Salmos 42—43
42—43
1Sana was dikih kalawak was walwa kapat,
kaput yang Papangki, man yakat mawaltayang.
Coro sumalniyang kaupak, Walanibis balna yulnina damni.
2Papang kidika dukih yawi, sangka atnin Papangni kidika.#Sal 63:1; 143:6.
¿Mampatkat Papang muhni yakat wattik lawakiyah?
3Pukta madah, yang kasnik kidika laih mikwas,
awar bitik yakat yayulwi dakakawi:
“¿Angkat sakyang man Papangma?”
4Adika dini yakat kultingkat,
yadalawa balna bitik watwi yadalawi muihki yakat.
Isingkatwi, yang muih karak kalpaktik yawayang dai kidika,
Papang uni yakat
alasna sarahtayang tingkih yultayang dai kidika.
¡Alasna nuhni ampus awadaih!
5¿Amput dawak kulnik kidika sau yakat bukwarangyah?
¿Amput dawak ising abahlwarang yah?
Yang tahanik kidika Papang yakat ānayang sakki
baisa witing yakat ayangni nuhni yamki.
¡Witing laih Papang, dawak bik laihwi yayakyang ki!
6Kulnik uba sau yakat bukna kaldakayang.
Kidika bahang uba man yakat kultayang
Jordán wasni kidika sauni pīsni kaupak,
Hermón dawak Mizar asangni balna kaupak.
7Sau wakarhni kudungni kidika kaupak dakana ki
was wakarhni makaupak utuhwi kawak;
was parasni murwa balna man sihtaman kidika
yang mikitmunah bayakna.#Jon 2:3.
8Madah yakat Papang kulnin dalani kidika yasihwi,
pukta yakat yang laihwattas unbautayang
dawak mikit yultayang kidika, sangka Papangni yakat.
9Papang yang nakitdakyang yakat kalyultayang:
“¿Aisyamta yadatang damatkahnayah?
¿Amput dawak kulnik bukwak lik-atnikyah
waihkila balna yatataihwakat?”
10Wakalki balna bitik yadalawi
waihkila balna yauhuswa kidika yulni,
dawak awar bitik yakat yayulwi dakakawi:
“¿Man Papangma angkat sakyah?”
11¿Amput dawak kulnik kidika sau yakat bukwarangyah?
¿Ampadawak kulnik abahlwak sak-awakiyah?
Yang tahanik kidika laih Papang yakat ānayang sakki,
witing yakat baisa ayangni nuhni yamki kidika.
¡Witing kuduh yang Papangki, dawak laihwi yakyang kidika!
Currently Selected:
Salmos 42—43: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998