Salmos 27
27
Dawan laih yaringni yawi dawak bik yalaihwi yakwi
Devid kaupak.
1Dawan laih yaringni yawi dawak bik yalaihwi yakwi,
¿wais kidika yang yamanidunik sipyah?
Dawan laih yang sangkika nanitdakwi,
¿bahang wais yakat yamanidukiyah?
2Muih dudutni yang waihkila balna kidika,
kalpakwi yang nikingkauh yaklalauwi ya īna atnin;
kauna witingna kuduh kalnina dakwak bubukwa kidika.
3Kalbauyang muihni balna mahni ya-awaihdadakwarang bik,
yang ising kidika yamaduwas karang;
nikingkauh yakalbaunin ridi kalalahwarang bik,
kauna yang laih isinglak sak-awaki.
4Di aslah Dawan kaupak yanin kalyulnayang,
di aslah dukihyawi;
Dawan ūni yakat sak-atnik
ma bitik kau yang sangkika bitik yakat,#Sal 23:6.
witing uni yakat ayangni nuhni yamnin
dawak di yamni balna yamna kidika talna atnin bik.
5Ma dutni balna kidika kiwi kawakat
Dawan witing ūni kaupak suruhmnin dini as yawarang;
dawak witing dinitkau sanni yakat yahawi nakitdakwarang.
¡Kipala nuhni minit yakat yailwi yalaihwi yakna karang!
6Kaput laih yang tunaki dulaunik sip-awaki
yang waihkila balna minitna yakat;
dawak kaput laih sip awaki makatyulnin uni yakat sakripais busna atnin,
alasna dutik sarahki dawak unbaunin yayamni unbauki Dawan yakat.
7Man yakat mayultayang Dawan, yadakah.
Yang akat mikun yatalah,
¡dawak nangkitlatah!
8Yang ising yaklauwi yayulwi:
“Dawan yakat waltah.”
Bahang yang, Dawan, mawaltayang.
9¡Yang kaupak yakmaldinih!
¡Kulnam daukalna kau yaruhmwi dawinih!
¡Yang ilp dunik kidika laih man yakat manahki!
Yang alas yadawinih, dawak bik yaruhmwi dawinih,
kat man laih yang Papangkiman, dawak bik yalaihta yakyang man.
10Yang papangki dawak nanangki yaruhmwi dawarang bik,
Dawan, man laih yang tikini kidika trukma.
11Dawan, man tama kidika nikingkatah;
ta yamni munah yaduta yawah
yang waihkila balna yulni;
12witingna kulninna lani kat tingnina yakat yahawinih,
kat witingna kidika yang nikingkauh yaklalauna bahang
alas yulni karak, dawak kalbaunin lani karak bik.
13Kaunah yang laih yamni amanglatayang,
Dawan witing minikun talnin lani duwa kidika talna awaki
adika sangnika naini akat.#27.13 Adika sangnika naini akat: satuk wirlana kidika: sau akat sangka balna yalalahwa kidika (talah 116:9 yakat).
14¡Dawan yakat kulnam āta dutah!
¡Kulnam dadasni dutah, sangka dauwinih!
¡Agha, Dawan yakat kulnam āta dutah!
Currently Selected:
Salmos 27: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
