Jeremías 40
40
Jeremías laih Gedalías karak wawatna
1Papang Jeremías yakat kiuna, Nabuzaradán yaklauwi Jeremías yakat silak kaupak yakna usnitkat Ramá pāni yakat. Nabuzaradán witing kalpakna dai Jeremías kidika Jerusalén dawak Judá muihni pasyakat tingni sitna sakkat, bahang kidika balna laih Babilon yakat duwi uina dai.
2Kalbauyang balna taninatuna kidika Jeremías yakat alas yakwi dukiwi kalyulna: “Man Papangma yaklauwi adika di dutni sihna sauni akat, 3bahang waralaih kulna yakat yamna. Manna yakat aput manalaihwi kat Papang niningyakat dutni yamna mana bahang yulni dakas data. 4Talah warminitni tingma sitna kidika uluhtayang. Man yang karak aiwanam kultaman kat, aiwah; yang main matalki. Kaunah man aiwanam awas kultaman kat, wattah. Adika pāni bitik man tingma yakat ki: yawah man angkauh yamni talaman kat. 5Nawatta yawanam kultaman kat,#40.5 Nawatta yawanam kultaman kat: kaput ulna kidika yamni kapat ki. Hibru kau laih dawak baisa witing nawatwi kaiwasdai. nawatta yawah Safán mani dawak Ahicam walanibis Gedalías yakat, witing kuduh Babilon kingni yaklauwi Judá tawanni nunuhni balna yakat kabamint ana, dawak witing karak yalahtah dawak tawanma muihni balna karak bik yalahtah. Yawah angkauh yamni talaman yakat.” Usnit kat kalbauyang balna taninatuna kidika Jeremías yakat di kalana dai, dawak kasnin dini balna bik, kaput bik mahka sihwak kiuna. 6Jeremías laih Gedalías karak kiuna Mizpa pāni yakat, kaput laih witing karak yalahna dawak tawan muihni balna buas wawatna balna dai yakat.
Gedalías niningyakat yaklauna
(2 Re 25:23-24)
7Ju muihni kalbauyang balna dawak taninatuna nuhni bik witingna asangpas yakat bangdai kidika dakakana, Babilon kingni yaklauwi Ahicam walanibis Gedalías yakat kabamint ana dai kidika, ahal, yayal, walabis dawak muih miniknakunni balna Babilon yakat duwi uiwas dadana dai kidika maintalnin, 8uina dai Mizpa yakat Gedalías kidika talna atnin. Bahang witingna bang dai kidika laih: Netanías walanibis Ismael, Carea walanibis balna Johanán dawak Jonatán, Tanhumet walanibis Seraías; Efai Netofa dawak Jezanías kaupak walanbis balna dai kidika bik; Maaca pāni kaupak al as dai kidika walanibis dawak ahalni balna bik. 9Gedalías yaklauwi pramis diyamna: “Manna yamaduduwinih Caldeo balna tingnina dinit yakat āwanamna kidika. Akat watta yalahtanauh Babilon kingni kalni dinit yakat, manna yamni awanama. 10Yang Mizpa akat watki, manna tamanatuna as Caldeo balna kidika akat aiwak yul baunin. Manna wain, di minik balna, disala, balna kidika yakta apaktanauh, kaput laih tawan nunuhni balna kau kawi duduna balna yakat sip awanama yalahnamna.” 11Kaput bik Ju muihni balna yalalahwa dai kidika, Moab, Amón Edom dawak kaput bik sau ūk kau bangdai kidika balna bitik dakakana, Babilon kingni yaklauwi muih buas damukwi kiuna dai kidika, dawakat Gedalías kidika kabamint kapat āsakwi kiuna dai kidika, muih wawatna balna taninatuna atnin. 12Kaput laih Judá yakat nawatwi uina, pa ūk kau witingna ruhwi uina bangdai kidika, dawakat Gedalías muhni yakat uina Mizpa pāni yakat. Kaput bik laih witingna bik, wain, dawak di minik balna kidika mahni ududuhna dai.
Gedalías niningyakat yaklauna Ismael
13Carea walanibis Johanán, dawak kalbauyang balna taninatuna nuhni balna bitik asangpas yakat wawatna dai kidika Mizpa yakat uina, Gedalías yakat talna atnin, 14dawak kalyuyulna:
—¿Man amanglatasmahn, Amón kingni Baalis yaklauwi sihna Netanías walanibis Ismael kidika man yakat maīna atnin?
Kauna Gedalías witing rahm kulwas dai. 15Kaput laih Johanán yaklauwi yakmaldi kalyulna Gedalías yakat:
—Datang kat yang yawik Ismael yakat īki, kaput laih amanglalawas karang wais yamna pa. ¿Ais yamdi dādak witing man yakat maiwarangyah? Kidika yaklauwi laih duaina karang, man yaihmat yakat Ju muihni balna kal-ududuhna kidika bitik kalruruhwarang, dawakat kidika laih yaklauwi laih Judá kidika bitik laih daukalna karang.
16Kauna Gedalías yaklauwi nangnitlana:
—¡Yamwinih! Ismael yulni yulwa kidika laih rahm awaski.
Currently Selected:
Jeremías 40: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
