Proverbios 30
30
Agur kulnin lani balna kidika
1Agur sinsni lani balna, Jaqué Masa walanibis.
Agur yaklau Itiel dawak Ucal kidika balna
yakat aput yuldibauna dai:#30.1 Agur sinsni lani balna...yuldibauna dai: wirlana kidika yamni kapat ki. Hibru kau laih amangladaski.
2Yang laih muih balna pasyakat sins disyang,
yang laih muih sinsni disyang.
3Baisa sins dutasyang,
holi lani kat bik amanglatasyang.
4¿Wais makau kisang yakat kilwi kiunayah
dawak yaklakwi kainayah?
¿Wais sipyah wing kidika
tingni kau laihwatna atnin?
¿Wais yaklau kuma kidika witing
kalmuknin dini kidika kau balakwih?
¿Wais yaklau sau kiwi watwa
balna kidika āna yah?
¡Man yayulwinih ayangni amanglataman,
dawak walanibis ayangni kidika bik!
5Dawan laih angdika muihni balna witing
yakat yamni kalkukulwa balna#2 Sam 22:31; Sal 18:30. kidika witing tingni dinit yakat awi duwi;
witing pranimis balna bitik laih
yamni kulna ki.
6Witing ais yulwarang kidika
yakat di as bik minitlakwinih;
kaput awas karang kat, mabilnin sipki
dawak alas yulyang muihni makulna karang.
7Di bulibitlah mayulnayang, Papang;
baisa dautasyang tanitkauh yatah:
8alas lani kidika yang kaupak naikau yaktah,
dawak di duyang dawak mikunni bik yayamwinih;
kasnik dini kidika manah yatah,#Mt 6:11.
9kat sutni yawatwarang kat,
matalasyang atnik sipki
dawak amangmalatasyang atnik bik sipki;
dawak sutni yawatwarang kat, malnik sipki
dawak kaput man ayangma yamni kidika
yakat dutni yulna atnik.
10Muih dini yamyang kidika yakat dutni
yulwinih daniwan muhni yakat,
bahang la matuhnin sipki dawak
tranibil balna kidika wauhna atnam.
11Muih as as laih papangnina kidika
yakat lakaltutuhwi
dawak nanangnina yakat laih blis kalyayamwaski.
12Muih as as laih maisihni dis kaldakakawi,
dawak maisihni duduwa kidika kaupak
baisa maisihni dis kakalwas ki.
13Muih as as laih nuhni kaldakakawi,
dawak muih balna yakat nuhni kaldakawi tatalwi.
14Muih as as laih isparah duduwi
ananina kauh duninna pāni yakat
dawak kuhbil duduwi sukninapala
kauh duninna pāni yakat,
bitik kau dismukna atnin yulni
sau muihni miniknakunni balna yakat.
15Walabis yayal bu duwi
kidika balna laih muih kau yulwi dunin manah ki,
sip isningnalak awaski:
16sau ū kidika,
muih yal walabis yakwas kidika,
sau was dis kidika
dawak kuhpau sip di isninglakwas kidika.
17Angdika muihni papangni yakat
dauh kaltalwa kidika
dawak nanangni muihbarak#30.17 Nanangni muihbarak: grik kau ulna yakat kaput yulwi. Hibru kau yulwi nanangni yulni dakawa kidika. yakat
sarahni kaltalwa kidika laih,
minikpa balna kidika kuparis balna
yaklau yakninna ki
dawak muihni nuhni kidika laih
yakal balna yaklau kasninna ki.
18Di bās rauki, dawak arungka kat bik,
lāih nikingkakawas ki dawak bik
sip amanglatasyang:
19yakat tani kidika laih makau kisang yakat,
bil tani kidika laih kipala balna yakat,
kuring nuhni as tani kidika laih kuma yakat,
dawak muih al tani kidika laih muih yal yakat.
20Muih yal barangni awas kidika
laih adika dini yamwi:
di kaswi, tinipas suhwi
dawak lāih yulwi di dutni as bik yamwas ki.
21Muih satni balna kidika bās dawak arungka kat bik duwi,
kidika balna niningna yakat laih sip wauhdaski dawak bik witingna yaklau yayamwakat sau kidika isihwi:
22muih dini yamyang as king kalwa kidika,
muih mutu di kasnin dini minitbayak duwa kidika,
23ruhmwi dana yalni as alni yakwa kidika
dawak muih dini yamyang yal as witing daniwan yal pāni yakat kawi duwa kidika.
24Sau yakat didauh satni binina arungka duwi
witingna laih baisa sins duduwi sins duyang balna kidika karak dawakat:
25kiki balna mahni parasnina dis
ma daihwa mani yakat kasninna dini walwi duduwa kidika;
26tibam balna, mahni palni bik awas
kipala nunuhni balna walsah yakat yalalahwa kidika;
27wadau balna, kingnina dis karang bik
yamni tanitna kat uiwa kidika;
28kamasihrka balna tingpas nakaslah karak laihda karang bik
king ūni kat uiwa kidika.
29Kulnin dadasni kidika satni bās dawak arungka kat bik duwi,
kidika balna laih yaksihn tatuna duduwi:
30layan, didauh as yamadangni
di sa bik dawak muih as bik niningkaupak kiras kidika;
31sakara almuk witing manah kapat#30.31 Sakara almuk witing manah kapat: wirlana yamni kapat ki. Hibru kau laih amangladaski. kaldakawa kidika dawak kuts almuk kidika bik
dawak king as witing kalbauyang muihni duwa kidika balna taninatuna duwa kidika.
32Mutu man kapat kaldaka
dawak di dudutni balna yamnin kulnaman kat, yul kulta talah
33tāwas kidika kawaihma kat, butar yakma ki,
parasni sarahma kat, nangmatak kaupak ā kalahwarang ki,
dawak muih ūk yakat usma kat, kalbilnin yakma ki.
Currently Selected:
Proverbios 30: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998