Lamentaciones 2
2
Kaidana bu kidika
1¡Dawan kulnin daukalna kidikanuhni palni dai,
Sayan yaksihni kidika puksani kalna!
Israel nuhni yaksihni kidika tukwi lakna
makau, kisang kapat kidika sau akat;
kulnin daukalna mani kat isningkatwas dai,
witing kalni taihwa kidika.#2.1 Witing kalni taihwa kidika: Jerusalén kau makat yulnin ūni kidika.
2Dawan yaklauwi kasakni lani dawaski
Jacob ūni balna kidika as bik;
kulnin daukalwak bahwidis dawaski
Judá kau kalbaunin ūni pararasni balna kidika;
kulninna sau yakat lakwi, saukat tukwi lakna,
king balna dawak kabamint balna kidika.
3Kulnin daukalwak dakpamna
Israel parasni bitik kidika.
Witing parasni nuhni kau ilpmayawadai kidika dana,
waihla karak kalbaudak;
¡Jacob yakat kuh bibiwak dahlna
bahang kidika laih tanipas yakatdi balna kidika buswi!
4Dawan kidika waihla kapat,
lasni iswi yuna;
waihla as yamwa kapat;
mamikpa yakat di yamni taldadai kidikadaukalmukna,
kuhpau as kapat, kulnin daukalna kidikakalawak kaina
Sayan ūni labanni minityakat.
5Dawan laih waihla kapat di yamna;
Israel kidika bitik palni laihbahwidis yamna;
kingni ūni balna dai kidika bitiktukwi lakna;
kalbaunin ūni pararasni balna daikidika bik,
Judá yaksihni dai kidikaminit bayak kalana,
kulnin buknin kidika wat wat kalana.
6Di malyang as kapat
makat yulnin ūni yakat kalbaunin yamna;
kaluduhnin pāni dai kidika bahwidis yamna.
Dawan yaklauwi yamwak Sayan yakatdinitnakahna
alasna yamnin dai kidika dawakyakurupdinin mani.#2.6 Yakurupdinin mani: kidika laih yulwi satadi mani.,#Is 1:13.
Kulnin daukalna kidika yakat,
ruhmwi dana king dawak sumalyang kidika bik.
7Dawan, witing kau sakripais buswapāni kidika bik ruhmwi dana,
witing kau makatyulnin ūni kidika bikdauh kulna;#Ez 24:21.
waihla parasni yakat ana
tawan nuhni daklana kat nanitdakwasak kidika.
¡Dawan ūni yakat muih sararahwi,
alasna mani as kapat!
8Dawan kulnin ridi kalahna tuklakna atnin
Sayan kau daklana balna kidika.
Amput bahwi disyamnin kidika kulwi dana ki,
dawak yakurupdas yamna ki witni kat.
Daklawi awaihna balna kidika witing yaklauwi
kalawak kulnin bukna yamna,
dawak kidika balna bitik laihpapatni sau kat aiwi bubukna.
9Tawan nuhni kidika putnin dūrni diskidawak ki ānin bik diski;
¡bahwi sau yakat ruhmwi dadana!
Kingni balna dawak kabamintni balna kidika laih
Dawan kukulwas balna pasningna yakat ki;
Dawan lāni kidika diski.
¡Prapit balna bik diski
amana kapat tatalwa balna kidikaDawan kaupak!#Sal 74:3-9; Ez 7:26.
10Sayan yaksihni sumalniyang balna kidika
sau yakat ap dawi yalalahwi,
sau yahamni kidika tunanina yakat uhuhwi
asna babahni balna kidika kakawi.
Jerusalén wawahnima balna kidika
laih abubukwi tunanina kidika sau kat.
11Kaidinin kidika mikpa balna karakdahn yamwi,
dawak kaldakayang, paski adika tutwi;
kulnik kidika sau kat kaiwi bukna
yang muihki balna tawannina nuhni kidika
daukalna yakat talayang kat,
talingkat muihbinina ta susuwa balnakidika bitik
ta pasyakat yuh dadauwi.
