Mark 9
9
1Jisas yaklauwi aput bik diyulna:
—Barangni manayultayang akat bang-adika kaupak buas balna kidika laih dadauwas karangki, Papang king kāwi sauni kidika parasni karuk kaiwak talwi kat dadauwarang ki.
Jisas muihni nuhni satuk kalna kidika
(Mt 17:1-13; Lk 9:28-36)
2Ma tiaskauas bayakwak usnit kat, Jisas laih asang maluihni as kau kiuna dai, kidika yakat Pita, Jims dawak Jan kidika balna manah diduwi kiuna dai.#2 Pi 1:17-18. Kidika pāni yakat witingna muhnina yakat, Jisas muhni pīsni kidika satuk kalnadai. 3Prakni kidika laih yaringni pihni kalna dai muih as di suhwi pihni dawa kapat bik awas. 4Dawak Elías dawi Moses kidika bik Jisas karak yulbauwabangkat tatalna dai. 5Pita yaklau Jisas yakat kalyulna:
—Sumalyang, ¡yamniki mayang akat bangmayang adika! Ū binina bas pakdarangki: man dima as, Moses dini as dawak Elías dini as.
6Kat disaipil balna kidika laih muihsakdauna bangdai, dawak Pita laih witing ais yulninpa amanglawasdai. 7Kidika minitni yakat, mukus as witing minityakat kaiwi bukna dai. Dawak mukus paskaupak yulni as aput yulna dai: “Adika ki yang walakibis dalani kidika:#Mt 3:17; Mk 1:11; Lc 3:22. dakanauh.” 8Kidika minitni yakat, yaihnitna yakat tatalna mani kat, muih as bik disdai witingna karak, kaunah Jisas manah sakdai.
9Asang kaupak yaklakwabangkat, Jisas yaklau diyulna dai witingna ais tatalna kidika muih as kau bik yulnin awas, muih Walanibis al kidika watwi yaklauwarang kat. 10Kidika bahang kidika yulni kidika witingna pasyakat manah dudunadai, watwi yaklaunin kidika ais diniyah atwi dakakawadai karang bik. 11Witingna yaklau Jisas yakat kalyulwi dakakana:
—¿Ais yulni la sumalniyang balna yaklau yuyulwih, Elías kauh tatuna kaiwarangki atwa kidika?#Mal 4:5; Mt 11:14.
12Jisas yaklau nangnitnalana:
—Rahm palni Elías kauh tatuna kaiwi, dawak witing di balna barangni yamwarang. ¿Amput dawak ulna balna yakat yulwi, muih Walanibis al dalani wauhwarang, dawak bik muih yaklauwi dauh kalkulwarang ki? 13Kaunah yang lawik manayultayang Elías laih uman kaina, dawak witing yakat amput kalyamkih kidika kalyayamna, ulna balna yakat yulwa kaput ais amput kalkalahnindai kidika kaput.
Jisas yaklau wahmabin asspirit dutni duwa katyamni kalyamna kidika
(Mt 17:14-21; Lk 9:37-43)
14Disaipil balna bangyakat, nawatwi aiwi tatalna, muih mahni awaihdak duwabangdai, dawak lā maestro balna karak yulbauwabangdai. 15Jisas yakat tatalna mani kat, bitik witing niningkauh kiri uiwi kalparaswi yamni tatalna. 16Jisas yaklau diyulwi dakana:
—¿Manna ais yulni yultamanah witingna karak?
17Kidika yakat bangdai kidika kaupak as yaklau yulna:
—Sumalyang, yang walakibis al adika man yakat duainayang, spirit dutni as duwi dawak witing yakat tubi kalyamna. 18Witing angkat angkat sakkarang bik, spirit dutni kidika kallaihwi sau kat kalruhmlakwi; tinpas kaupak luhuswi kalahwi, anani karswi dawak muihni kidika dadasni kalwi. Disaimapil balna yakat diyulnayang kidika spirit dutni kidika yakwi kalana atninna, kaunah sip yakwas dadana.
