Jeremías 48
48
Prapit yulna Moab yulni
1Yul as sihwi Papang parasni nuhni bitik duwa kidika, Israel Papangni, Moab yulni:#Is 15:1—16:14; 25:10-12; Ez 25:8-11; Am 2:1-3; Sof 2:8-11.
“¡Nebo tawanni nuhni minikun daukalna kidika!
¡Witing uni parasni dai kidika sau yakat bukna ki!
2Moab yaringni kidika dahn kalna.
Hesbón yakat waihla balna kidika ridi kakalwi
Moab nisan as kidika dispamna atnin.
Man bik, Madmén madaukalna karang,
war man namangkauh yaklauwa kidika dawas karang.
3Horonaim kaupak sararahwa kalahwi:
‘¡Daukalna nuhni as!’
4“Moab laih daukalna;
dalawak sararahwa kidika laih Zoar kat#48.4 Zoar kat: grik kau kaput yulwi. Hibru kau laih dibinina kidika. lāihki.
5Miniknawas karuk iluiwi Luhit asangni yakat;
Horonaim kau yaklakwi uiwa balna kidika dalawak parasni sararahwi di dutni kalahwak niningyakat.
6¡Iranauh! ¡Wais sipman kat ira lawah!
¡Kauhmak wanilang kau pan wakalni duwa kapat#48.6 Kauhmak wanilang...kapat: latin kau yulwa kidika kaput yulwi. Hibru kau laih amangladaski. awanauh!
7“Moab, man laih parasma dawak ritsma balna yak kultaman,
kaunah man bik laih malaihna karang.
Damawan dauh Quemós kidika kauhmak wanilang yakat kiwarang,
sumalmayang nunuhni balna dawak muih nunuhni balna bik.
8Daukalnin kidika tawan nunuhni balna yakat bitik kiwarang ki,
as bik laih yaklawas karang ki;
sau langni balna yakat asangtuna langni balna yakat bitik laih daukalna karang.
Yang Papangyang kat yultayang.
9Moab kidika kipala#48.9 Kipala: grik kau laih kaput ulwi. Hibru amangladas ki. yakat ultanauh
kat daukalpapamwarang bahang;
tawanni nunuhni balna kidika bitik daukalna karang
dawak muih as bik diskarang.”
10(¡Dutni palni karang angdika muihni Papang yaklauwi wark pakwak yamkih yamwas kidika! ¡Dutni palni karang muih iwarang pasyakat witing bik kawas karang kat!)
11Moab kidika witing kulnin aslah manah yalahna, witing muih ūk pāni yakat bik laihwi dukiwas dai. Wain wasni dasakwak uhlakwa kapat, punin dini ūk yakat utuhlawas kapat, kaput bahang auhni dawak walapni diswaski.
12Kaunah Papang yulwi: “Mani kiwi kawarang yanglawik muih sihtingkat wainni kidika punin dini ūk yakat utuh'lalawarang, kaput laih punin dini panimanah dawa kidika sasahna karang. 13Kaput laih Moab kidika witing daniwan dauh Quemós yaklauwi alas kalyulna kulwarang, sihm Israel kidika Betel yaklauwi alas kalyulna kaput, witing yakat kulnin awi duna dai kaunah.
14“Moab yulnin awaski: ‘Mayang laih makulnik parasni dudi,
war kalbauyang pararasni manah.’
15Moab yak daukalpamwarang kidika uman kiwi kawi tawanni nunuhni balna yakat;
sangnika wahma yamni kidika dauna karang.
King ayangni ulna kidika,
witing ayangni palni laih Papang parasni nuhni bitik duyang.
16Moab kaldaukalnin kidika ulisna,
witing yak dutni kalkalahnin kidika kiwikanin manahki.
17Moab yaihnitkau balna kidika,
witing ayangni nuhni kat amanglalawa balna bitik kidika
witing yulni yulwi kakaidang aput:
‘¡Talnauh amput witing parasni nuhni
dawak ayangni nuhni dai kidika!’
18“Dibón tawanni nuhni,
man pama ayangni nuhni kaupak lakwahn,
man sau buhlana bukuihni minit yakat yalahdah
kat Moab yakat daukalpamnin kidika
namangyak kiwi man uma pararasni balna bitik daukalmukna.
19Aroer tawanni nuhni,
ta kungyakat lawa talah;
dauwas yaklalana balna yakat yulta dakah ais kalahna pa.
20Moab laih sauyak bukna muihsak dauna.
¡Witing yulni aidanauh!
¡Arnón wasni yakat yultanauh Moab laih daukalpamna!”
21Sau langni balna kau tawan nunuhni balna niningnakauh wah sihnin lā āna dai kidika kiwi kana: Holón, Jahaza, Mefaat, 22Dibón, Nebo, Bet-diblataim, 23Quiriataim, Bet-gamul, Bet-meón, 24Queriot, Bosra dawak Moab tawanni nuhni balna bitik yaihnit kau balna dawak naikau balna bitik yakat.
