Salmos 38
38
Papang kau minit yulwi ilp yulna
Devid isningkatna atnin salnimo.
1Dawan man kulnam daukalna kidika karak yalibitwinih
dawak bik wah yawinih man kulnam daukalna kidika karak.#Sal 6:1; Jr 10:24.
2Kat yang akat man simabang balna kidika yapana ki;
¡man tingma kidika yang mikit yakat datang bukna!#Job 6:4; 16:12-13.
3Man antaman, yang dutki balna yulni;
yang muihki bitik siknis ki;
¡yang wakalki as bik yamni diski!
4Yang dutki balna kidika yataihwi;
tikini kidika yang sip truktasyang.
5Tapaki dadasni yulni
yadakna balna kidika dutlawi wayani kalwi.
6Mapiris kaupak masan kat kulnik bukna likyang
abuk likyang kulnik tikini yataihwak.
7Dangki kidika yamah manah daihni ki;
¡muihki kidika bitik laih siknis manah ki!
8Muihki bitik laih yatikna kapat dalani manah ki, dawak paraski bik diski;
¡yang yultik aidayang balna kidika laih kulnik dinit kaupak kalahwi!
9Dawan, yang dukih yawa balna kidika bitik talaman,
¡wingkita puhtayang balna kidika man namangyakat malni awaski!
10Yang ising kidika sirihni wark kalahwi,
parasni bitik laih disdawi,
¡dawak mikpa balna bik ditalas datayang!
11Yang kaltalyang yayamni dutayang kidika dawak wanaihki balna kat bik,
yang kaupak nailuihki, dawak pilauki balna kaupak bik naikau ki.#Job 19:13.
12Yaīnin kukulwa balna kidika, takipas yakat yalaihnin dini ahawi;
dutni yāyamnin kukulwa kidika yadaukalpamnin yuyulwi
dawak awar bitik yakat malnikau yaīnin kidika yayamwi.
13Kaunah yang tappuk kaltayang, sihm yang di dakasyang kapat;
tubiyang kapat tikpas wakahtasyang.#Is 53:7.
14Yang laih, muih as di dakawas kapatyang,
witing silp alas ilpni yulwas kapat.
15Yang, man yakat tahatayang, Dawan, yang Papangki,
man lawa nangkitlatah.
16Yang adika manah yultayang, nikingkarinin-awaski
mikit bayakna kidika yulnin-awaski buktingkat.
17Rahm kidika laih buknik manah ki;
yadalawa balna kidika yadawaski.
18¡Yang dutni balna yamnayang kidika yulki,
kat dutni manah yabahngilwa bahang!
19Yang waihkila balna kidika baisa mahni kalna;
pini kaupak dutni yakukulwa balna kidika mahni kalna.
20Yang yamni diyamnayang kidika, biriwi dutni yayayamna;
kat di yamni kidika yamkuhtik walting kat yang nikingkauh manah yaklalauwi.
21Dawan, ¡yang alas yadawinih!
Yang Papangki, ¡yang kaupak naikau kalahwinih!
22Papang, yalaihwi yakyang, ¡sirihni aiwa ilpki awah!
Currently Selected:
Salmos 38: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998