12Walabis binina kidika nanangnina yakatdiyuyulwi:
“¡Wain dawak plawar busna kidika bik dismayang!”
Isparah didakwak bubukwa kapat bubukwadai
tawan nuhni tanipas balna yakat,
wingninata laihwatwak,
nanangnina balna tingnina yakat.
13¿Ais dini karak sipyah malibitnik,
Jerusalén nuhni yaksihni?
¿Ais kidika karak sampla libittikwalama akiyah,
Sayan tawanni nuhni yaksihni?
Daukalnaman kidika laih nuhnisihm kuma kapat kidika;
¿wais sipyah dalani kidika dis yamwi manin?
14Pramapit balna amana kapat talwimayuyulwa dai kidika,
laih alas manah dai.
Man dutma kidika lāih yayakwasdai
suermati kidika satuk wirlana atnin;
amana kapat talwi alas mayuyulna,
dawak man laih mayayamwa kidika yakatrahm kulnaman.#Jr 5:31; 23:25-27; Ez 13:10.
15Ta yakat uiwa balna kidika matatalwi
tingnina tiswi sarahwi yayamwi;
sarahni yamwi kung wiuhwitunanina labahn labahn ahawi,
Jerusalén yaksihni dai yakat kalyulwi:
“¿Dawak adikayah tawan nuhni kalyuyulwa kidika
sau akat tanit yaksihni kalyuyulwa kidika?”
16Waihmala balna kidika bitik
tininapas wakakahwi man namang yakat.
Kungwiuhwi, wayani kau bik yayamwi
namangkauh, dawak aput yuyulwi:
“Bitik palni kaldaukalpamna mayang.
Adika mani kuduh uba tahada dai kidika;
¡witni kat sipdai talnin!”
17Dawan witing warkni yamnin dai kidika yamna,
witing yulni balna kidika kat yamna.
Watwat bik muhwi talwas bahwidis yamna
tanit mani balna kau bahwidis yamninkulna dai kidika,#1 Re 9:6-9.
dawakat waihmala kidika namangkarana
dawak waihmala parasni kidika makau dulauna.
18¡Dawan yakat ilp yultah,
Sayan tawanni nuhni yaksihni!#2.18 Yaksihni: kaput kapat wirlana ki. Wirlana ūk yakat laih aput yulwi: ihwi.
¡Datangkat kirang madah dawak pukta
mamakwas kidika!
¡Aidaman kidika dawinih,
mamakpa laih kaida kidika danin awaski!
19Lawa sarahtah pukta balna yakat,
awar balna kaiwi bayakwasak yakat sarahtah;
ismang kidika Dawan muhni yakat yaktah,
dawak datangkat was kapat kirang;
witing yakat bukta tingma kidikayu data yultah
dawak walamabis balna sangninakakidika yultah,
ta balna sipintang balna yakat
dadauwi, di kasnin dis kidika yulni.
20Dawan talah, yul kulta talah,
muih as kau bik baisa kaput yamtasman.
¿Nanang balna kidika,
walaninabis ta bayayahwa kidika
witingna kakaswarang pah?#Dt 28:53; 2 Re 6:28-29; Jr 19:9.
¿Sumalyang balna dawak prapit kidika
man ūma yakat īnin katpah?
21Ta pasyakat bukna bang bang kat
tatalwi wawahma balna kidika
dawak muihbararak balna kidika bik;
wawahkima balna dawak sirarauki balna,
isparah kau dadauna.
Kulnam daukalna dai mani yakat,
dauninna praisni didaknaman dai,
¡wat wat ditalas īnaman!
22Yamadangni kidika kalatang kat
kaina pirini balna bitik kaupak,#Sal 31:13; Jr 20:3,10; 46:5; 49:29.
alasna as kau aiwa kapat;
Dawan, kulnam daukalna mani,
muih as bik sip awas dai kiri yaklanin.
Yang lawik muhnayang, sumalnayang,
kaunah waihla kidika yaklau īna.
Currently Selected:
Lamentaciones 2: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
