Filipos 2
2
Sau yakat laknin dawakKrais nuhni kidika
1Kaput bahang, Krais yaklauwi kulnamna dulauwa kat, dawak dalani lani kidika yaklauwi manayamwak ūk balna yak walaninaānin, dawak bitik sihm kidika Spiritni kaupak duduwarang, minikun talnin kidika duduwarang kat kulninna yakat, 2alasna manah yabuhng datanauh manna yamni yalahtamana kidika kau, sihm kidika dalani lani karak aslah atnin, spiritni aslah, dawak ais yamnin kukulwa kidika bik aslah. 3Di balna yamtamana kidika wanaihma niningkauh atnin awaski dawak bik manna manah kapat kaldakanamna awaski, nawatkauh laih buknin lani kidika dunin, dawak bitik bik kulnin lani kidika dunin ki, muih ūk balna kidika kauh tanit yamni ki witing karak dawakat. 4Muih as bik witing manah yamni atnin kidika walnin awaski, kaunah muih ūk yamni atnin kidika walnin ki.
5Manna bitik sihm kaput kultanauh, wais Krais Jisas karak aslah muihni kulnin duwa kaput, 6witing laih:
Witing kidika sihm Papang dai kaunah,#Jn 1:1-3; Col 1:15.
witing karak kapapat kidika yakatlaihwi duwasdai,
7kaunah witing dini balna kidikapirini yakat lana
dawak muih dini yamyang kalna.
Dawak muih ūk balna kapat kalna,
dawak kaiwi kalahna muih pini as kapat,
8witing muihni kidika alas sau yakat bukna.
Kaput laih yulni dakawi yamna daidauna kat,#Mt 26:39; Jn 10:18; Hib 5:8.
pan prihni yakat dauna kat.
9Kaput bahang Papang yaklauwi,
risnipik tanit maluihni kalana#Hib 2:9; 12:2.
dawak muih ahal pasyakat
witing kidika tanit yamni palni ki,
10kaput laih,
kidika ayangni kalana kidika Jisas yakat,
muih bitik witing yakat limbabahnaatnin,
makau kisang yakat, sau akat,
dawak sau dinit yakat bik,
11dawak muih bitik amanglalawang#Is 45:23.
Jisaskrais laih Dawan,
Papang risnipik kalanin yulni.
Kristian balna kidika sau akatyaringni as kaputki
12Kaput bahang, wirah balna, manna nining yang yulki dakanamana kaput, kaunah yang manna pasmangna yakat sakyang manah laih awaski, kaunah waradika naikau sakyang bahang baisa yulki daka yamtanauh. Manalaihwi yaknin kidika rahm palni yamtanauh rispik lani parasni karak; 13kat Papang, witing minikun talnin duwa kidika yaklauwi yamwak manna yakat ukuswi kalahwi di yamni balna dukih manawa kidika, dawak bik witing yaklauwi ilp manawak witni kat yamta duyawamana kidika.
14Di bitik kidika kalbiltas yamtanauh, 15kaput laih muih as bik manna yakat manayakwas karang dutni kidika, dawak manna kidika Papang walanibis awanauh muih dudutni balna pasyakat.#Dt 32:5. Witingna pasyakat manna kidika yala kapat yaringni dutamana sau akat, 16sangka yulni kidika ban dutanauh. Kaput laih, Krais kaiwakat, yang manna yulmana yang manah kapat kaldakaki, kat dauh wark yamtasyang dai bahang. 17Dawak yang sangkika palni bik sakripais yamna atnin karang bik Papang yakat kasak kultamana kidika yulni minitdis kalanin dini kidika aitani kalanin yulni, yang alasna dutayang, dawak kidika alasnina kidika manna karak sahyaktik dutayang. 18Manna bik alasna awanauh, yang alaskina kaupak bik apis dutanauh.
Timoti dawak Epafrodito
19Dawan Jisas yakat kulnin atik dutik, sirihni Timoti#Ap.w 16:1-3. kidika manasihnik kultayang, kaput laih manna yulmana dakik alasna dunik yulni. 20Kat ūk disyang yang kultayang balna kidika witing karak yultik dakanikna, dawak bik manna yamni atnamna yulni kulwi kalbaunin kidika; 21muih bitik laih alas yamni atnin kidika walwi, kauna Jisas Krais dini laih wawalwaski. 22Kauna manna Timoti kulnin yamni kidika talamana, witing amput wark yamnayah yang karak yul wisamni yamni kidika sumalnin kat, yang walakibis kapat ilp yana. 23Kaput bahang tahatayang manasihnik, yang akat ais kalahwarang kidika amanglaki usnit kat; 24Dawan yakat kulnin atik dutayang, yang palni yawaki sirihni.
25Sihm kaput bik talayang nid ki wirah Epafrodito bik sihnik, wark pasyakat dawak kalbaunin dini balna kapat bik kaltalyang yamniyang kidika, manna lawa yasihnamana kidika dukih yawa balna kidika walwi yanin yulni. 26Witing kulnin bukwi manna yulmana, dawak witing kulwi kalbauwi kat manna dakanamana bahang siknis kidika. 27Dawak rahmki witing siknis dai, daunin manah dana dai; kauna Papang witing yakat minikun kaltalna, kaunah witing yakat manah laih awaski kaunah yang akat bik, baisa kulnik buknin awas kulnik bukna dutayang kidika minityakat. 28Kidika bahang sirihni sihta, manna tala watta alasna dunamna yulni, dawak kaput bik yang kulnin bukna atnin awas yulni. 29Manna alasna laihta dutanauh, Dawan yakat wirah as kapat, dawak witing kapat kidika yamni kaltalnauh, 30kat uman daunin manah dana dai bahang Krais warkni yamwi. Witing sangnika kidika yamadangni yakat āna dai, dawak daunin kidika yaihnit yakat kiuna dai, man ilp yanamna sip awas kidika yulni witing kaiwi ilp yana yulni kaput kalahna.
Currently Selected:
Filipos 2: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
