Isaías 22
22
Prapit witing yulna Jerusalén yulni
1Sau langni kau di niningkana kidika tanka prapit yulna:
¿Ampat dawak muih bitik ūnina tuna yakat kikilwih?
2Tawan nuhni as muih balna kidika pini kiri yaklauwak parasni yulwa kidika laih banghna ki,
kidika laih tawan nunuhni alasna duyang balna karak kaltalyang yamni ki,
muih dadauna kidika laih isparah kau ihiwas ki,
dawak bik wār kalbauwi dadauwas ki;
3tamatuna muihni balna kidika laih bitik kalahwi kikirana,
las kidika talwi kikirakat laihwi silak ahana.
Ahalma balna kulninna dadasni#22.3 Ahalma balna kulninna dadasni: sara mani kau ulna kidika kaput yulwi. Hibru kau laih yulwi ahalma balna bangkat yayakna dai kidika. kidika pa nai yakat kikirana,
kaunah laihwi silak ahana.
4Kidika bahang yulnayang: Yang kaupak naikau lawanauh,
tapalhni palni aidakih yawi;
walakiānin bik kukulwinih
yang tawanki daukalna kidika yulni.
5Kat Dawan parasni nuhni duwa kidika
yaklauwi lā āna bahang yamadangni mani as kainin kidika,
daukalna atnin, dawak sinsni diswak pini di amanglawas atnin,
sau langni kau di niningkana kidika tanka.
Daklana balna dai kidika mahka babahwi;
sararahwa kidika asangpas yakat lāih ki.
6Elam muihni balna kidika sīninabang ridi kakalna,
dawak uman kārnina balna dawak aninaras balna yakat kikilna;
kaput bik laih Kir muihni balna bik nanitna daknin dini kidika yayakna.
7Sauma langni yaksinh dai kidika kār manah banghna,
dawak aras kau kilwa muihni balna kidika uman tawan nuhni dūrni yakat uiwi kāwi kalbabauwi.
8Judá tanit daknin dai kidika ruhmwi dadana.
Kidika mani, king uni, Asangpas Uni#1 Re 7:2. kau kalbaunin dini pupuwa pāni yakat talnamana, 9Devid tawanni nuhni#2 Sam 5:7. yakat sahna sulihni balna manas talnamana, was pāni binibin#2 Re 20:20. kidika banghna dai; 10Jerusalén uni balna kidika yamni laihwi tatalna, dawak buas laih isihwi daklana balna kidika baisa yamni yayamna. 11Daklana balna bu kidika walsah yakat was laihnin dini as yayamna, was laihwa pāni umani wasni kidika pāni wisam yakat lana atnin. Kaunah witingna yamni tatalwas dai, tatuna yamna kidika amput yamna dai kidika, yuldarangkat sara mani kau yamna dai kidika.
12Kidika mani Dawan parasni nuhni duwa kidika
yaklauwi manna yakat manayulna dai yawa aidana atnamna,
basmana kahrnin yulni
kaput bik asmanana utuhni kidika āwanamna yulni dalani wauhtamana kidika sainni.
13Kaunah yayamwa kidika laih alasna dunin,
turuh dawak sīp īnin,
dimuihni kaswi wain dinin.
Dawak yuyulwi: “Kasdanahng dawak didanahng,
kat yahan daudarang bahang.”#1 Kor 15:32.
14Dawan parasni nuhni duwa kidika yaklauwi yang akat kaiwi
tapaki yakat lakpakwi yayulna:
“Adika dutni yayamna kidika dating diswas karang;
kidika tanitkauh manna dautanama.”
Kidika laih Dawan parasni nuhni duwa kidika yulni balna.
King uni kau tunan duwa nining yakat yulna
15Dawan parasni nuhni duwa kidika yayulna: “Yawa talah Sebna,#2 Re 18:18; Is 36:3. yakat king ūnikau tunan muihni yakat, dawak kalyulta:
16‘¿Man akat ais yamtamahn, wais yaklauwi parasni kidika manayah,
akat sau-ū as yamna atnin,
asang makau kipala yakat kuhrwi,
yak-urupdinin pāni yakat?
17Dawan yaklauwi pa naikau maruhmwak yawama,
muih al parasni nuhni duwa kat yamwa kapat.
Parasni malaihna karang,
18di tuyulni kapat mayamwak piramma,
dawak sau panuhni as kat masihna karang.
Dawak yakat dauma,
kidika yakat kārma balna bik uiwi wawatwarang, alasmana dai kidika,
dawak kaput laih man damawan uni kidika asalni kalahna karang.
19Yang lawik sakman kidika kaupak madakyakki,
dawak warkma kaupak bik namangyak ki.
20‘Kidika mani yang warauki
Hilcías walanibis Eliaquim kidika kalyulting kaiwarang;
21kalsuruhmtaman asnina yakau prakni āna awaki,
dawak man rispik biltni sittaman kidika kau sitna awaki,
dawak parasni bik kalana awaki.
Kaput laih Jerusalén muihni balna dawakat,
Judá tawanni balna yakat bik papangnina as kapat karang.
22Witing salahni yakat āna awaki,
Devid uni kiniting kidika;
muih as bik putnin sip-awas karang witing apahwarang kidika,
dawak bik apahnin sip-awas karang witing putwarang kat.#Rib 3:7.
23Witing kidika laih rispik yalahnin pāni as kapat karang
papangni wanaihni balna yakat.
Yang lawik yamting kat pāni yakat parasni atakna sakkarang,
sihm silak as kapat.
24Kidika yakat sip karang di minit nuhni balna kidika alahna atnin
witing papangni wanaihni balna dinina,
dawak kaput bik sulani balna bitik kaiwarang yakat,
di bikisni kaupak wain dinin sunitak balna kat.
25‘Kidika mani,
silak as pāni yakat yamni pana sakdai kidika kaupak is yaklawarang;
dutyakpamwak bukwarang,
kidika yakat di mahni alahna bangdai kidika bukwi babahwarang.’ ”
Dawan parasni nuhni duwa kidika yaklauwi kaput yulwi.
Currently Selected:
Isaías 22: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
