Isaías 34
34
Papang wahni Edom minit yakat
1Tawan balna is aiwa dakanauh;
sau nunuhni balna yamni dakanauh.
Sau kidika dakawang dawak paskau di balna bang kidika bitik dakakawang,
kaput bik sau witing kalawak barakwi minik yakwa balna bitik dakakawang.
2Kat Dawan laih sau muihni balna karak kulnin daukalna,
dawak kalbauyang muihni balna niningna yakat bik,
dawak witing yaklauwi daunin yakat wirlana.
3Dadauna balna kidika ruhmwi dadawarang,
dawak dadauna balna kaupak wayani kidika kalahna karang,
dawak asang balna kaupak ā kidika was murwa kapat kirarang.
4Kisang kau yala satni balna bitik laih daukakalna karang,
kisang kidika tulnin kapat tulna karang,
dawak yala balna kidika bitik laih pina karang,
sihm wain basni kusulawi bukwa kapat,
kidika awasbik ani damni basni bukwa kapat karang.#Rib 6:13-14.
5Dawan isniparah kidika ibis yakat kaiwi kalahwarang kat,
kidika laih Edom minit yakat bukna karang,#Is 63:1-6; Jr 49:7-22; Ez 25:12-14; 35:1-15; Am 1:11-12; Abd 1-14; Mal 1:2-5.
tawan as dauna yakat wirlana kidika.
6Dawan isniparah kidika ā dawak disala manah kahna karang,
sihm kuts dawak sīp balna sakripais bubuswa pāni kau ihiwa kapat karang.
Dawan yaklauwi sakripais as busna karang Bosra yakat,
dawak Edom yakat muih mahni ina karang.
7Turuh wail balna kapat bubukna karang,
dawak turuh ahalmuk balna kapat bik;
sauni kidika ā manah suihna karang,
dawak sau yahamni kidika disala kalna karang.
8Agha, Dawan yaklauwi biri yamnin mani karang,
biriwi kalyamnin kurihni karang, Sayan yulni.
9Edom wasni binina kidika tar manah kalna karang,
dawak sau yahamni kidika laih sulhpa kalna karang;
dawak sau kidika laih tar kapat dahlna karang.
10Piwas karang pukta madah;
pukwi kilwa kidika ban kaput karang.#Rib 14:11; 19:3.
Kurih andat, andat bayakwarang yakat ruhmwi dana karang;
muih as bik kidika pāni munah bayakwas karang.
11Kidika yakat kubam dawak pukta yanikal karak panina duduna karang,
dawak kaput bik laih kuparis balna kidika bik ūnina yayamna karang.
Dawan yaklauwi kidika pāni kauhmak wanilang yamna karang,
di as bik dis.
12Watwi king as duduwas karang, witingna tanina tuna kāna atnin;
tanina tuna balna bitik laih didisna karang.
13ūnina nunuhni balna yakat wakal ukusna karang,
ililih balna dawak wakal satni balna bik.
Kidika yakat chacal balna ūnina duduna karang,
dawak uhu nuhni balna kidika bik yakmamalda pāni karang.
14Kuruh balna kidika chacal balna karak kalpapakwarang,
dawak kuts balna kidika biri kalyuyulwarang.
Kidika yakat pāni duna karang di isningmuih pukta dawak bilninalauwa kidika,
bahang yakat pa as yakna karang wingnita puhna atnin.
15Kidika yakat kubam ūni yamwarang,
dawak sumani balna lukwi walanibis balna sahwarang,
dawak uduhwi maintalwarang.
Kidika yakat bik yakal balna kal-ududuhwarang,
almuk kidika yalnina kaunah.
16Dawan wauhnitaya kidika yulta talnauh:
Didauh balna kidika asbik laih dis awaskarang,
dawak as bik yalni dis laih awaskarang,
kat Dawan witing yaklauwi kaput yamna bahang
dawak witing wingnita puhwa yakau uduhna karang.
17Kidika balna bitik laih panina, panina diana,
dawak witing tingni kau saunina pīsni diana,
bahang kaput laih ban yakat karang,
kurih andat andat bayakwak bik ban yakat karang.
Currently Selected:
Isaías 34: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
