Matyu 22
22
Marit kasnin alasnina malni yulni
(Lk 14:15-24)
1Jisas yaklau watwi malni yulni balna kau yul dibauna dai. Aput diyulna:
2“Papang king kawa sauni kidika laih sihm muih al as walanibis al marit kalahwa kat kasnin alasnina yamna kapat ki. 3Witing dini yamyang balna yakat sihna muih yuyulwa kat aina atninna, kaunah kidika muihni balna laih uiwas dadana dai. 4Watwi dini yamyang balna uk sihna, aput diyulwinah: ‘Ainin muihni balna yakat diyultanauh kasnin dini kidika laih uman ridi yamnayang. Yang tukiruh balna dawak tingkilau balna salalani kidika īna atnin sihnayang, bahang di balna bitik laih ridi ki; kasnin alasnina yakat aiwang.’ 5Kaunah uinin muihni balna kidika laih dakawas dadana dai. Witingna kaupak as kidika laih sauni balna yakat kiuna dawak uk kidika laih witing lalahni warkni balna yakat kiuna dai, 6dawak uk balna kidika laih king dini yamyang yakat laihwi dutni kalyamwi ihīna dai. 7Bahang king laih uba palni kulnin daukalna, dawak witing soldados balna duwa yakat dipakna kidika muih īyang balna yakat laihwi īna atninna dawak tawannina kidika bik busna atninna. 8Usnit kat dini yamyang balna yakat diyulna: ‘Marid yakat kasnin dini kidika laih di bitik ridi ki, kaunah ainin muihni balna kidika laih aininna awasdai. 9Bahang manna ta balna nunuhni yakat yawanauh, dawak muih yapak kalpaktanama kidika balna bitik yultanang kat kasnin alasnina akat aiwang.’ 10Bahang di yamyang balna kidika laih ta nunuhni balna yakat kalalahna dawak muih yapak kalpapakwa kidika bitik ududuna, muih dudutni dawak yayamni bik; dawak kaput laih ū paskau ahni panuhni kidika muih manah bung dana dai.
11“King witing muih diyulwakat uina balna yakat talna kana mani kat, muih as kidika laih marit prakni dis kiuna dai. 12Aput kalyulna: ‘Yang karak kaltalyang yamni, ¿amput awanamahn akat, man marit prakni dis aiwanaman kat?’ Kaunah uk kidika laih ap dana dai. 13Bahang king yaklau diyulna tibil yakat di lalakwa muihni balna yakat: ‘Kalni yakat dawak tingni yakat bik sitta ahni puksani yakat ruhmyaktanauh. Bahang kaput laih kaidinin lani kidika dawak ananina karksnin lani kidika kaiwarang ki.’#Mt 8:12; 25:30; Lc 13:28. 14Kat mahni palni kidika laih diyulwa kat uina ki, kaunah walwi yakna balna kidika laih bulah palni ki.”
Tunan minit daknin yulni kidika
(Mk 12:13-17; Lk 20:20-26)
15Kidika usnit kat, parisi muihni balna laih uiwi yulbauwi tatalna Jisas yakat yul as kalyuyulwa kat ais yulwa kat kidika kau yulni yakna atnin. 16Kaput laih witingna kaupak muih buas dawak Herod kaupak muih buas yakwi libitwi sisihna dai, uiwi aput kalyulna atninna:
—Sumalyang, yangna yamni nuyangna man laih yul rahm yultaman kidika, dawak man laih muih balna yuyulwa yakat dakas Papang yaklau amput yalahnin yulwa yakat sumaltaman kidika bik yangna nuyangna, kat man laih muih muhni yakat talas la yamtaman. 17Bahang man kulnam lani kidika yanatah: ¿Roma dini tunan minit dakwa muihni yakat lautik kalanikna kidika yamniyah, kidik awas kat dutniyah?
18Jisas laih witingna kulninna lani dutni duduwa kidika amanglawi aput diyulna:
—Sins dis muihni balna, ¿ais yulni manna yang yalaihnin dini atamanah? 19Tunan minit launin lalahni dadasni kidika nikingkatanauh.
Dawak lalah as duaiwi kalalana, 20dawak Jisas yaklau nangnitnalana:
—¿Adika wais muhniyah dawak ayangni ulna kidika laih wais ayangniyah?
21Witingna yaklau nangnitlalana:
—King tanit nuhni kaupak.
Bahang Jisas yaklau diyulna:
—Bahang tunan minit dakyang tanituna dini kidika witing yakat kalatanauh, dawak Papang dini kidika laih Papang yakat kalatanauh.
22Kidika yulni dakakana mani kat, yamni dakawi dapamwi uina dai.