25Papang aput karang ti:
“Moab parasni laih bahna ki,
parasni nuhni bik daukalpamna.”
26Moab yakat wasak bayahtanauh,
kat Papang niningkauh yaklauna bahang.
Kaput laih Moab kidika tiningyakna minit yakat bukwi pihrwarang
dawak muih bitik sarahni kalyuyulwarang.
27Moab, ¿Israel yakat sarahni kalyultasman daih witing yulni yultaman kat didauh kapat yultaman,
dawak dimalyang as kapat bik kalyultaman?
28Tawan nunuhni balna kidika data alahwanauh, Moab muihni balna;
kipala nunuhni balna minityakat yawa yalahdanauh buhtuku kapat ataini kung kau ūnina duduwa kapat.
29Moab witing manah kapat nuhni kaldakawa kidika amangladi.
30Papang bik amanglawi kulnin dutni duwa kidika,
tinpas kau yul manas yulwa kidika, dawak anyang kidika bik.
31Kidika bahang aidaki Moab tawanni balna bitik yulnina,
dawak Kir-hares ahalni balna yulnina bik.
32Man yulma aidaki, Sibma wainni yamak,
Jazer yulni kaidana kapat tanit.
Man tingma rahni balna kidika kuma tanit yakau bayakwi kiuna dai,
dawak Jazer kat kiuna dai.
Kauna waradika laih minik balna bahnin dai kidika bitik laih daukakalna.
33Uman dakadas ki isningnalak kat sararahwa dai kidika Moab dinipulu dadahna pāni yakat.
Wain wasni kidika puwa pāni yakat witna.
Wain minik ataknin muihni kidika diski,
alasna duwi unbabauwa dai kidika uman diski.
34Hesbón muihni balna kidika sararahwi dalawakat,
dalawak sararahwa kidika lāih dakakawi Eleale dawak Jahaza kat,
Zoar kaupak Horonaim dawak Egla-selisiya kat,
Nimrim wasni burhwa balna kidika buhlakna karang bik.
35Papang yaklauwi aput karang ti:
“Yang lawik Moab muihni balna kidika imukki,
witingna asang ububulni balna yakat kilwi
dawan dauh balna panina yakat sakripais dawak walapni bik bubuswa kidika daninawan dauh yakat.”
36Kidika bahang yang kulnik kidika kaidi Moab yulni,
dawak Kir-hares ahalni balna yulnina bik,
muih dauna laniwana kidika bara kau puhwak,
kat ritsni balna uduhna dai kidika disna.
37Muih tunanina bitik laih kakahrna,
dawak kungninabas bik dadakna;
witingna bitik laih tingnina yakat dadakna,
dawak asna utuhni kau kakana.
38“Moab ūnina tuna balna dawak tanipas balna bitik yakat
di ūk laih dakadas ki kaidinin manah dakadi,
kat yang lawik Moab kidika bahtik bikisni yamnayang bahang,
sihm sau suba kapat.
Yang Papang yang kat yultayang.”
39¡Moab yulni aidanauh!
¡Adika ampat muihsak daunayah!
¡Isparah kidika nawatwi kaina asalni karuk!
Di wayakani dawak muih as bik dukih kalawas kidika kalna,
witing yaihnit muihni balna bitik yakat.
40Papang yulwi:
“Moab waihnila balna kidika witing nining yakat auiwi
sihm yakalnuh lawani riwa kapat.
41Tawan nunuhni dawak ū pararasni balna bitik laih
waihla parasni dinit yakat bukna karang.
Kidika mani Moab ahalni kalbauyang balna kidika
diyukna karang sihm muih yal as muihbin duwarang sakkapat.
42Moab kidika nisan-awas kalna karang,
kat yang nikingkauh yaklauna, Papang niningkauh.
43Kidika bahang, Papangyang kat yultayang:
Moab muihni balna kidika didauh balna kat muih di iyang balna yaklauwi uiwi uiwa kapat karang,
kidika-awasbik pa kudungni yakat kawi kiunin yamadangni kapat.
44Iyang balna tingnina kaupak yaklawarang
bik pa kudungni yakat bubukna karang,
pa kudungni kaupak yaklawarang bik,
laihnin dini#Is 24:17-18. ahana yakat bukna karang.
Kat yang lawik Moab minit yakat duaiki wah dunin mani kidika.
Yang Papangyang kat yultayang.
45“Buas laih parasnina dis kikiri,
yakmaldinin pāni as walwi Hesbón yakat;
kauna Hesbón, king Sehón tawanni nuhni kidika wayau manah ki,
kuhpau kidika baisa buswi kiwi,
dawak Moab asangni balna kidika kuhpau buswi,
pini muihni balna kidika.
46¡Alakaih Moab!
¡Quemós tawanni disnaman!
¡Walamabis ahal dawak yayal balna bik laihwi pa ūk yakat duwi uiwi!
47Kauna witni kat yang lawik Moab kidika satuk wirlaki;
yang Papangyang kat yultayang.”
Papang yaklauwi Moab nining yakat lani yamna.
Currently Selected:
Jeremías 48: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