19Jisas yaklau nangnitlana:
—¡Muih kasak kulnin lani dis! ¿Mampat kat manna karak awakiyah? ¿Mampat mani kat yang manna karak kulnik laihwatkiyah? Muih al wahmabin kidika akat duaitanauh.
20Bahang muih wahmabin kidika Jisas muhni yakat duwi uina. Kaunah spirit dutni kidika Jisas yakat talna mani kat, muih wahmabin kidika sangka dauwi sau yakat bukwi pihrwi tinpas kaupak luhusni manah yakna dai. 21Jisas yaklau wahmabin papangni yakat kalyulwi dakana:
—¿Mampat kaupak adika dini kallaihnayah?
Papangni kidika yaklau nangnitlana:
—Muihbin mani kaupak. 22Dawak ma mahni kidika spirit dutni yaklau kuh pasyakat dawak was pasyakat bik ruhmana, īna atnin yulni. Kaput bahang, man di as yamnam sipman kat, yangna yakat miknakun yanatala ilp yanatah.
23Jisas yaklau kalyulna:
—¿Amput ais ‘sipman kat’? ¡Di bitik kau sipki angdika muihni rahm kulwa kidika!
24Bahang muih wahmabin papangni kidika sarahna:
—Yang rahm kultayang. ¡Ilp yatangkat kasak kulnin kidika baisa dukuh!
25Jisas talwakat muih balna kidika mahni kalududuhwa kat, spirit dutni yakat bilwi aput kalyulna:
—Spirit tubi dawak tappuk, yang lawik mayultayang adika wahnimabin kaupak alahwah dawak witing yakat watta āwanam awaski.
26Spirit dutni kidika sarahna, dawak wahmabin kidika watwi sangka dauna. Usnit kat witing kaupak kalahwi sihm dauna kapat kaldana dai, muih mahni yuyulna dai, rahm dauna. 27Kaunah Jisas yaklau tingni yakat laihwi dulauna; dawak wahmabin kidika laih kalni kau yaklauwi atakna dai.
28Usnit kat Jisas ū as kau kana, dawak disainipil balna yaklau witing alas sakkat kalyulwi dakakana:
—¿Ampadawak, yangna laih spirit dutni kidika sip kangtik yaktasyangna daih?
29Dawak Jisas yaklau nangnitnalana:
—Adika satni walanisa laih makat yulnin#9.29 Tingkau ulna balna buas kidika laih aput minitlalakwi: dawak yuh wauhnin kidika. kau manah sipki kangwi yakna atnin.
Jisas witing daunin yulni wat bu yakatyulna kidika
(Mt 17:22-23; Lk 9:43-45)
30Witingna kidika kaupak kalahwi uina mani kat, Galilea munah bayayakna dai. Kaunah Jisas witing dukih kalawasdai muih as bik amanglana atnin, 31kat disainipil balna yakat disumalwasakdai kidika yulni. Aput diyulwadai:
—Muih Walanibis al kidika laih muih balna tingnina yakat kawarangki dawak ihiwarangki; kaunah ma bas kat watwi yaklauwarangki.
32Witingna laih sip amanglalawasdai diyulwa yulni kidika, dawak bik kalyulwi dakana atnin yamaniduduwadai.
¿Wais kidika baisa tanit nuhnikalkulnayah?
(Mt 18:1-5; Lk 9:46-48)
33Capernaum tawanni nuhni yakat uiwi kakanadai. Uman ū yakat bangkat Jisas yaklau diyulwi dakana:
—¿Ais yulni kat yultamanah tapas yakat?
34Kaunah witingna laih ap dadana dai, kat tapas yakat yulwīnah aina kidika laih, wais kauh tanit nuhni karangpa, kidika yulnibabauna dai.#Lc 22:24. 35Bahang Jisas laih yalahwi disaipil balna 12 yakat diyulwak aiwak diyulna:
—Angdika muihni tatuna atnin kaldakawa kidika laih, bitik pasyakat witni yakat atninki, dawak bik muih balna bitik yakat dinina yamna atninki.#Mt 20:26-27; 23:11; Mk 10:43-44; Lc 22:26.