Watwi yaklauna atnin yulni kidika
(Mk 12:18-27; Lk 20:27-40)
23Sihm kidika mani, saduceos muihni balna buas Jisas yakat talna uina. Saduceos muihni balna laih yuyulwi muih dadauna balna kidika laih watwi yaklalauwas karang ki;#Ap.w 23:8. kaput bahang adika yulni kidika witing yakat duwi uina dai:
24—Sumalyang, Moses yaklau yulna muih al as witing walanibis dis dauwarang kat sipki witing wirahni al kidika yaklau yal tingmak yakat duwi walanibis kalana atnin wirahni dauna kidika pani yakat.#Dt 25:5. 25Bahang wat as kat yangna paskingna akat kalwirah ahal tiaskaubu bangdai. Tatuna kidika laih yal duna usnit kat dauna. Walabis dis dai bahang, witing tingnimak kidika laih wirahni al usnit kidika duna dai. 26Usnit kidika bik sihm kaput kalkalahna dai, dawak usnit kat bas kidika yakat, dawak kaput manah kalwirah ahal tiaskaubu kidika yakat dikalahna dai. 27Kalwirah ahal balna kidika dadauna usnit kat yal kidika bik dauna dai. 28Bahang yamni, yaklauna atnin mani yakat, ¿kalwirah ahal tiaskaubu kidika balna kaupak angdika kauh witing yalni karangyah, witingna bitik kidika yalni karak kalduduna dai kat?
29Jisas yaklau nangnitnalana:
—¡Manna laih rahm palni tunamana balakna, Ulna wauhnitaya kidika dawak Papang parasni amanglatas mana kidika yulni! 30Muih dadauna balna kidika watwi yaklalauwarang mani kat, muih ahal dawak yayal balna kidika laih kalduduwas karang ki, bahang witingna laih sihm kisang kau insal balna bangkidika kapat karang ki. 31Dawak muih dadauna balna yaklalauwa kidika niningkauh laih, ¿manna baisa yulta talas manah Papang witing palni aput yulna kidika: 32‘Yang kuduh Abraham, Isaac dawak Jacob Papangniyang kidika’?#Ex 3:6. ¡Dawak Papang laih dadauna balna Papangni awaski, kaunah sangka balna kidika Papangnina!
33Jisas yulwi sumalna yulni kidika muih balna dakakana kat yamni palni dakakana dai.
La as baisa tanit nuhni kalkulna kidika
(Mk 12:28-34)
34Parisi muihni balna laih Jisas yaklau saduceos muihni balna yakat diyamwakat ap dadana kidika dakakana kat, witingna kalududuhna dai, 35dawak witingna kaupak as lā sumalniyang dai kidika laih Jisas yakat dutni kalyamna atnin yulni aput kalyulwi dakana:
36—Sumalyang, ¿lā pasyakat angdika lani kidika kauh tanit nuhni kalkulnayah?
37Jisas yaklau nangnitlana:
—‘Man Papangma Dawan yakat ismang, sangmaka dawak kulnam bitik karak dalani kaltalah.’#Dt 6:5. 38Adika ki baisa tanit nuhni dawak tatuna kidika la balna yakat. 39Kaunah kidika kaupak usnit yakat uk as sak ki, sihm kapat as; kidika laih aput yulwi: ‘Man wanaihma yakat dalani talah sihm man muihma dalani talaman kapat.’#Lv 19:18. 40Adika lani balna bu adika laih lā bitik yakat dawak prapit balna sumamalna kidika yakat bik kawi.#Lc 10:25-28.
¿Mesías kidika wais sulani kaupakkalahnayah?
(Mk 12:35-37; Lk 20:41-44)
41Parisi muihni balna laih baisa kaluduhna bangkat, 42Jisas yaklau diyulwi dakana:
—¿Manna ais kultamanah Mesías kidika yulni? ¿Wais sulani kaupak kaikalahwih?
Witingna yaklau nangnitlalana:
—Devid sulani kaupak kaikalahwi.
43Bahang Jisas yaklau diyulna:
—¿Bahang amput kat Devid witing Spirit yakat Dawan kaltih? Kat Devid yaklau yulna:
44‘Dawan yaklau Dakiwan yakat kalyulna:
Yang tingkipal niningyakat yalahtah,
yang lawik man namangkauh yaklalauwa muihni balna kidika
man klma dinit yakat aki mani kat.’#Sal 110:1.
45¿Amput dawakat Mesías kidika Devid sulani kaupak kalahwarangyah, Devid yaklau Dawan kaltakat?
46Muih as bik nangnitlawas dai, dawak kidika mani kaupak muih as bik witing yakat yulwi dakanin yulni kalyulwi dakawas dai.
Currently Selected:
Matyu 22: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
