Job 21
21
Job
1-2Yang walakiānamna tanit yamni kidika laih,
yang yulki balna kidika dakanamna.
3Yang yulbautingkat kulnamna laihwattanauh,
dawak usnitkat arakih manawak aranauh.
4Yang kalbiltayang kidika laih muih as karak awaski;
kidika bahang kulnik abahlwi.
5Yang yultayang yakat dakanama kat,
muihsak dauta tubi kaltanama.
6Yang palni kidika yakat kultingkat, muihsak dautayang;
dawak muihki bitik laih yayukwi.
7¿Ais yamwi muih dudutni balna kidika sangninaka duduwi,
dawak witingna laih muih barak kakalwi, dawak parasnina bik nuhni duduwih?
8Walaninabis balna kidika bararakwak tatalwi,
dawak manina balna bik bararakwak tatalwi,
bahang kaput laih witingna yaihnitna yakat yamni manahki.
9Unina pasyak kulnin aslah kidika ban sakki,
Papang bik wah diawas ki.#Sal 73:4-12; Mal 3:15-19.
10Tuninaruh balna kidika yamni mamahwi;
dawak walaninabis balna kidika yayamni manah ki.
11Walaninabis balna kidika kiri yakikisdi sihm sīpbin kapat,
12pasnin dini kidika paswi, drom bauwi,
dawak bara pupuhwakat alasna sutwi yakikisdi.
13Sangninaka kidika yamni barakna ki;
dawak isningnalak sau ū yakat uina ki.
14Papang yakat kalyuyulwi:
“¡Yanadatang kat kulnikna aslah awanakuh,
man lama kidika talkih yanawas ki!
15¿Parasni nuhni bitik duwa kidika waisyah, yangna dini yamna atnikna?
¿Ais as dudi witing yakat mamikit yuldi?”#Mal 3:14.
16(Muih dudutni balna dinina awaski di yamni kidika.
¡Yang kultayang kidika naikau ki,
witingna kukulwa karak dawakat!)
17¿Mampat muih dudutni balna awasnina kidika pibuknayah?
¿Mampat dutni yakat bubuknayah?
¿Mampat Papang kulnin daukalnayah witingna yakat,
dawak diyamwak dalani wawauhnayah?
18¿Mampat kalruruhnayah sihm dibasta
wing parasni kaiwi dukiwa kapat?#Sal 1:4.
19Yulwi, Papang yaklauwi diyamwak walaninabis balna minit lalauna ki,
papangnina dutni yamna kidika yulni.
Kauna kidika laih dutni yamna muihni palni
minitlaunin ki, dalani wauhna atnin.
20Witing duna atnin ki,
parasni nuhni bitik duyang kulnin daukalna wahni kidika.
21¿Witing ais kulwarangyah dauwak usnitkat
walanibis balna wawauhwarang kidika?
22(Kauna, ¿wais sipyah Papang yakat sumalnin,
makau kisang muihni balna yakat bik lanina yamna atnin yulni?)
23Muih buas kat dadauwi
parasnina yamni duduwa kauna, isningnalak,
24di bitik yakat barakna dawak muihnina bik yamni.
25Uk balna kidika laih nawatkauh, witingna niningna yakat tapahlni manah ki,
dawak ban kaput dadauwi, isninglak lani kidika dakawas.
26Kaput kauna, sau ū yakat laih bitik kapapatki;#Ec 9:2-3.
bitik babil dikaswi.
27Yang amanglatayang, manna ais yakultamana kidika,
dawak bik kulnin dutni dutamana kidika.
28Yulwi dakakawi: “¿Kidika muih dutni dai kidika,
witing uni angkat sakyah?”
29¿Manna yulbauta dakasmanah, muih aiwi, uiwi ahawa muihni balna yakat?
¿Dawak witingna yul yuyulwa balna kidika dakasmanah:
30Papang kulnin daukalwak, wah dutni sihwi atwa kidika,
dawak muih dutni kidika laih di as bik kal-laihwas ki atwa kidika?
31Yamwa balna kidika, muih as bik witing muhni yakat yakwi kalyulwas ki,
dawak muih as bik witing yakat minit kalawas ki.
32-33Dawak witni kat nuna duwi uiwak,
muih bitik kalahwi uiwi,
buas laih tanit yakat yaklawi uiwi dawak buas laih dangnit yakat uiwi,
kaput bik laih sau-ū yakat uiwak maintatalwi,
dawak sauni kidika bik witing niningyakat yudutni ki.
34¡La as bik diski, manna yang akat walakiānamna!
¡Alas manahki, yuyulwa balna bitik kidika!
Currently Selected:
Job 21: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
