Jeremías 41
41
Gedalías ihina
(2 Re 25:25-26)
1Waiku tiaskaubu laihwa yakat, Elisama mani, Netanías walanibis Ismael witing laih king sulani dai,#41.1 King sulani: grik kau kaput yulwi. Hibru kau laih yulwi king warkni yamyang tanituna balna. bahang witing Mizpa yakat kiuna, Gedalías karak yulbauna atnin. Witing ahal salap karak kalpakwi kiuna dai. Mizpa yakat witingna kalpakwi di kakaswakat, 2Ismael dawak, ahal salap dai kidika sirihni yaklauwi Gedalías yakat isparah kau ihina, bahang witing laih Babilon kingni yaklauwi kabamint āna dai kidika Judá yakat. 3Ismael yaklauwi ina Ju muihni balna, dawak Caldeo muihni balna kalbauyang balna kidika Gedalías karak bang dai kidika Mizpa yakat.
4Gedalías ihina kidika payahwakat, di kalahna kidika muih as bik dakakawas dai, 5Siquem, Silo kaupak dawak Samaria kaupak muih ahal muihasluih arungka uina dai, witingna kungninabas kakahrna, praknina iswi bibisna dawak muihni kidika dadakna dai bahang kidika laih witingna silp yayamna dai. Duahaina dai plawar minik, walapni busnin dini, kidika laih Papang yakat kalana atnin witing uni yakat. 6Kaput laih Ismael kidika Mizpa kaupak kaidīnah kalahwi kiuna ta yakat witingna niningnakauh. Uiwi kalpapakwa minitni yakat diyulna:
—Aiwa talnauh Ahicam walanibis Gedalías kidika.
7Tawan nuhni papusyakat uiwi kakawa minitni yakat, Ismael dawak witing ahalni balna kidika yaklauwi ihina dawak pa kudungni yakat ruhm'ahana. 8Kaput kaunah kidika ahalni balna salap kidika kalyuyulna Ismael yakat:
—Mai-iwinih; yangna plawar minik dutayang, disala, amak dawak di minik ūk bik bahang kidika asangpas yakat malnayangna bangki.
Kaput laih Ismael yaklauwi iwas dana dai. 9Pa kuhrna kudungni kau Ismael yaklauwi muih iwi puna pāni kidika laih, king Asa yaklauwi pakwak kukuhrna dai, witing Israel kingni Baasa karak war kalbabauna dai kidika.#1 Re 15:16-22. Pāni kuhrna kidika nuhni dai kaunah Ismael muih ina kidika puwak bungdana dai. 10Kidika minit yakat Ismael yaklauwi king walanibis yayal kidika laihna, dawak Mizpa yakat muih bangdai kidika bik, bahang kidika laih Nabuzaradán kalbauyang balna taninatuna, witing yaklauwi Gedalías tingni yakat awi dana dai. Ismael yaklauwi laihwi duwi kiuna, kulna Amón sauni munah duwi bayakna atnin.
11Carea walanibis Johanán, dawak kalbauyang balna taninatuna bang dai kidika dakakana dai Ismael muih ina kidika, 12muih uduhwi dawi niningkauh uiwi kalbabauwi. Uiwi kukuihna dai Gabaón kau was lalaihna pāni pakyakat.#2 Sam 2:13. 13Ismael muih laihwi duwi kiwa likdai kidika, witingna tatalna Johanán dawak kalbauyang taninatuna balna karak kalpakna bangdai kidika kaput laih isningnalak tatalna, 14dawak nawatwi uiwi Johanán karak kalpapakna. 15Kaunah Ismael dawak ahalni balna tiaskaubās dai kidika Johanán kaupak kiri yaklawi Amón sauni yakat uina.
16Johanán dawak kalbauyang tanituna balna witingna karak bang dai kidika, muih balna ismael laihwi duwi kiwa likdai kidika Mizpa kaupak, kidika balna laih Caldeo ahalni kalbauyang balna dai, dawak yayal, walabis, dawak muih nunuhni balna bik dai, Gedalías ipamna usnit kat laihwi dukiwalikdai; bahang kidika balna Johanán yaklauwi watwi nawatwi duaina dai Gabaón kaupak. 17Kaput laih ta yakat lapakwi uina Gerut-quimam yakat, Belén yaihnit yakat, bahang yakat laih apis wawatna dai. Witingna kulninna kidika laih Egipto kat kiuna atnin dai 18Caldeo balna tingnina kaupak kiri yaklana atnin yulni, kat Ismael yaklauwi Gedalías yakat ina, bahang kidika alni laih Babilon kingni yaklauwi kabamint ana dai, kaput kalahna bahang yamaduduna dai.
Currently Selected:
Jeremías 41: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
