Proverbios 31
31
Lemuel kulnin lani balna yulna kidika
1Masa kaupak king Lemuel kulnin lani balna yulna kidika, kidika balna karak witing nanangni yaklau sumalna dai:
2Yang walakibis al, yang bāki kaupak,
yang Papang kalni dinit buktik yulting kat yadakawi biriwi nangkitlana kidika,
¿ais baisa mayulkiyah?
3Man parasma balna kidika muih yayal balna karak diswinih,
bahang kidika balna yaklau yayamwakat king balna kidika didiswi.
4Dawak yamni awaski, Lemuel, king balna dawak kabamint kayang balna bik
wain dawak dinin dini pararasni balna kidika dina atninna,
5bahang sipki lā kidika dinitnakahninna
dawak muih buknin lani duduwa balna rahmnina kidika yakat dutni yamna atninna.
6Wain dawak dinin dini balna pararasni kidika bik datah
kulninna bukna balna kidika dinina;
7¡didiwang dawak watwi isningnakakatwas kawang
miniknakunni kidika dawak dalani wawauhwa kidika bik!
8Yulma kidika parasni yultah parasni yuyulwas balna kidika yulnina;
¡tanitna daknin muihni dis kidika balna yakat tanitna daktah!
9Yulma kidika parasni yultah, dawak la kat kidika diyamtah;
¡muih miniknakunni balna dawak kulninna buknin lani duduwa kidika yakat bik tanitna daktah!
Muih yal di yamni yamwa kidika yakat ayangni nuhni yamnin kidika
10Muih yal di yamni yamwa kidika yaknin isi awaski;
¡kipala minit nunuhni balna kidika karak bik baisa minit nuhni ki!
11Witing alni kidika laih yamni kalkulwi witing yakat,
dawak di balna minit kau lāwi dunin kidika bik ban kaput duwi.
12Witing alni yakat di nunuhni balna kidika kalawi
witing sangnika bitik yakat.
13Sīp unitak dawak linin asnina kidika bik walwi kiwi,
dawak ting warkni balna kidika yamkih yamwi.
14Sihm witing kidika bakannin dini balna duainin kuring nuhni kapat,
kasnin dini balna kidika pa naikaupak duaiwi.
15Baisa payahlawas kau yaklauwi
dawak walanibis balna dawak dini yamyang yayal balna yakat bik di diawakat kakaswi.
16Sau kidika yamni lakwi talwi dawi bakanwi,
dawak witing minit kau yakna lalahni kidika karak wain balna dahwi.
17Parasni prakni kidika kawi
dawak kulnin dulauwi wark kalahwi.
18Witing lalahni warkni kidika maintalwi yamni tanitna yakat kiuna atnin yulni,
dawak pukta kidika pukna nai wark kalahwi.
19Witing silp tingni karak
wahni balna kidika yamwi dawak bik karwi.
20Witing laih ban kaput tingni kidika uhrwi
muih miniknakunni balna dawak dukih diawa balna yakat bik.
21Witing sulani balna yulnina yamaduwas ki mukus pihni bukwa mani kat,
witing walanibis balna bitik kidika prak tubakni yamni kakana bahang.
22Witing silp yamwi umukni balna kidika,
dawak asna yayamni balna kidika manah kawi.
23Witing alni kidika laih tawan nuhni yakat muih balna bitik yamni amangnilalawi,
dawak kidika sauni muihni nunuhni dikulna balna kidika pasyakat witing bik nuhni kalkulna ki.
24Witing laih prak nunuhni balna kidika dawak banimak yakat sitnin dini balna kidika bik yamwi,
dawak di bakanyang muihni balna yakat wauhwi dibakanwi.
25Parasni dawak bik yamni prakni kidika kawi,
dawak yahan mani dini kidika yulni kulwi kalbauwas ki.
26Sins lani karak yulbauwi,
dawak sumalwa balna kidika dalani lani karuk yamwi.
27Ūni yakat kiunin kidika ridi ki,
dawak wat as bik kaswas ki witing yakwas dini kidika.
28Walanibis ahal balna dawak alni kidika yaklau
ayangni nuhni yamwi aput kalyuyulwi:
29“Muih yayal yayamni laih mahni palni ki,
kaunah man laih bitik pasyakat baisa yamni palni man.”
30Yayamni kidika laih alas manah ki,
nuhni yaksihni kidika laih dauh manah ki,
kaunah angdika yalni Dawan yakat rispik yamwa kidika laih
ayangni nuhni yamna atnin ki.
31¡Tawan muihni balna bitik muhnina yakat ayangni nuhni yamtanauh!
¡Di tras kalatanauh di balna bitik yamna kidika yulni!
Currently Selected:
Proverbios 31: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998