Isaías 21
21
Prapit yulni balna yulna Babilonia bukwarang yulni
1Prapit yulni yulna kauhmak wanilang#21.1 Kauhmak wanilang: barangni yulnin kat kauhmak wanilang kumani. Kuma tanka kidika laih warmani balna akat Golfo Pérsico. yulni:
Wingnuh as wadah niningkaupak kaiwa kapat,
kauhmak wanilang pa dutni yamadangni kaupak kaiwi.
2Papang di nikingkana kidika laih yamadangni palni ki:
malnikau iwa muihni kidika iwi,
dawak daukalyang muihni kidika daukalwi.
¡Elam lawah!
¡Medo mahka kalbaunin!
¡Yang datas awaki baisa kalusnin lani kidika!
3Yang muihki yayukwi,
buktik pihrtayang dalawakat,
kulnik kaida kidika yulni yadawak dakasyang,
muihsak yaklauwi yamwak sip talasyang.
4Kulnik kidika pāni duwaski,
yayukwi yamaduting kat.
Ma ulahwak sanni dawak yamni dakayang kidika,
niking yakat yamadangni palni as ki.
5Tibil kidika uman lakna pakki,
asna punni atakda kidika bik rina kasnin alasnina kidika uman tunan bahna.
¡Kalbauyang muihni taninatuna balna bitik kalmana kau lawanauh: tanitdaknin dini kidika yaringni yamtanauh!
6Kat Dawan yaklauwi yayulna bahang:
“Yawa makau kilwi talwa muihni kidika as āsaktah,
bahang muih balna aiwak talwarang kat isning pakna karang.
7Kār bu libitna kat aras mumurwak talwarang kat,
kidika awaskat muih balna kidika biriku kidika awaskat kiamil kau kilwi aiwak talwarang kat,
yamni talwarang.”
8Talwasak muihni#21.8 Talwasak muihni: ulna umani balna yakat kaput yulwi. Hibru kau laih yulwi layan as. kidika sarahna: “Dawan paki yakat ban sakyang mapiris kaupak masan kat, pukta balna bitik yakat ban sakyang maintala.
9Talayang kar as aras bu sitna kat murwi aiwak.”
Kaput laih muih as yulna:
“¡Ukna, bukna Babilonia!#Rib 14:8; 18:2.
Daninawan dauh balna wayanina dai kidika
bitik sau yakat bukwi bahna dai.”
10Yang tawanki plawar minik kapat atakna dai kidika,
yang mayultayang Dawan parasni nuhni duwa kidika kaupak dakanayang kidika,
Israel Papangni.
Prapit yulni yulna Edom nining yakat
11Prapit yulni yulna Edom#21.11 Edom: grik kau ulna kidika laih kaput yulwi. Hibru kau laih yulwi Duma. nining yakat:
Seir kaupak muih as parasni sarahwi yayulwi:
“Makau kilwi maintalyang, ¿pukta ais awarni yah?
Makau kilwi maintalyang, ¿pukta ais awarni yah?”
12Maintalyang muihni kidika nangnitlana:
“Payahlawi kaiwi,
kaunah mahka pukta bik kaiwi.
Yulta dakakihman kat yulta dakah,
kaunah watta nawatta yawanauh.”
Kauhmak wanilang yakat prapit yulni balna kidika yulna
13Kauhmak wanilang yakat prapit yulni balna yulna:
Dedán muihni balna kidika ta pasyakat aiwi watwi payayahwi
kauhmak wanilang kau damasni pakpak yakat,
14taninapas yakat alahwa was dikih diawa balna yakat
was diatanauh.
Tema sauni muihni balna,
kalahwi kīra muihni tanipas yakat alahwa
kasnin dini diatanauh.
15Ais yamta isparah niningkaupak iramanah,
isparah baini buhna kidika kaupak,
las ridi yamna kidika ruhmnin manah,
dawak kalbaunin anna kidika kaupak.
16Dawan yaklauwi yayulna:
“Kurih as laihwak,
sihm wark muihni as witing minit dunin kulwi talwa kapat,
Cedar witing nuhni kalkulna dai kidika bitik laih bayakwi kiuna karang.
17Cedar ahalni kalbauyang balna
lasnina kidika bulah wawatna karang.”
Israel Papangni Dawan kidika yaklauwi yulna.
Currently Selected:
Isaías 21: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
