Job 5
5
1Sarahta Job, talma wais nangmatlawarang pa.
¿Angdika innisal yakat walmayah?
2Tapahlni kidika laihna atnin, kidika awaskat mamuihki nuhni dukih kalawa yakat laihnin
laih tapadadas lani as ki, bahang daunin yakat duwi kiwi.
3Talnayang dai tapadadas kidika witing dini balna yamni barakwakat,
kauna ūni kidika laih sirihni bahwi uhna dai.#5.3 Sirihni bahwi uhna dai: grik kau laih kaput ulna. Hibru kau laih yulwi yang lawik la tuhnayang.
4Walanibis balna kidika di dianin muih diski,
la uni yakat dutni diyayamna ki,
dawak muih as bik diski tunanina minit yulnin.
5Di minik yayakna kidika, yuhdauwa muihni balna kakasna,
wakal pasmunah yakwi,
dawak dukih diawa muihni balna tutumna ki di manas duduwa balna niningna yakat.
6Dutni kidika sau kaupak pitwi kalahwaski,
dawak makulnik panis kidika bik sau kaupak barakwas ki:
7kulnin panis kidika muih al yaklauwi yamwi,
sihm kuhpau raiwi kalahwa kapat.
8Man wauhtaman kapatyang kat, yang laih Papang yakat nawattik yawaki,
kaput bik yulki balna kidika witing tingni yakat daki;
9¡witing yamwi, di manas dawak taldas dini kidika nuhni palni,
kaput laih muih as bik amanglawas ki!#Job 9:10.
10Witing yaklauwi sau akat was sihwi,
bahang kaput laih sau akat suihwi;
11witing yaklauwi kulninna minikunni balna kidika laihwi dulauwi,
dawak kulninna bukna balna yakat bik pa as yamni diawi;
12witing yaklauwi yamwakat,
kulnin dutni muihni witing warkni balna yamnin kulwa kidika bitik laih dauh kalna ki.
13Kulnin sirihni di kulwa muihni kidika witing yaklauwi laihna ki,#1 Kor 3:19.
dawak yamwakat warkni dutni balna kidika dauh kalwi.
14¡Madah yaringni pasyakat, witingna kau duwi lapapakwi,
puksani dimuklakna ki sihm pukta kapat!
15Papang yaklauwi muih minikunni kidika laihwi yakna ki,
muih dudutni balna tataihwa tingnina kaupak;
16muih parasninadis balna tahahawa kidika laih witing yakat ki,
¡witing yaklauwi muih dudutni balna tininapas putwi!
17Kidika alni alasna atnin ki, Papang yaklauwi bilwa kidika yulni;
parasni nuhni bitik duwa kidika yaklauwi mataihwakat anwinih.#Sal 94:12; Pro 3:11-12; Hib 12:5-6.
18Witing yaklauwi muih as muihni yakat dakwa kidika, kaput bik watwi asna kungni kau sitwarang ki;#Os 6:1.
dawak tingnikau parasni bauwa kidika witing yaklauwi sanni yamwi.
19Wat wat yamadangni kaupak malaihwi yakwarangki,
dawakat dawak man yakat dutni malaihwas karang.
20Yul lakwarang mani yakat, daunin kaupak malaihwi yakwarang,
dawak war kaiwarang mani balna yakat malaihwi yakna karang isparah anan kaupak.
21Muih tunina dutni kaupak naikau mayakwarang ki,
dawakat yamadutas awamaki daukalwi dispamwarang mani yakat.
22Yuh, dawak, dutni niningyakat arama ki,
kaput bik laih di anyang balna niningna yakat yamadutas awama.
23Tamapas yakat kipala balna kidika makapahwas karang ki,
dawak di anyang balna kidika karak kaltalyang alahwama.
24Uma pasyakat baraknin kidika sakkarang ki,
dawak tingmalau balna kidika kulta talang bitik bangkarang ki.
25Man sulama balna kidika mahni duma
sihm asangpas kau dibasta balna kapat.
26Muihma yamni yakauna muih barak kalma,
di minik yamni lalahwa kapat awama.
27Mayang di balna taldi bayakna mayang yakat kaput maiyulwi;
adika yulni dakah dawak man silp yamta talah.
Currently Selected:
Job 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
