Josué 20
20
Israel balna yaklau niningna kakawadai angkat tawanni yak kawi yakmaldinin pāni bangkidika
(Nm 35:6-34; Dt 4:41-43; 19:1-13)
1Dawan yaklau Josué yakat yulkalbauwi kalyulna dai: 2“Israel balna karak yulbauta diyultah tawan nunuhni yakmaldinin pāni balna wal'yakwi duduwang,#Nm 35:6-32; Dt 4:41-43; 19:1-13. Moses munah amput yamnin kalyulna dai kidika kaput. 3Ban bik muih as iwarangkat, dalani kalawi as yakat, kaput witing kulnin lani awasbik, sip karang kidika balna tawannina as kau kiwi yakmaldinin muihni dauna wanaihni kidika yultanang biri kal iwarang awas yulni. 4Wais yakmaldinin pāni walwarang kat kidika tawanni pāni balna dūrni kawa yak kiuna karang dawak ais yamwa likkidika yulwi yakna karang tawan muihni bararak balna yak. Kaput laih sip karang yakat yalahna atnin. 5Muihni dauna wanaihni as yaklauwi uiwi kiwarang kat, muihbararak balna yaklauwi sip kalalawak kawas karang yakmaldinin tawanni nuhni yakat, kat witing yaihnit kau muih kidika as ina pini kaupak, waihla kaltalwas kaunah. 6Kauna yakmaldana muihni kidika laih sakkarangki, tawan balna bitik muhnina yakat lani yayamwarang kat, sumalyang nuhni witing lani yamna kidika dauwarang kat. Kidika usnit kat yakmaldana muihni kidika pani yakat nawatwi kiwarang, yuldarang kat witing tawanni dawak ūni kat.”
7Kaput dawak Israel balna kidika tawan as walwi yayakna dai, yakmaldinin pāni kidika laih Cedes Galilea sauni yak, Neftalí asangni pas balna yak, Siquem Efraín asangni pas balna yak dawi Quiriat-arba, sihm pāni kidi ayangni Hebrón dai Judá asangni pas balna yak. 8Jordán nahas yak Jericó ma kilwa niningyakat Beser kidika wal'yakwi duduna dai, Rubén sulani balna kaupak; Galaad sauni sahyakna pīsni yakat Ramot kidika wal'yakwi duduna dai, Gad sulani kaupak, laih wal'yayakna dai Golán yak Manasés sulani balna kaupak. 9Adika tawanni nunuhni balna kuduh yakmaldinin pani walwi yayakna dai kidika Israel balna bitik yulnina, dawak pa ūk muihni balna yulnina bik, witingna pasningna yakat yalalahwa kidika. Kidika yakat yakmaldinin sipki wais wais muihni iwarang kidika, ting pini yamwas karang bik, kaput laih dauna wanaihni kidika yaklauwi inin awas, tawan yaklauywi kidika muihni lani yayamwas tanit kauh.
Currently Selected:
Josué 20: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
