Matyu 23
23
Jisas yaklau parisi muihni balnadawak la sumalniyang balna yakatyulnina yakwi
(Mk 12:38-40; Lk 11:37-54; 20:45-47)
1Kidika usnit kat, Jisas yaklau muih balna yakat dawak disainipil balna yakat diyulna: 2“Lā sumalyang balna dawak parisi muihni balna kidika laih Moses lani tannika balna kidika yakwi yuyulwi. 3Kaput bahang, manna witingna yakat yulnina daka ais manayuyulwa kidika yamtanauh; kaunah witingna ais yayamwa kidika laih yayamwinih, kat witingna laih di as yuldawi satuk yayamwi. 4Witingna laih di as turuknin dini sip awas kidika sitwi muih uk balna kidika salahnina yakat ihilwi, kaunah witingna laih tingnina bikisni kau bik sukninna kukulwas ki. 5Witingna laih di bitik yayamwi muih balna kidika ditalna atnin yulni.#Mt 6:1. Witingna laih ulna wauhnitaya panunuhni nanaini balna kidika muhnitna yakat dawak tingnina yakat bik duwi uinin dukih diawi,#Dt 6:8. dawak praknina yakat ulna nunuhni kidika bik akih diawi.#Nm 15:38. 6Manna laih kasnin dini balna tanit yayamni kidika dawak rispik sinini balna kidika bik Papang yulni sumamalwa ūni balna yakat dunin kultamana, 7dawak bik dukih manawi muih balna kidika yaklau rispik karuk manaparaswi sumalyang balna manatwa kat dakanin kultamana.
8“Kaunah manna laih muih balna kidika yaklau sumalyang balna manatwa yakat dakanamna awas ki, kat manna bitik kau laih kalwirah manah mana dawak Sumalyang laih aslah dutamana. 9Dawak manna lawa sau yakat muih as kau bik papang kalatwinih, kat manna laih Papang aslah dutamana: kisang kau sakkidika. 10Dawak tatuna kayang balna manatwak bik dakanamna awas ki, kat Krais manah aslah ki Tatuna Kayang kidika laih. 11Manna paskaupak baisa nuhni kidika laih witing yaklau muih uk balna yakat dinina yamnin ki.#Mt 20:26-27; Mk 9:35; 10:43-44; Lc 22:26. 12Kat angdika muihni kat witing alas nuhni kaldakawa kidika laih, sau yakat bukna karang ki; dawak angdika muihni kat sau kau kaldakawa kidika laih, nuhni kalyamna karang ki.#Pro 29:23; Lc 14:11; 18:14.
13“¡Lā sumalniyang balna, parisi muihni balna dawak sins dis muihni balna manna laih dutni palni awanama!, Papang king kawa sauni durni puttamana kidika muih uk balna kaninna awas yulni. Dawak manna kat bik awasmana, dawak muih uk balna yamkih diawa yakat bik didatanang kat kakawas ki.#23.13 Tingkau ulna kidika minitkau lakwi S.d. 14 kidika: ¡Alakaih manna, lā sumalniyang balna, parisi, muih kau daukaltaman!, ais yamta tingmak balna dinina dakyaktamana, muih amanglanin awas yulni naini mamatna yultamana. Kidika bahang tanit wah dutanama.
15“¡Alakaih, lā sumalniyang balna dawak parisi muihni sins dis balna!, sau yakat dawak kuma yakat awaihtamana kidika kaluduhna as win kalnin yulni, dawak kidika win kalnamana mani kat, kidika kaupak muih as wat bu praisni kuh dini yamtamana manna karak dawakat.
16“¡Alakaih manna mamaknapa dis tatuna awamana kidika!, aput yultamana kidika: ‘Angdimka muihni kat makat yulnin ūni yakat yulwi pramis yamwa kidika laih, di as kau bik pramis yamwas ki; kaunah makat yulnin ūni golni yakat yulwi pramis yamwa kidika laih takat pramis yamwi.’ 17¡Sins dis dawak mamaknapa dis muihni balna! ¿Angdika kauh tanit nuhniyah: gol kidik awas kat makat yulnin ūni yaklau gol yakat Papang dini yakwa kidika kauh? 18Aput bik manna yultamana: ‘Angdika muihni kat sakripais busnin pani yakat yulwi pramis yamwa kidika laih sakripais yamwas ki; kaunah sakripais busnin pani minit kau minit dis kalanin dini balna bangyakat yulwi pramis yamwa kidika laih takat pramis yamwi.’ 19¡Mamaknapa dis muihni balna! ¿Angdika kauh baisa nuhni kalkulnayah: minit dis kalanin dini kidika kidik awas kat sakripais busnin pani yaklau minit dis kalanin dini yakat Papang dini yakwa kidika kauh? 20Angdika muihni kat sakripais busnin pani yakat yulwi pramis yamwa kidika laih, kidika yakat manah yulwi pramis yamwas ki, kaunah kidika minit yakat di bangkidika yakat bik yulwi pramis yamwi; 21dawak angdika muihni kat makat yulnin ūni yakat yulwi pramis yamwa kidika laih, makat yulnin ūni yakat manah yulwi pramis yamwas ki, kaunah kidika yakat Papang sakkidika yakat bik pramis yamwi. 22Dawak angdika muihni kat kisang yakat yulwi pramis yamwa kidika laih, Papang tronni yakat#Is 66:1; Mt 5:34. Papang sakkidika yakat pramis yamwi.
