauwi witing tawanni yakat dibayahwitdai plawar minik tanit yamni kidika kau,
dawak was dikih diawa kidika asangpas amakni kau diawak didiwitdai.
Currently Selected:
Salmos 81: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
