Isaías 42
42
Dawan dini yamyang
1“Akat sakki yang warauki dutayang kidika, waltik yaktik dunayang,
bahang witing yakat alaskina dutayang.#Mt 3:17; 17:5; Mk 1:11; Lc 3:22; 9:35.
Yang spiritki kidika witing yakat kalanayang,
la kat yamna atnin sau bitik yakat.
2Parasni sarahwi yulwas karang,
witing dinit kidika tapas yakat muih dakakawas karang,
3dapa bahna kidika baisa witing yaklauwi minit yakat bahwas karang,
kaput bik awas dibin dahlwasak kidika piwas karang.
Rahm kidika laih, la kat kidika witing yaklauwi duaina karang.
4Wingnita puhwas karang, dawak kulnin kidika bahbukwas ban karang,
sau yakat la kat kidika uiwi āwarang kat.
Kuma paskau sau wirni kau yalalahwa balna kidika witing yakat dakakana karang sumalwa kidika.”#Mt 12:18-21.
5Dawan yaklauwi makau kisang yamna kidika,
dawak bik sau yamna pasyakat di balna bararakwa kidika,
dawak muih balna yalalahwa balna yakat sangninaka,
kaput bik wingninata#Gn 1-2; Ap.w 17:24-25. diawa kidika yaklauwi warauni yakat kalyulwi:
6“Yang Dawan yang, aiwanam mayulnayang,
bahang aiwangkat tingma yakat laihnayang,
man kidika laihwi yakyang dini as kapat;
dawakat yang lawik mayamnayang, bahang dukih yawi man kidika
sainni as atnam yang pramiski muih balna yakat yamtayang kidika,
sau muihni balna yaringnina.#Is 49:6; 60:1-3; Lc 2:32; Jn 8:12; Ap.w 13:47; 26:23.
7Dukih yawi miniknapa dis balna kidika miniknapa dianam,
dawak silak muihni balna kidika yaknam,
pa sulihni paskau puksani yakat bangkidika.
8Yang laih Dawan yang, bahang kidika ki yang ayangki,
dawak yang dating kat alaskina kidika muih ūk#Is 48:11. yakat diayawas karang,
dawak dawan dauh yakat bik ayangni nuhni dulalauwas karang,
yang yakat yanin dai kidika pāni yakat.
9Talnauh, tanitkau yulna yang dai kidika amput yakat kalahwada,
dawakat waralaih di wisam ūk yulki ki;
manna yakat ismangna paktang baisa kaikalahwas tanitkauh.”
Unbauwi ayangni nuhni yamna Papang yaklauwi laihwi yakna kidika yulni
10Unbaunin wisam as unbautanauh, Dawan yakat;
pa naikau muihni balna mana bik unbautanauh,
kuma minit yakat yawamana kidika bik,
kaput bik didauh balna bangkidika bik kuma yakat,
dawak kuma paskau muih yalalahwa balna kidika bik sau wirni balna kau.#Sal 96:1; 149:1.
11Kauhmak wanilang paskau tawan nunuhni balna kidika bik alasna dutanauh,
dawak Cedar muihni balna bik.
Sela muihni balna bik alasna duwi unbabaunwang;
asang tuna balna kaupak parasni yuyulwang.
12Dawan alasnina kalalawang,
dawak unbabauwa kidika dakakana karang kuma paskau muih yalalahwa balna bitik.
13Dawan kidika kalbauyang nuhni as kapat kalahwarang,
dawak kalbauwarang kalbauyang nuhni as kapat;
parasni sarahwi yulwarang mahka kalbaunin
dawak waihnila balna niningna yakat minit bayakwarang.
14Dawan yulwi:
“Ma mahni yang ap danayang dai,
dawak laihwattik dunayang dai;
kaunah waralaih sarahki ki sihm muih yal muihbin duwarang kapat,
ihtik dawak wingkita puhtik.
15Asang nunuhni balna dawak asang ubulni balna bik disyamki,
dawak dibasta balna bitik laih kalating kusulawarang;
kaput bik laih kauhmak wanilang#42.15 Kauhmak wanilang: kaput ulna kidika yamni kapat ki. Hibru kau laih yulwi kuma paskau tawan balna kidika. kidika kalating was nuhni murwarang,
dawak was mahna panunuhni kidika buhni manah yamki.
16Miniknapa di tatalwas balna kidika,
ta as amanglalawas yakat didutik yawaki.
Witingna niningna tani yakat puksani kidika yaringni yakat wirlaki,
dawak pa wakarhni balna kidika langni yamki.
Adika dini laih rahm palni yamki.
17Dawan dauh yakat kukulwa balna kidika,
dawak wayani yamna yakat kukulwa balna kidika yuyulwi:
‘Manna laih Papangki mana’,
atwa balna kidika laih yakasaldi uiwarang.#Is 45:16,20.
Israel minikpa di talwas dana
18“Tappuk balna dakanauh;
mamaknapa di talasmana kidika yamni talnauh.
19Muih as bik minikpa di talwas dawak tapani di dakawas laih awaski
yang warauki kapat, dawak sihnayang muihni kidika bik;
muih as bik minikpa di talwas, tapani di dakawas awaski,
yang yulki yulnin sihnayang kidika, Dawan dini yamyang.
20Di manas talna kaunah, kidika yakat kulwas dai;
dakanin laih sipki kaunah di as bik dakawas dai.
21Dawan kidika laihwi yakyang as bahang,
witing sumalwa kidika nuhni palni yamnin kulna dai;
22kaunah adika muihni balna laih di mamalwi,
kaput bik kāwi muih dinina duduwi,
dawak bitik laih laihwi silak ahana,
pa kuhrna puksani yakat laihwi awi puputna,
witingna yakat dilalaihwi, kaunah muih as bik diski dilaihwi yakna atnin.”
23¿Kaunah wais mana kat kidika yulni dakamanah?
¿Wais dakakih kalawi di balna kalahwarang sakkidika?
24¿Wais yaklauwi kalawakat Israel Jacob tawanni kidika yakat
kawi laihwi duna yah, dawakat kaput bik duwi kiunayah?
¿Dawan yaklauwi yamna awasyah?
Kidika balna laih witing nining yakat dutni yamna,
witing yaklauwi ta niningna kāna yakut uiwas dadana,
dawak sumalna yaka bik dakawas dadana.
25Kidika bahang witingna niningna yakat kulnin daukalna,
dawak wār parasni sihwak kiuna kidika kuhpau manah bayakkiuna;
kaunah kaput bik witingna amanglakih diawas dai.
Currently Selected:
Isaías 42: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