23“¡Alakaih, lā sumalniyang balna dawak parisi muihni sins dis balna!, Papang yakat menta dawak cumino minik balna sahyakna salap kalatamana kidika,#Lv 27:30. kaunah lā tanit nuhni sumalna yakat laih barangni kultasmana, barangni lani, dalani lani dawak barangni laihwi yamnin lani kidika yakat bik. Uk balna yamtamana kidika pasyakat, adika ki manna yamnamna dini kidika laih. 24¡Manna tunan duyang muihni mamaknapa dis balna, markisah kidika laih datanangkat bayakwi, kaunah kiamil kidika laih dalpamtamana!
25“¡Lā sumalniyang balna, parisi muihni sins dis balna!, sutak dawak di lakwi kasnin dini kidika yakat laih dangni manah suhtamana kidika, kaunah di malta lakta kastanang kat paskau taski laihna kidika laih klin yamnamna kultasmana. 26¡Parisi muihni mamakpa dis: sutak kidika paskau kidika tatuna klin yamtah, kaput laih dangni kidika klin kalwarang ki!
27“¡Lā sumalniyang balna, parisi muihni sins dis balna!, sihm sau ū balna kat ahni kaupak yamni pihni yamna kapat kidika,#Ap.w 23:3. kaunah paskau kidika laih muih dadauna wakalni balna dawak di maisihni dini balna mahni bangkidika kapat ki. 28Manna laih kaput mana: ahni kaupak laih muih yayamni kapat mana, kaunah paskaupak laih dutni mahni palni dutamana.
29“¡Lā sumalniyang balna, parisi muihni sins dis balna!, prapit balna saunina ū yamtamana kidika dawak muih bararangni balna saunina ū yamni laihta yamtamana kidika, 30dawak usnit kat yultamana: ‘Mayang mamuihkibararak balna manina yakat yalahnamayang dai kat laih, prapit balna yakat īdi ilp diadas kit dai.’ 31Adika karak laih manna silp kalamanglatamana, manna laih prapit balna yakat ihīna kidika balna sulaninamana kidika. 32¡Bahang manna muihmanabararak balna ais yayamna kidika witni kat yamta saran laihtanauh!
33“¡Bil balna! ¡Bil sulani balna!#Mt 3:7; 12:34; Lc 3:7. ¿Amput kuh daihni wauhnin kidika kaupak ira lawanamayah? 34Kidika yulni prapit, sins duyang dawak sumalyang balna manasihki ki. Kaunah witingna kaupak buas kidika yakat laih īta ilta patanama, dawak uk balna kidika laih Papang yulni sumamalwa ūni balna yakat dalani diatanama dawak tawan uk kaupak tawan uk kat bik uita yawanama. 35Kidika bahang manna mamatna yakat wah kidika bukwarang ki muih al barangni Abel#Gn 4:8. mani kaupak Berequías walanibis al Zacarías#2 Cr 24:20-21. yakat manna lawa holi pani dawi sakripais busnin pani kidika walsah kau īnamana kidika mani kat. 36Barangni manayultayang adika yulni wah kaiwarang kidika laih warmani muihni balna kidika minitna yakat bukwarang ki.
Jisas Jerusalén yulni kaidi
(Lk 13:34-35)
37“¡Jerusalén, Jerusalén, prapit balna yakat ītaman kidika#1 Re 19:10; Jr 2:30. dawak Papang yaklau yul muryang muihni balna bik masihwa kat kipala kau dibahrtaman kidika! ¡Wat yapak man walamibis balna kidika yakat uduhkuh atyang daih, sihm sakara yal kat lawani dinit yakat walanibis balna puwa kapat, kaunah man laih yultas danaman dai! 38Bahang talnauh, manna ūmana kidika laih ruhmwi dana karang ki; 39dawak manayultayang, adika mani kaupak laih, watta yatalas awanama ki, aput yultanama mani kidika kat laih yatalnama ki: ‘¡Dawan ayangni kau duwi kaiwa kidika laih ayangni nuhni yamna karang!’ ”#Sal 118:26.
Currently Selected:
Matyu 23: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
