Job 42
42
Job
1-2Yang amanglatayang, man di bitik sipman
man di as yamnam sip awas dini kidika diski.
3¿Yang adika waisyang man sinsma tuhni kidika dauh kapat kulnik,
kaput yamtik yang di amanglatasyang kidika lāih yaknik?#Job 38:2.
Yang yulbaunayang, amanglatasyang dini balna kidika,
taldas dini balna yayamni kidika sip amanglatasyang.
4Man yayulnaman: “dakah, yulmabaukih yawi;
mayultik dakayang adika nangkitlatah.”#Job 38:3; 40:7.
5Warmani kat, tapaki kau manah madakayang dai,
kaunah waradika laih silp mikpa kau matalayang.
6Kidika bahang yulnayang balna dai kidika damuktayang, kulnik wirlatayang,
sau yahamni dawak wan pasyakat yalahtik.
Papang yaklauwi Job yakat watwi kalawi di mahni palni
7Dawan yaklauwi Job yakat adika yulni balna kalyulna usnit kat, Elifaz yakat bik kalyulna: “Man namangyakat uba kulnik daukalna, dawak kaltalyang yayamni dutaman balna kidika niningna yakat bik, kat yang amputyang kidika kalyultasmana dai bahang, yang diki yamyang Job yamna kapat. 8Waradika turuh ahalmuk tiaskaubu, sīp ahalmuk tiaskaubu duta yang diki yamyang Job yakat yawa kaltalnauh, dawak sakripais karauni kauna#Job 1:5. bustanauh manna yulmana. Dawak diki yamyang Job manna yulmana minityulwarang, kidika dakaki, dawak dutni as bik manayamtas awaki, manna laih kaput dunamna dai kaunah yang yulki kidika lāih yakta yultasmana kidika yulni, diki yamyang Job yamna kapat.”
9Elifaz, Bildad dawak Zofar, witingna uiwi yayamna Dawan yaklauwi dipakna dai kaput, dawak Dawan dakana Job minityulna kidika.
10Job witing kaltalyang yamni balna yulnina minityulna usnit kat, Papang yaklauwi watwi kalana dai dini balna muhnilau#Job 1:1-3. duwa dai kidika, dawak muhnilau di duwa balna dai kidika watbu minitkau lakwi kalana dai. 11kaput laih wirahni ahal, yayal balna bik bitik uiwi kaltatalna dai dawak kaltalyang yamni duwa balna dai kidika bik, kaput bik laih sara mani kau kaltalyang duwa balna dai kidika bitik, dawak kidika balna bitik kalpakwi ūni yakat kasnin alasnina as yamna. Walaniahana dalani wauhna balna kidika bitik yulni, Dawan yaklauwi kalsihna dai kidika, dawak witing bitik yaklauwi lalah kalalana, dawak ting ānin gol bik as as kalalana dai witingna bitik.
12Papang yaklauwi Job yakat blisin kalana, witing kurihni balna witni yakat, di mahni palni, muhnilau dai kidika karak dawakat. Sīp tausin 14 duna, kiamil tausin tiaskauas, turuh ahalmuk pan muryang balna kidika tausin as dawak biriku yayal bik tausin as. 13Kaput bik laih walanibis ahal salap minit kau arungka#42.13 Salap minit kau arungka: ulna as as balna yakat wirlalana tiaskaubu. duna dawak yayal laih bās. 14Walanibis barakni kidika ayangni pakna dai Jemima,#42.14 Hibru kau, Jemima kidika tanka laih buhtuku. dawak usnit kidika laih Cesia,#42.14 Hibru kau, Cesia kidika tanka laih canela. kidika kaupak bās kidika laih Keren-hapuc.#42.14 Hibru kau, Keren-hapuc kidika tanka laih di walapni kahnin balna. 15Sau bitik yakat yayal yaksihni ūk disdai Job walanibis yayal kapat. Papangni yaklauwi witing dini balna kidika walanibis yayal yakat diana dai, wirahnina ahal balna kidika karak libitwi.
16-17Kidika usnit kat, Job witing sangka dai kurih 140, kaput laih muihbarak kalwi dauna, walanibis balna talna, mani balna, buhni balna, dawak buhni walaninabis balna bik talna dai.
Currently Selected:
Job 42: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998