Nehemías 9
9
Esdras yaklauwi Israel dutni yamna kidika lāih yakwi yulna
1Sihm kidika wainiku pasyakat, ma muihasluih minitkau arungka yakat Israel balna kalududuhna yuh wauhna atnin yulni, dawak asna tubakni kawi dawi tunanina yakat sau uhuhna, 2dawak kaldakkalalahna, pa ūk kaupak muihni,#Esd 10:11. sulani balna karak, dawak kalnina kau yaklauwi dawi, witingna dutni yayamna kidika amanglalana, dawak muihnina-bararak balna dutni yayamna dai kidika bik. 3Witingna kidika pāni yakat yaklauna bangdai, dawak awar bās yulwi talna dai Papangnina Dawan lani wauhnitaya kidika, dawak witingna awar bās praisni yuyulna dai dutni yayamna kidika, dawak Dawan yakat ayangni nuhni yayamna dai. 4Usnit dawak libait balna Josué, Binuy, Cadmiel, Sebanías, Buni, Serebías, Bani dawak Quenani, witingna la yayamwa pāni maluihkau yakat kilwi Papangnina Dawan ayangni yakwi parasni yuyulna dai; 5usnit dawak yuyulna libait balna Josué, Cadmiel, Binuy, Hasabnías, Serebías, Hodías, Sebanías dawak Petaías: “Lawanauh, Papangmana Dawan ayangni nuhni yamtanauh, ban kaput atnin yakat. ¡Ayangni nuhni yamna kawang blisin karuk, witing#9.5 Witing: umani kau ulna kidika kaput ulna. Hibru kau laih ulna man. ayangni makau tanit yamni kidika!”
6Dawak Esdras yulna:#9.6 Dawak Esdras yulna: grik kau ulna kidika kaput ulna. Hibru kau laih ulwas diski. “Man laih Dawan man, dawak ūk diski.#Dt 6:4. Man makau kisang kidik yamnaman, kidika tanit maluihni kidik, dawak yala balna bitik; kaputbik man sau yamnaman, dawak kidika paskau di balna bangkidika bitik; kuma yamnaman, kidika paskau di balna bangkidika bitik. Man lawa sangnika diataman di balna bitik yakat. Kidika bahang, makau kisang yakat yala balna kidika bitik ayangma nuhni yayamwi.
7“Dawan, man laih Papangman, Abraham yakat yakta dunaman kidika, man lawa Ur kaupak yaknaman dai caldeo,#Gn 12:1. balna tawannina nuhni kaupak, dawak man lawa ayangni paknaman Abraham.#Gn 17:5. 8Talnaman dai al as man yakat rahm makulwa kidika, dawak witing karak pramis as yamnaman dai: kidika laih, witing sulani balna yakat diana atnin cananeo, hitita, amorreo, ferezeo, jebuseo dawak gergeseo;#Gn 1 5:18-21. balna saunina kidika; ¡kaput laih man yulnaman yakat yamnaman, kat man laih yultaman kidika bitik yamtaman bahang! 9Man talnaman, muihkina-bararak balna ampus wawauhwadai kidika Egipto#Ex 3:7. dawak dakanaman kakaidana kidika Kuma Pauni kung yakat.#Ex 14:10-12. 10Di taldas dini tanit yamni kidika yamnaman nuhni palni, Fero niningyakat, dawakat dini yamyang muihni balna yakat, dawak kidika sauni muihni balna bitik yakat,#Ex 7—12. kat man amanglanaman dai bahang, Israel muihni balna yakat dutni diyayamwa kidika. Kaput man ayangma nuhni dulaunaman warmani kat. 11Witingna muhnina yakat kuma kidika bu sahyaknaman dai, dawak kaput laih kidika papusmunah sau buhni kat dakyaklalana dai; kauna uiwi aiwa muihni balna laih diatang āwi uina tuhni palni yakat, sihm was tuhni yakat kipala kakiwa kapat.#Ex 14:21-29; 15:4-5. 12Usnitkat man lawa taninatuna dunaman madah yakat mukus kau, dawak puktayakat laih kuhpau kau, kaput laih tanina yakat yaringni duna atnin, witingna angkut aiwarang kidika yakat.#Ex 13:21-22.
