Números 25
25
Israel balna Baal-peor yak prinias yayamna
1Israel muihni balna Sitim sauni yak uiwi yalalahna mani kat, ahal balna kidika moab yayalni balna karak kalpakwi dutni yayamna, 2daninawan dauh yakat sakripais yayamwi yakat yulwi duwi uina. Israel balna kidika kasnin yayamwa dai kidika witingna bik kakaswi moabita papangnina dauh yakat minitna yuyulna, 3dawak kaput witingna dawan dauh Baal-peor prinias yakat uina dai.#Rib 2:14. Bahang Dawan laih Israel balna niningna yakat kulnin daukalna dai, 4dawak Moses yak kalyulna:
—Tawan muihni balna taninatuna bitik uduhtah, dawak yang niking yakat duyawah, madah yaringni yakat. Kapat laih Israel nining yakat kulnik daukalna kidika lungwarang.
5Moses yaklauwi Israel balna taninatuna balna yakat dipakwadai:
—Manna lawa, angdika muihni balna, papang dauh, Baal-peor yakat uina balna kidika bitik itanama.
6Kaunah Israel muihni as yaklauwi, madián yal as dukiwa dai, witing ūni yakat, Moses talwasakdai dawakat Israel balna bitik kaluduhna bangdai, kidika minitni yakat bitik kalpaknin ūni labanni kiukawa yakat kaidabangdai. 7Finees Eleazar walanibis, Aarón mani, witing talna kat, Israel balna paskaupak kalahwi, langsa as duwi, 8dawi Israel yal dukiwadai dangnit yakat kiuna payahwa pāni kat, kaput laih langsa kau pawi ahlawadai baniu yakat, dawakat yal yakat bik kaput laih, Israel balna yakat diyamwakat manas dadauwa dai kidika, yakat dahn kalwa dai, 9uman, tausin manah 24 dadauna dai, witingna.
10Kaput laih Dawan yaklauwi Moses yakat kiwi aput kalyulwadai:
11—Finees, yaklauwi yamwi Israel balna niningna kau kulnik daukalna kidika pina atnin, witing bik sihm minitna anna dai yang yamnayang kapat. Kidika bahang minit annin kidika yaklau yayamwakat buktasyang dawak witingna yakat bik imuktas awaki ki. 12Kidika bahang witing yakat kalyultah, witing karak kulnin aslah lani pranimis as yamtayang, 13kidika yulni witing yakat dawak sulani balna tingnina yakat bik ātayang, sumalyang as ban kaput atnin kidika, kat yang mikit anna kidika yulni dawak kaput laih Israel muihni balna kidika dutnina dawak disna.
14Israel muihni as madianita yaihnit yakat dauna ayangni kidika laih Zimri dai, dawak kidika laih Salú walanibis dai dawak bik Simeón sulani balna paskaupak ū duyang tanituna as dai. 15Madianita kaupak muih yal kidika ayangni laih Cozbi dai, dawak kidika laih Zur walanibis yal dai, Madián kaupak sulani balna dakni as tanituna.
16Dawan laih Moses yakat kiwi kalyulna:
17—Madián muihni balna yakat dikalbauta minitna bayaktanauh, 18sihm witingna yaklau manna yakat manakalbauwi mamatna bayakwi manayayamwakat dawan dauh Baal-peor yakat ayangni tanit nuhni yamnamana kaput, dawak madianita balna taninatuna walanibis yal Cozbi niningkauh laih, yang lawik wah as sihtingkat langsa kau dauna, dawan dauh Baal-peor yakat ayangni tanit nuhni yamna kidika yulni.
Biblia Sumo
Texto © Sociedad Bíblica de Nicaragua 1998