Proverbios 12
12
1Yul dakanin kidika dalani talnin laih,
di amanglanin kidika dalani talnin;
bilwa yakat waihla talwarang laih di amanglawas ki.
2Muih yamni kidika Dawan duwi,
dawak dutni dukih kalawa kidika laih dutni yakat ruhmwi.
3Dutni laih rahni parasni awaski muih bitik yakat;
la kat balna kidika riknina ban kaput ki.
4Yal sampla kidika laih, lani yakat king kapat yamwi,
kaunah yalni dutni kidika laih bitik kaldaukalwi.
5Ahal la kat balna kidika laih
la kat yamnin kidika kukulwi;
muih dudutni kidika laih
alas kalyulnin manah kukulwi.
6Muih dudutni yulnina kidika laih
laihnin dini malnikau āna yamadangni kapat ki;
la kat alni kidika laih, laihwi yaknin.
7Muih dudutni kidika bubukwi, yakat dahnkalwi,
kaunah la kat muihni balna ūnina laih
ban kasakni sakki.
8Muih yakat ayangni nuhni yamwi
sinsni sirihni kidika munah,
kauna mutu kidika laih minitdis kalkulnin manah ki.
9Tanit kulna ki dau kalkulwak kaunah,
di yamni bayahna kat;
nuhni kalkulwi kaunah dutni di kasna kat.
10La kat kidika amanglawi tingnilau
balna bik kaldakakawa kidika,
kaunah muih dudutni laih minikun talnin
kidika amanglawaski.
11Witing sauni yakat wark yamwa kidika,
kasnin manas duwi;
isningpuk awas kidika laih
ilp dunin awas kidika yamwi.
12Di dutni dukih diawa kidika laih
muih dudutni balna dilaihnin dini;
la kat balna riknina kidika laih
ban kaput ki.#12.12 Di dutni dukih...ban kaput ki: tiksni kidika yamni kapat ki. Hibru kau laih amangladaski.
13Muih dutni kidika laih
silp alas yulwa kidika kalbalakwi,
kaunah al la kat kidika laih di sirihni kallaihwa
kaupak yamni dakwi kalahwi.
14Muih bitik laih
ais yuyulwa minik kidika ananawi#Pro 13:2; 18:20.
dawak ais yamwa kidika minit duwi.
15Tapdadas kulwi,
di yamwa bitik kidika yamni manah ki,
kaunah sins duwa kidika laih
yul sumalwa yakat dakawi.
16Tapdadas kidika kulnin daukalwak lāih yakwi;
isningpuk muihni kidika laih,
kaluswa kidika dakawas dawak bayakwi.
17Witnis rahm kidika laih,
yul rahm kidika yulwi;
witnis alas muihni kidika laih alas manah yulwi.
18Muih buas yulnina kau dalani diayawi,
kaunah sins duyang balna yulbabauwa kidika laih
dalawa kidika dis dawi.
19Di rahm yulwa kidika laih ban sakki,
kaunah alas muihni laih minit as bayakkiwi.
20Muih dutni balna yamnin kukulwa kidika
yakat laih alas sakki;
muih al kulnin aslah duwa kidik
yul sumalwa laih alasna ki.
21Muih al la kat kidika laih wat as bik
dutni wauhwas karang,
kaunah muih dutni kidika laih,
dutni balna bitik libitwi kalawarang.
22Dawan dutni talwi alas muihni balna yakat,
kauna yamni ditalwi, di rahm yayamwa balna yakat.
23Sins sirihni duyang kidika
witing manah kapat kaldakawas ki
witing di amanglawa kidika,
kaunah tapdadas sins dis yamwa kidika
di yamni yamwa kapat kaldakawi.
24Wark kalahwa kidika laih
witing yaklauwi minit bayakwarang;
kaunah baskiwah kidika laih
witing yakat minit bayakwarang.
25Kulnin kaida kidika yaklauwi muih al yakat taihwi;
minikun talnin yulni balna kidika laih alasna yakwi.
26La kat kidika laih wanaihni tanituna duwi;#12.26 La kat kidika...duwi: tiksni kidika yamni kapatki. Hibru kau laih amangladaski.
kaunah muih dudutni laih ta didiswi.
27Di iyang baskiwah kidika laih sip di iwaski,
kaunah talna di yamwa muihni kidika laih
ritsni nuhni laihwi.#12.27 Talna...ritsni nuhni laihwi: tiksni kidika yamni kapat ki. Hibru kau laih amangladaski.
28La kat yamnin tani kidika laih
sangka atnin yakat dukiwi;
isningpuk awas#12.28 Isningpuk awas: tiksni kidika laih yamni kapat ki. Hibru kau laih amangladaski. muihni kidika laih
daunin yakat dukiwi.#Rom 6:21-22.
Biblia Sumo
Texto © Sociedad Bíblica de Nicaragua 1998