13“Usnitkat Sinaí asangni yakat aiwa lakwanaman dai, dawak witingna karak yulbaunaman dai makau kisang kaupak; la barangni kidika duainaman dai, di rahm kidika sumalnaman, la yayamni balna kidika. 14Kaput bik sumalnaman yak-urupdinin mani#9.14 Yak-urupdinin mani: kidika laih satadi mani. kidika man dima yakna atnin, dawak dianaman la sumalnin as rahm kidika, la dawak sumalnin balna kidika man dima yamyang Moisés munah.#Ex 19:18—23:33. 15Dianaman baisa minit yakat kasninna makau kisang kaupak, witingna yuh dadauwa kidika kasna atnin,#Ex 16:4-15. dawak was bik dianaman dikih diawa kidika dina atnin.#Ex 17:1-7. Usnitkat dianaman kawi duna atnin, pa as dianin pramis yamnaman dai kidika yakat.#Dt 1:21.
16“Kauna witingna, dawak muihkina-bararak balna dai kidika laih witingnamanah kapat kaldakakana dai, dawak bik tapanina dadasni, man yulma balna kidika yakat dakawas dadana. 17Man yulma dakakih diawas dai, dawak witingna ilpnina nuhni yamnaman kidika bik amanglaki diawas dai. Tapanina dadasni dai bahang taninatuna as ahana dai watwi Egipto kau warau lani yakat didukiuna atnin yulni.#Nm 14:1-4; Dt 1:26-33. Kauna man laih Papang as muih dutnina kidika datang diswi, Papang as kulnam yudutni dawak bik minikun talyang man, nai tani tahayang man, dawak dalani,#Ex 34:6; Neh 9:17; Sal 86:15; Jl 2:13. lani kidika bitik dutaman, kaput bahang ruhmta datasman dai. 18Turuh almuk wahma wayani as di kau arwi yamwi dawi yuyulna, adika kuduh Papang witing yaklauwi, Egipto#Ex 32:1-4. kaupak maiyakna, kaput lāih di dutni yayamna dai, 19kauna, man dalani dutaman kidika kau, kauhmak wanilang yakat ruhmta datasman dai. Mukus as witingna tanitna yakat kiwadai kidika, ta yakat didukiuna atnin, madah yakat, kidika mukusni witingna kaupak yaklawas dai, kaput bik pukta yakat yaringni as dahlwi kiwa dai kidika witingna ta yakat uinin yulni, tanitna kaupak yaklawas dai. 20Baisa kidika minit yakat, man spiritma yamni kidika dianaman dai witingna yakat disumalna atnin, kaput bik witingna tininapas kaupak maná sihnaman dai kidika dahn kalahwas dai, kaput bik was sihnaman dai dikih diawa kidika dina atnin. 21Kurih muihasluih bu pasyakat, dibayahnaman dai, kauhmak wanilang yakat dikih diawa dini balna kidika bitik duduwa dai: asna kanin balna bik duduwadai, dawak dibanghwas dai kalnina#Dt 8:2-4. balna bik.
22“Witingna tingnina yakat dianaman dai king balna, dawak sau muihni balna bik, dawak yaninamak balna bik sahyakta dianaman dai, kaput laih, witingna yakat dianaman dai Hesbón, king Sehón sauni dai kidika, dawak Basán bik, king Og#Nm 21:21-35; Dt 2:26—3:4. sauni dai kidika. 23Dianaman, walaninabis mahni duna atnin, makau yala mahni kapat,#Gn 15:5; 22:17; Dt 1:10. dawak duyawa panina dianaman, muihnina-bararak#Jos 3:14-17. balna kau dianin pramis yamnaman dai kidika. 24Dawak, witingna uiwi kawi, Canaán sauni kidika dakyakwi duduna dai, witingna niningnayakat kidika sauni muihni balna, sau kau bubukna dai, kaputbik laih kingnina balna dawak kidika sauni muihni balna kidika witingna tingnina yakat ānaman dai, ais diyamkih#Jos 11:23. kidika diyamna atnin. 25Kaput bik laih, tawan daklana pararasni balna dai kidika, dawak sau didahnin yayamni balna dai kidika bitik duduna dai, kaput bik ū tanit yayamni balna dai kidika, was pa kuhrna yayamni balna, wain yamak, olib yanimak balna, dawak pan minikyang yayamni balna dai kidika bitik, kakasna dai dukih yakat, disalana, dawak minikun#Dt 6:10-11. talnin lani dutaman kidika yamni ilpni duduna dai.
