Proverbios 13
13
1Walanibis sins duwa kidika laih papangni yaklauiwi
barangni kalyakwak dakawi;
kaunah tapadadas kidika laih bilwa kidika dakawas ki.
2Muih bitik laih ais yulwa kidika minit anawi,#Pro 12:14; 18:20.
kaunah barangni awas balna kidika laih
kalbaunin kidika yuh diawa kapat ki
3Mayulki pini yulnin awas kidika laih silp mainkaltalwi;
uba yulbauwa kidika laih silp kaldaukalwi.#Jm 3:2-12.
4Baskiwah kidika di dukih kalawi kaunah yakwaski;
wark kalahwa kidika laih barakwi.
5Muih al la kat kidika laih
alas yulnin kidika waihla talwi;
muih dutni kidika laih
asalni dawak risnipik dis manah ki.
6Barangni kidika yaklauwi muih al
dutni yamwas yakat nanitdakwi;
dutni kidika yaklauwi kaldaukalpamwi
dutni yamyang yakat.
7Muih buas di dis karang bik duyang kapat kaldakawi,
dawak muih ūk laih duyang balna miniknakunni kapat ki.
8Rits muihni kidika, ritsni yaklauwi kallaihwi yakwi;
minikunni kidika laih dutni kalyamnin yuyulwas ki.#13.8 Dutni kalyamnin yuyulwas ki: wirlana kidika yamni kapat ki. (talah s.d. 1) Hibru kau laih amangladaski.
9La kat balna kidika laih awas yaringwa kapat ki;
kaunah muih dudutni balna laih awas piwa kapat ki.
10Witingna manah kapat kaldakawa kidika
laih kalbaunin manah yamwi;
sins tuhni kidika laih limahni balna karak ki.#13.10 limahni balna karak: tiksni kidik yamni kapat ki, 11:2 yakat. Hibru kau laih yulwi yul sumamalwa kidika.,#Pro 11:2.
11Alas munah ritsni kidika laih parahyak bukwi;
kaunah tani tani uduhwa kidika laih, minitkau lāwi.
12Tahanin as dauhkalwa kidika laih, isning bukna,
dukih kalawa yakat yamna kidika laih,
pan as sangnika duwa kapat.
13Yamnin pakwak yamwas dana kidika laih, kaidarang;
yamnin kalyulwa yakat rispik
kulwa kidika laih minit duwarang.
14Sins duyang sumalwa kidika laih sangka rikni,
daunin wahni kaupak laihwi yakwi.#Pro 14:27.
15La kat yamwa kidika laih yamni kaltalna ki,
barangni awas kidika laih daukalnin yakat kiwi.
16Isningpuk kidika laih sins sirihni karak di yamwi,
kaunah tapdadas kidika laih
di yamni yamwa kapat dakawi.
17Muih dutni as yul duwi kiuyang
kidika laih pāt duwi,
kaunah yul duwi kiuyang barangni
kidika laih ingni kalyamwi.
18Yul dakawas muihni laih minikunni
dawak bik rispik dis karang;
barangni kalyakwak dakawa kidika
muihni laih risnipik nuhni karang.
19Dukih kalawa kaput yamna kidika laih alasna ki.
Tapdadas balna kidika laih dutni kaupak
naikau kalahnin kidika sip-awas dakakawi.
20Sins duyang balna karak kalpaktah sins tuhni duma;
tapdadas karak kalpaktah lus disma.
21Dutni yamyang balna laih dutni kidika diuiwi;
la kat balna kidika laih, di yamni kidika minitna duduwarang.
22Muih al yamni kidika dini balna
kidika diawi mani balna yakat;
kaunah muih dutni ritsni balna kidika laih
la kat muihni kidika dini karang.
23Minikunni yanimak yakat, kasnin dini manas ki,
kaunah manas diswi la kat yayamwa kidika yakat.
24Wais walanibis yul sumalwas laih, dalani talwas ki;
dalani talwa kidika yakat laih barangni āwi.
25La kat muihni kidika laih kaswas isninglak dawi,
kaunah muih dutni laih yuh kalawi.
Biblia Sumo
Texto © Sociedad Bíblica de Nicaragua 1998