36Usnit kat witingna bangkidika papusyakat muihbin as lakna, dawak tingni yakat dulauwi duwi, aput diyulna:
37—Angdika muihni kat yang ayangki usnit yakat muihbin as duwarang kidika, sihm adika apat, kidika laih yang yakat yaduwi; dawak angdika muihni yang akat yaduwa kidika laih, yang akat manah yaduwaski, kaunah yasihna muihni yakat bik duwi.#Mt 10:40; Lc 10:16; Jn 13:20.
Angdika muihni mayang maniking yakatawas kidika laih, mayang ma ilpki yakat sakki
(Mt 10:42; Lk 9:49-50)
38Jan yaklau kalyulna:
—Sumalyang, yangna muih as talnayangna man ayangma kau duwi sitan balna yakat kangwi yakwakat, kaunah mayang kaupak awas kidika yulni, yamnin awas kalyulnayangna.
39Jisas yaklau nangnitnalana:
—Yamnin awas kalyuyulwinih, kat angdika muihni yang ayangki kau duwi taldas dini yamwarang kidika, usnit akat yang akat dutni yayulwas karangki. 40Angdika muihni mayang maniking yakat awas kidika laih, mayang ma ilpki yakat sakki.#Mt 12:30; Lc 11:23. 41Wais wais manna yakat was manah bik sutak as mananawarang kidika Krais dinimana kidika yulni, barangni manayultayang kidika muihni laih warkni minit duwarang ki.#Mt 10:42.
Dutni yakat buknin yamadangni kidika
(Mt 18:6-9; Lk 17:1-2)
42“Angdika muihni yaklau adika dibinina yang akat rahm yakukulwa balna yakat dutni diyamwakat bubukwarang kat, yamni karangki dinimak yakat kipala nuhni as kau sitwi kuma yakat ruhmana atnin. 43Tingma kidika dutni yakat malaknin yamwakat, dakpamtah; baisa yamniki sangka atnin yakat tingma nakas dis āwama kat dawak tingma nabupak karuk piwas atnin kuhni yakat yawama karak dawakat.#9.43 Tingkau ulna balna buas kidika laih aput minitlalakwi S.d. 44: Kidika pāni yakat laih babil balna kidika dadauwas ki dawak kuh kidika bik piwas ki.,#Mt 5:30. 45Dawak kalma kidika yaklauwi mayamwakat dutni yakat buktaman kat, dakpamtah; baisa yamniki kalma nakas dis sangka atnin yakat āwama kat, dawak kalma balna bupak karuk kuh yakat maruhmwarang karak dawakat.#9.45 Tingkau ulna balna buas kidika laih aput minitlalakwi S.d. 46: Kidika pāni yakat laih babil balna kidika dadauwas ki dawak kuh kidika bik piwas ki. 47Dawak mamakpa kidika yaklau mayamwakat dutni yakat buktaman kat, yakpamtah; baisa yamni karangki mamakpa aslah karak Papang king kāwi sauni yakat āwama karang kat, dawak mamakpa bupak karuk kuh yakat maruhmwarang karak dawakat,#Mt 5:29. 48Kidika kuhni banibil balna sip dadauwas kidika dawak bik sip piwas kidika.#Is 66:24.
49“Kat bitik kau kuh kau wilamni yamna karang.#9.49 Tingkau ulna balna buas kidika laih aput minitlalakwi: dawak sakripais yamnin dini balna bitik kidika laih kuma āna karang. 50Kuma kidika laih yamniki; kaunah wilamni dis dawa laih, ¿manna amput watta dutanamayah?#Mt 5:13; Lc 14:34-35. Manna muihmana yakat kuma dutanauh dawak biri biri kulnin aslah lani kidika duta yalahtanauh.
Currently Selected:
Mark 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