26“Kauna, yul dakakawas dai, man namang yakat yaklalauna, dawak lāma balna bik dauh yayamna. Baisa minit yakat, man pramapit balna bik ihina, kat dutnina kidika lāih yakwi diyuyulna dai bahang, man yakat wiryaklawi uina atnin, dawak man namangkauh dutni nuhni palni yaklalauna dai. 27Kidika bahang, waihla tingni yakat ānaman dai, dawak ditataihna. Usnitkat, kulninna bukna, dawak man yakat ilp yuyulna, dawak man, minikun talnin lani nuhni dutaman bahang, makau kisang kaupak didakanaman dai; ahal dianaman dai, dilaihwi yakna atnin ditaihyang muihni balna kaupak.
28“Kaput kauna, witingna kulnin aslah lani kidika apis yamni dawak, watwi dutni yayamwadai man namang yakat; kidika bahang datang kat waihla tingni yakat bukna, dawak kidika muihni balna yaklauwi tataihna. Usnit kat, watwi man yakat ilp yuyulna dawak man minikun talnin lani nuhni dutaman kidika kau, makau kisang kaupak didakanaman dai, dawak wat wat bik dilaihta yaknaman.#Dt 32:15-43; Jue 2:11-16. 29Yul disumaltaman dai, man lāma yakat yamna atnin, kauna witingna kukulwa kidika manah aitani kukulna dai, kaput bahang man lāma balna kidika kukulwasdai; dawak kaput bik daukakalwa dai man lāma kidika wais laihwi yamwak sangnika kalawa lani kidika;#Lv 18:5. kulninna dutni dai, dawak bik dadasni balna dai, bahang yulma dakawas dadana. 30Kurih mahni witingna niningnayakat kulnam laihwatnaman, man spiritma munah disumalnaman, dawak pramapit balna munah bik; kauna yul dakakawas dadana#2 Re 17:13-18; 2 Cr 36:15-16; Zac 7:12. kidika bahang sau muihni balna parasni duduwa tingnina dinit yakat ānaman dai. 31Kaput kauna, kulnam minikun talnin lani nuhni dutaman kidika kau bitik laih didaukaltasman dai, dawak bik ruhmta datasman dai; kat man laih Papang as kulnam yudutni ki, dawak bik minikun talnin kidika dutaman bahang.
32“Kaput bahang, Mapapangki, Papang nuhni, parasni dawak yamadangniman, pramamis dawak dalani kidika ban dutaman, dauh kapat talwinih, makingki balna yakat di dis kalahna kidika, tunan muihni balna yakat bik, sumalyang balna yakat, dawak pramapit balna yakat bik, dawak kaput bik mamuihki-bararak balna kau kalahna dai yakabik, tawan balna bitik yakat bik, Asiria#2 Re 15:19,29; 17:3-6; Esd 4:2,10. kingni balna dai kaupak warmani kat. 33Kaput kauna, man laih dutni as bik yamtasman, maisihni disman, di balna bitik kau yangna yakat yanakalahna kidika; man laih di balna kidika barangni yamnaman, kauna yangna laih dutni yamnayangna. 34Yangna kingkina balna, tunan muihni balna, sumalyang balna, muihkina-bararak balna dai kidika bik, man lāma kat yayamwas dadana, dawak yulma balna bik dakawas dadana witingna yakat isningna pakta diyulnaman dai kidika. 35Nawatkauh laih, witingna saunina yakat di yamni manas duainaman dai kidika, nuhni bik dianaman dai, sauni kidika didahnin yamni palni dai dianaman kidika, kauna man yakat ayangma nuhni yamwas dadana, dawak dutni yayamwa kidika bik dadawas dai.
36“Warmani yanatalah, yangna muihkina-bararak balna kau sau dianaman dai yakat warmani yangna warau lani yakat yangna, kidika sauni munah di yakwi kasna atninna dai kidika. 37Di minik dahni kalahwa kidika laih king balna dinina, yangna dutkina yaklauwi laih kaput yamna, dawak yangna mikitna yakat ilnaman. Yangna dawak, tingkinalau balna bik, witingna ting ais yamnin kukulwa yakat yayamwi. Kidika bahang uba kulnikna bukna.”
Tawan pranimis, la yakat yamna atnin
38 # libitna adika karak 10:1-40 hibru kau ulna kidika karak. Kidika bitik yakat, yangna pramis yamtayangna parasni, wauhtaya kau ultik, dawak wauhnitaya kidika, takina tuna balna, libait balna dawak sumalyang balna karak ayangnina uhulna.
Currently Selected:
Nehemías 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
