Salmos 77
77
Papang yamwa balna kidika laihwi tanka walwi talnin
Coro sumalniyang kaupak. Jedutún kaupak. Asaf salnimo.
1Yang dikit parasni yultik Papang yakat kalyultayang
witing yadakanin yulni.
2Kulnik bukna māni kidika yakat Dawan waltayang,
dawak yang tingki dulautayang kidika laih laihwattas ban dulautayang
mikityultik, pukta yakat.
Yang solki kidika walani ānin sip yakwas ki. 3Papang yakat isingkattik aidayang;
yul balna kidika kulting sip kulnik yaklauwas ki.
4Man, Dawan, yadatangkat mikpa sipiktasyang;
¡pini sinski disdana, yulbaunik bik sip-awas ki!
5Yang sara mani balna dawak kurihni balnadai yakat kultayang;
6isingkatwi pukta yakat unbautayangdai kidika.
Yang kulnik pasyakat kultik talayang,
dawak silp kalyultik dakayang:
7¿Dawan, man ban kaput kulnam daukalna sak-awamayah?
¿Watta mikun yatalas awamayah?
8¿Minikun talnin lani dutaman kidika danhkalnakatpah?
¿Man pramamis kidika danhkalnayah, ban kaput atnin?
9¿Papang, witing minikun talnin lani duwadai kidika danhkalnakatpah?
¿Witing uba kulnin daukalnayah,
minikun talnin lani kidika diskalnayah?
10Yang kultingkat uba dalaniyawa kidika laih
makau sakkidika alni dai kidika,
muhnilaudai kapat awaski mayangyakat.
11Di taldas dini balna yamna dai kidika isingkatki,
ma bayakna balnadai yakat Dawan yamna dai kidika;
12di yamna balnadai kidika bitik yakat kulki.
13Papang, man laih holi man yamtaman balna bitik yakat;
¿angdika Papangni, man kapat nuhniyah?
14¡Man kuduh Papangman, di taldas dini yamtaman kidika!
¡Man parasma kidika niningna kanaman nesān balna yakat!
15Man parasma kau tawanma kidika laihta yaknaman,
Jacob dawak José walanibis balna bik.
16Papang,
kuma kidika manyakat matalwi yamaduna,
dawak wasni tuhni balna kidika yukna;#Ex 14:21-22.
17mukus balna kidika wasnina dadawak launa,
dawak makau kisang yakat alwana parasni yulna,
dawak lapwa kidika laih pa bitik yakatdai.
18Wing purwa kidika yakat almawana kidika dakanadai;
sau bitik kidika ahni manah lāih talnadai lapwa kidika yulni
dawak sau kidika bik yuknadai.
19Kuma pasmunah man tama yamnamandai;
dawak was balna manas laih daktalawanamandai,
man kalma ataknaman kidika muih as bik yakwasdai.
20Man tawanma kidika tinglau dakni as kapat duta yawanamandai,#Sal 78:52; Is 63:11-14.
Moisés dawak Aarón tingni munah.
Currently Selected:
Salmos 77: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
