Job 7
7
1Muih as sangnika kidika laih sau akat,
war kalbauyang muihni as kalbauwa kapat ki,
2warau as masanni yakat kawi wingnita puhwa kapat ki,
kaput bik di yamyang muihni as witing minit dunin tahawa kaput ki.
3Waiku balna kaiwi bayakwasak kidika yakat alas yayuyulwi, bahang kidika pasyakat sangka yalahdayang,
pukta balna kaiwi bayakwa sakkidika yakat dalani wauhtayang.
4Alangwayang, dawakat pukta balna kidika naini dahn kalwas kapat kalwi,
pa yakat piramna manah yasuhwi payahlawakat,
dawakat kultayang: ¿Mampat kat lawakiyah?
5Yang muihki adika dutlawi babil manahki,
dawak ukitak minit yakat dakna kidika surutwi.
6Maki balna kidika dahn kalwi witni yakat mahka kiwi,
tani tahanik as bik diski,
sirihni palni bayakwi kiwi.
7Papang ismang aitah yang sangkika adika, mawingkita puhyakpamda as kapat ki,
alasna kidika wattik dutas awaki.
8Muih as bik watwi yatatalwas karang,
mamakpa kidika yang yakat yatalma, dawakat yang diski.
9-10Sihm mukus as bayakkiwa kapat ki,
muih as sau ū yakat kawi kiwa kidika:
yakaupak watwi nawatwi kaiwas ki,
wanaihni balna bik watwi tatalwas ki.
11Kaput bahang yang sip ap datasyang.
Dalani tapalhni wauhtayang pasyakat
laihwattas yultayang.
12¿Yang adika kuma paskau di anyang dutni kapat
yangkatpa tahata yatalaman kidika?
13Yang kultayang pa yakat alangwaki kat wingkita puhki
dawak makauh yaklauwi dalani balna wauhtayang kidika apis sanwarang kultayang kauna
14mikauhwa pasyakat muihsak kau yaitaman;
¡amana kau bilkilautaman!
15Baisa tanit yamni karang yalaihta yawirbahmakat,
daunin kauh yamni kultayang adika sangnika karak#7.15 Adika sangnika karak: barangni yulnin kat wakalki balna karak. dawakat.
16Baisa sip-awasyang. Baisa sangka atnik kidika dukih yāwaski.
Yadatang kulnik aslah awakuh, yang sangkika laih mawingkita puhda kapat ki.#Sal 144:4.
17¿Muih al kidika aisyah, man lawa tanit nuhni kultaman kidika?
¿Ais yamta witing yulni kulta kalbautaman?#Sal 8:4; 144:3.
18¿Amput dawak ma balna bitik pasyakat tahata kaltalamahn,
dawakat minit bitik yakat traini talamanh?#Sal 17:3.
19¿Ais yamta mamakpa kidika yangkaupak yaktangkat
susuihkiwas manah bik daltasyang?
20Dutni yamki kat, ¿ais as man yakat dutni karangyah,
muih ahal yakat tanina tahawi talyang muihni?
¿Ais yamta yang akat simabang kidika yutamahn?
¿Kaput bahang yang adika man truknam asyang?
21¿Dutki balna kidika datang disnin sip-awasyah?
¿Dutni yamnayang kidika datang sip diswasyah?
Sirihni palni sau yahamni pasyakat awaki:
yawalma, kauna dis awaki.
Currently Selected:
Job 7: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
