Job 29
29
Job witni yakat yulbauna kidika
(S.n. 29—31)
Job
1-2¡Yamni kitdai, ma balna bayakwi kaina kau
Papang nakitdakwa dai kidika nawatwi kaina katlaih!
3Witing yaringni kidika kau yaringni yayamwak
puksani yakat sipyang dai lik-atnik;
4yang yamni barakni kalnayang kat,
Papang kidika ban ūki maintalwādai;
5parasni nuhni bitik duwa kidika yaihkit yakat sakkat,
yang walakibis balna kidika ya-awaihdak dai;
6tāwas kidika sau yakat murwatusdai#29.6 Tāwas kidika...murwatusdai: barangni yulnin kat tāwas kau kalki suhtayangdai.
dawak disala balna kidika laih kipala kaupak buhwi kalahwadai;
7tawan nunuhni pasyakat muih kalududuhwa kat,
yang yawik paki dutik yalahdingkat.
8Wawahma balna kidika, yatalwi pirini yaklalawa dai,
dawak muih bararak balna kidika kalnina kau yaklalauwa dai.
9Muih nunuhni balna bik yulbauwas dadawa dai,
dawak wayani kau yayamwadai muih as bik yulbaunin-awas ap danin.
10Kabamint muihni balna yul parasni yulbabauwas ahawa dai;
tunina kidika laihwatwa dai duranina yakat.
11Muih balna kidika yatalwi, kidika awaskat yadakawi tingkih yayuyulwādai,
dawak yang adika yamniyang yakwadai,
12kat yang laih warau balna dawak muih miniknakunni balna yakat ilp diatayang dai,
kat kidika muihni balna laih ilp as bik diayawas dai.
13Dutni palni yakat sakkidika muihni tingkih lani yawa dai;
yang ilpki kidika tingmak balna niningna yakat alasna as dai.
14La kat atnin dawak, kulnin yamni atnin kidika laih yang diki palni dai:
kidika laih yang prakki dai ma bitik pasyakat.
15¡Yang laih minikpa dis muihni kidika minikpa laih yang dai,
dawak muih kalni dis kidika yang adika witing kalniyang dai,
16kaput bik yang laih di dukih diawa balna papangnina yang dai,
dawak tringsar balna tanitna dakyang yang dai!
17Muih dudutni balna muhnina labanni yakat bautik bahtayang dai,
dawak ananina kau di laihwi kakasna balna kidika dakyaktayang dai.
18Yang kultayang dai: “Yang maki balna kidika mahni kuma kauhnimak kapat kultayang dai;
muih barak kaltik dauki yang ūki kat.
19Yang laih pan as waskung yakat dahna kapat,#Sal 1:3.
tingni rahni balna kidika puktayakat diwas suihwi.
20Paraski kidika watwi yang akat wisamwarang,
dawak paraski dis awaskarang.”
21Muih bitik laih yang akat yadakakawādai,
dawak ap dawi yadakakawādai yul sumaltingkat.
22Yang yulbautik datingkat muih as bik kidika minit yakat watwi yulwas dai.
Yang yulki balna kidika was kapat minitna yakat tahwādai,
23dawak witingna kidika dukih diawak tahahawa dai,
sihm madaihni kat was lauwang atwi tahahawa kapat.
24Yang witingna niningna yakat aringkat, witing rahm palni laih kukulwasdai,
dawak yang muhki alasna kidika talwi sip dadawas dai.
25Yang laki kidika witingna minitna yakat ātayang dai,
dawak witingna ais yayamwarang kidika yang lawik diatayang dai,
sihm king as kalbauyang balna duwa kidika muhnitna yakat yaklauna sakkapat.
Witingna kulninna bukwakat, yang lawik walanina ātayang dai.
Currently Selected:
Job 29: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
