Job 28
28
Sins nuhni kidika yakat ayangni nuhni yamna
1Tunil sakki lalah yayakwa pāni kidika,
dawak gol buswi yamni yayamwa pāni kidika bik sakki.
2Ayan kidika sau kaupak yayakwi,
kipala balna kidika buswi yudutni yamwak bras kalahwi.
3Muih al yaklauwi puksani kidika kalawak kiwi watna;
dawak pa tuhni balna yakat yaklakwi kiwi,
dawak kidika puksani yakat kipala walwi.
4Wah kau kalsitwi dulauwakat,
di dis pāni yakat tunil yayamwi,
dawak kidika pāni munah muih as bik bayakwas ki,
tawan nuhni kaupak naikau ki.#28.4 Wah kau kalsitwi...naikau ki: kaput ulna kidika yamni kapat ki. Hibru kau laih amangladas ki.
5Sau kidika minit yakat plawar minik yakwi,
dawak dinit yakat laih kuhpau kapat daihni sakki.
6Dawak kidika yakat kipala sangni kapat sat sat dahlwa kidika duwi,
dawak gol sau karak wirih kidika bik duwi.
7Yakal balna, dawak di lawani duyang di muihni manah kasyang balna kidika bik,
witingna tani kidika tatalwas ki.
8Nawah balna bik kidika yakut bayayakwas ki,
dawak layan balna bik kidika yakat uiwas ki.
9Muih laih kipala pihni yararingni dadasni kidika
tingnikau laihwi asang dinit kaupak yakwi.
10Kipala yakat kuhrwi kakiwi
di minit nuhni palni satni balna kidika yakwi.
11Wastuna burhwa balna kidika bitik walwi yakwi,#28.11 Wastuna...walwi yakwi: kaput ulna kidika yamni kapat ki. Hibru kau laih yulwi Tahwa balna kidika sitwi (kidika awaskat laihwatwi).
dawak di malni balna bitik lāih yaringni yakat yakwi.
12¿Kauna sins lani nuhni kidika angkaupak kaiwi?
¿Angdika pāni yakat sakyah kulnin sirihni kulwi yakwa kidika?
13Muih laih amanglawaski minit nuhni ampus duwa kidika,
dawakat adika sauni akat sip yakwas ki.
14Kudungni tuhni nuhni sakkidika yulwi: “Akat diski”,
dawak kuma bik yulwi: “Yang bik disyang.”
15Gol kau bik sip yakdi dudas ki,
dawak lalah kau bik sip bakandas ki.
16Gol tanit yamni kidika kau bik sip minitlaudaski,
dawak kipala pauni sa dahlwa kidika dawak kipala sangni kapat sat sat dahlwa kidika kau bik sip minitlaudaski.
17Gol dawak kipala yaringni karak bik tanit minit nuhni ki;
dawak gol manah duwi di yamna balna kidika kau bik tanit nuhni.
18Sins lani nuhni kidika laih di bitik minit yakat tanit nuhni ki,
kipala yararingni dawak kipala dahlwa balna karak tanit minit nuhni.
19Etiopía kinipala lalahni sangni kapat kidika yakarak bik sip kapapat awaski,
dawak gol tanit yamni karak bik sip bakandas ki.
20¿Sins lani nuhni kidika angkaupak kaiwi?
¿Sinsni sirihni di kulwi yakwa kidika angkat pāni yakat sakyah?
21Nawah anyang balna miniknapa yakaupak malna sakki,
dawak makau uhu balna miniknapa kaupak bik malna ki.
22Di daukalyang dawak daunin kidika balna bik yuyulwi:
“Mayang matapaki manah dakadi amangladi kidika dini.”
23Kauna Papang laih sins nuhni tani kidika amanglawi;
witing manah amanglawi angkat yaknin kidika,
24kat witing laih talwi sau sutni bitik yakat,
kaput bik makau kisang dinitkau di balna bangkidika bitik talwi.
25Papang yaklauwi wing parasni kidika kalana
dawak was kidika kiwi watnin pāni kalana,
26waslaunin balna kidika bik yamna,
dawak alwana tani kidika bik kalana,
27dawak sins nuhni kidika yakat bik talna, minit yamni kidika bik,
witing laihwi talwi dawi kaput āna.#Pro 8:22-31.
28Dawak Papang yaklauwi muih yakat diyulna:
“Dawan yakat barangni atnin dawak dini bik yamnin kidika laih sins lani nuhni ki;
dutni kaupak dawi yaklanin kidika laih: sinsni sirihni di kulwi talnin lani as ki.”#Sal 111:10; Pro 1:7; 8:13; 9:10.
Currently Selected:
Job 28: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
