Salmos 69
69
Kulnin kaidak sarahna as
Coro sumalniyang kaupak, sulumtah puluni tiunni kau. Devid kaupak.
1Yalaihta yaktah, yang Papangki,
kat was daunik manahyang bahang;
2wasmak as kat tuhni pasyakat yadukakiwi,
kalki atakwatnik diski.
Was tuhni palni yakat āwik yawanayang
dawak was parasni murwa kidika yāduwi kiwi.#Jon 2:6.
3Dikit bitik disdana sarahnamanah;
dikitsuru dalawi;
¡mikpa balna bik kalsuhna
yang Papangki yakat tāni tahanamanah!
4Mahniki, yangkau dutni yakukulwa kidika pīnikaupak#Sal 35:19; Jn 15:25.
tunaki kau baski balna karak dawakat;
waihkila balna kidika baisa mahni kalahna,
pīni kaupak yadaukalwa balna kidika,
dawak yayuyulwi dīana atnik di as bik maltasyang yakauna.
5Yang Papangki, man yatalaman ampus tapaki dadasnidaipa;
man kaupak sip maltasyang dutki balna kidika.
6Dawan, Papang man parasma bitik dutaman kidika,
¡asalnina kalahnin awaski yang yulki munah
man yakat makukulwa balna kidika!
Israel Papangni,
¡yang yulki witingna kulninna sanlanin awaski
man yakat kulninna bitik mawawalwa balna kidika!
7Man yulma muih dutni yayulna ki,
yang muhki kidika asalni kalahna;
8¡yang laih di taldas dini as kapatyang,
dawak muih as bik yatalwas kapatyang,
wirahki balna palni niningna yakat!#Job 19:13.
9Man ūma kidika yulni kasak minit antayang;#Jn 2:17.
yang yakat yabukna ki dutni yuyulwa kidika
man yakat mauhuswa kidika.#Rom 15:3.
10Yang di kastas datik aidingkat, sarahni yayuyulwi;
11kulnik bukwak asna sani āwingkat muih bitik nikingkakari.
12Muih tininapas yakat likyang,
dawak wasak diyang balna unbaunin yayamwi yang kau.
13Kaunah, yang laih Dawan, man yakat yultayang.
Yang Papangki, ¡waralaih ilpyatah!
Man dalani lani dutaman kidika kau, ¡nangkitlatah!
Ma bitik yakat ilpma sihtaman kidika kau, ¡yalaihta yaktah!
14¡Datangkat wasmak yakat yataih-ahawarang!
¡Dutni yakukulwa balna kidika kaupak yalaihta yaktah
dawak was tuhni kidika kaupak!
15¡Yadatangkat was parasni kidika yamurwi yadukiwarang!
¡Datang kat was tuhni purwa kidika yadukakiwarang!
16Dawan, nangkitlatah;
¡man laih muih yamniman dawak dalani lani bitik palni dutaman!
Man minikun talnin lani nuhni palni dutaman kidika kau, yang akat yatalah;
17¡man dima yamyang adika rumhwi dawinih!
¡Nangkitlatah sirihni, yamadangni yakat sakyang!
18Yaihkit akat aiwa yalaihta yaktah;
¡waihkila balna kaupak yalaihta yaktah!
19Man amanglataman, ya-uhuswa kidika,
asalni, dawak respik dis yayamwak wauhnayang kidika;
man amanglataman, angdika waihkila balna kidika.
20Yang kau ya-uhuswa kidika yulni kulnik bahna ki;
¡kulnik sau kau bukna dawak paraski bik diski!
walnayang bik dauh manah ki
wais yaklauwi walaki ānin dawak mikun yatalnin.
21Yang kasnik yakat puisin ahana,
was dikih yawak wasni tapalhni yayawak dinayang.#Mt 27:34,48; Mk 15:23,36; Lc 23:36; Jn 19:28-29.
22¡Witingna tininabil, dawak kasninna balna kidika kulnin yamni atwi yayamna kidika
witingna niningna yakat dilaihnin dini yakat wiryaklawang!
23¡Yamtang kat miniknapa puklakwang
dawak ban kaput karang kalnina yukwarang kidika!#Rom 11:9-10.
24Kulnam daukalna kidika witingna minitna yakat datang kiwang;
¡man kulnam daukalna dalhwa kidika dilaihwang!
25Witingna ūnina labanni kidika kauhmak wanilang kalwang,
dawak witingna ūnina labanni balna yakat muih as bik yalahwas karang;#Ap.w 1:20.
26dangnit yakat uiwi, kalatang kulnin bukna muihni yakat
dawak sarahni kalyuyulwi kalatang kaldakna kat dalani wauhwa kidika yulni.
27Dutni yayamwa kidika dutni kau wirlata diatah;
¡dutni datang diswa kidika, witingna laih duduwas karang!
28¡Sangka atnin wauhnitaya kaupak tapmuktah!#Ex 32:32; Rib 3:5; 13:8; 17:8.
¡Muih yayamni balna ayangnina ulna kidika yakarak libitwinih!
29Kaunah yang laih, siknis kulnik bukna adika,
yalaihta yadulautah, yang Papangki, yalaihta yaktah.
30Unbaunin kau unbautik ayangni nuhni yamki Papang ayangni kidika;
ayangni nuhni yamki tingkih lani karuk,
31dawak Dawan laih tanit isninglak kalna karang
turuh almuk as sakripais buswi kalawarang
kidika awaskat turuh wahma as tamni balna dawak kalni susni balna bitik kalawarang bik.
32Kidika talwi, kulninna bukna balna kidika alasna duduwarang,
dawak kulninna bukna balna kidika kulninna yaklauwarang Papang yakat walyang balna kidika;
33kat Dawan laih muih miniknakunni balna yakat didakawa bahang
dawak witing dini balna silak yakat bangkidika rumhwi dawas ki.
34¡Dawan ayangni nuhni yamtanauh makau kisang yakat, sau dawak kuma,
kaput bik kidika balna pasyakat di bangkidika bitik!
35-36Kat Papang yaklauwi Sayan kidika laihwi yakwarang,
dawak Judá tawanni nunuhni balna daukakalna kidika watwi dulauwi yamwarang.
Witingna dinina yamyang walaninabis balna kidika duduna karang tawan nunuhni balna kidik;
kidika yakat yalalahna karang dawak pānina duduna karang;
¡witing ayangni dalani tatalwa balna kidika yakat yalalahna karang!
Currently Selected:
Salmos 69: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
