Filipos 3
3
Rahm di minit nuhni kidika
1Waralaih, wirah balna, Dawan yak alasna awanauh. Yang nikingkauh laih dutni dakanik dini diski wattik manaulna atnik, dawak manna namangnakauh laih ilp ki. 2Amung talnauh muih dudutni balna kidika,#3.2 Muih dudutni balna kidika: Y.y. sul balna. wark dutni yayamwa kidika, muihnina nuhni yakat dakwi daukakalwa kidika; 3kat rahm palni Papang sainni duna#Jr 4:4; Rom 2:28-29; Gal 6:14-15; Col 2:11-13. balna kidika kuduh mayang, Papang ayangni nuhni yamda kidika Spirit munah,#3.3 Spirit munah: tingkau ulna balna kidik minitkau lakwi: Spirit yakat. dawak mayang alasna dudi Krais Jisas mayang bahang, mayang di dauh balna yakat makulnik ādi dudaski. 4Yang bik kidika yakat kulnin ātik dutayang. Muih as bik diski yang kultayang kapat kulnin: 5batandanayang ma tiaskaubās kat Papang sainni yayana, yang laih Israel ninisan yang, dawak Benjamín sulaniyang,#Rom 11:1. hibru muihni as yang, hibru walanibisyang. Ju lāni tanka balna walwi yaknin niningyakat laih Parisi pasyakat yang dai;#Ap.w 23:6; 26:5. 6yang laih minit anyang as yang dai, suts muihni balna yakat laihkuhtik uinayang;#Ap.w 8:3; 9:1-2; 22:4; 26:9-11. lā kat yamnin kidika yulni kidika laih sip-awasdai laihwatna atnin. 7Kauna adika bitik, muhnilau laih nuhni dai yang nikingyakat, kaunah waralaih, Krais yulni, kidika balna bitik laih dauh kalna. 8Baisa minityakat, minitdis talayang libittik talingkat Dakiwan Krais Jisas di yamni nuhni kidika karak. Krais yulni di bitik dis alahwanayang, dawak di bitik kidika bubuh kapat talayang witing kidika dunik yulni, 9dawak witing karak aslah atnik yulni; yang alas lāki kat yamnik laih awaski, lā kidika kaupak dutik, kaunah Krais yakat kasak kulnin munah lakat atnin kidika, dawak Papang bik yaklauwi mayawa kidika kasak kulnin munah. 10Dukih yāwa kidika laih Krais kidika amangnilanik, yang yakat kaldakanik dauna kaupak watwi yaklaunin kidika parasni, dawak wauhnin yakat aslah kalahnin, witing dauna kapat yang bik dauna atnik,#Rom 6:11-13; 8:29; 2 Kor 3:18; Gal 4:19. 11dauna kaupak yaklalauwarang yakat āwakih yawi.
Kalbauwa kidika angkat laihnin kulnakidika yulni
12Yang yultasyang bitik laih yaknayang, dawak bik barangni awasyang; kaunah ban takit yakat yawayang laihna atnik yulni, kat Krais tatuna yalaihna bahang. 13Wirah balna, yultasyang yang laih uman laihnayang; kaunah yamtayang kidika laih di bayakna balna kidika dating dikitkahwi, dawak takit kau sakkidika laihnik yulni parasni yamtayang, 14laihnin kulnayang yakat yawik āwinik, dawak makau kisang prisantni kidika dunik, Papang maiyulwa kidika mawi dunin Krais Jisas munah.
15Mayang bitik kasak kulnin lani parasni duda kidika, aput kulnin ki. Di as kat manna satuk kultamana kat, Papang yaklauwi adika bik namangna kawarang ki. 16Kaunah, mayang mayalahnin ki uman di balna amanglanamayang kidika kaput.
17Wirah balna, yang amputyang kidika kaput awanauh,#1 Kor 4:16; 11:1. dawak bik talnauh kidika balna amput yalalahwa kidika manna yakat namangnakana mayang kidika. 18Wat wat manayulnayang, dawak waralaih mikwas karuk manayultayang, manas palni laih yalalahwi Krais panan prihni kidika waihninala kapat, 19dawak witni kat laih disnin yakat didukiwi. Witingna daninawan kidika laih kaskih diawa kidika ki, asalni dakanin dini dai kidika witingna manah kapat kaldakakawi waralaih. Adika sauni dini manah kukulwi. 20Kaunah mayang laih makau kisang kidika muihni balna mayang, dawak tahadi makau kisang kidika kaupak kaiwarang mailaihwi yaknin kidika, Dawan Jisaskrais, 21mamuihki dutni adika satuk yamwarang, sihm witing muihni nuhni alasna yaksihn kapat. Witing parasni nuhni duwa kidika kau yamna karang di bitik minit bayakwi taihnin yulni.
Currently Selected:
Filipos 3: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
