Isaías 19
19
Prapit yulni balna yulna Egipto nining yakat
1Prapit yulni balna yulna Egipto nining yakat:#Jr 46:2-26; Ez 29:1—32:32.
Dawan yakat talnauh:
Egipto yakat kaiwi mukus parasni murwa yakat kilwi.
Witing muhni yakat Egipto dawan dauh balna kidika diyukwi,
dawak Egipto muihni balna kidika muihsak dadauwi.
2“Yamtingkat Egipto muihni balna kidika kalsahwi kalalahwarang —kaput yulwi—
dawak biri biri kalbabauwarang:
kaltalyang yamni bik niningkauh yaklauwarang,
tawan nunuhni kidika biri biri kalbabauwarang,
king sauni balna kidika biri biri kalbabauwarang.
3Diyamtingkat sinsnina diswarang,
diyamnin kukulwa kidika bik dutni kalna karang.
Kaput dawakat dawan dauh balna, sukyah balna yakat yulwi dakakawarang,
kaput bik dauna balna piritni yakat bik yulwi dakakawarang.
4Kaunah yang lawik Egipto yakat tunan muihni as āki kulnin parasni kat;
king dutni as witing kāna karang.”
Dawan parasni nuhni duwa kidika kaput yulwi.
5Nilo wasni kidika bik buhlakwarang,
bahang buhni manah kalna karang,
6dawak was murwa balna dai kidika wayāni purwarang.
Egipto wasni murwa kidika
bik tani tani buhlakwarang
dawak dapa balna kidika bitik kusulawarang;
7Nilo wasni kungkau junco manas kidika,
dawak di dadahna balna kidika bitik
laih kusulawarang.
8Nilo wasni kau dipapamwa muihni balna kidika bitik
laih kakaidarang;
kaput bik laih waspa dini laihnin dini waspa yakat ruhm'ahawa balna kidika laih kulninna bukwarang.
9Lino kau wark kalalahwa balna kidika bik di yamkih diawas karang;
dawak wahni ridi yamyang balna#19.9 Wahni ridi yamyang balna: kaput ulna kidika yamni kapat ki. Hib. kau laih ridi yamnin (linin). kaput bik asna yamyang balna kidika bitik laih pihitni ānina dis kakalwarang;
10asna yamyang balna kidika kulninna bahna karang,
kaput bik laih tingnina kau di yamyang balna kidika bik amanglalawas karang.
11¡Ais mutu manah, Zoán tunan muihni balna,
Egipto yakat kau sins duyang balna muih yakat sumamalwa dai kidika,
kaunah di rahm kidika laih witingna laih di amanglalawas mutu balna!
¿Amput witingna kulninna yakat kaiwih fero yakat kalyulna atnin:
“Yangna laih sins duyang balna sulanina yangna,
kaput bik muhnilau kau kingni balna dai kidika bik”?
12¿Fero, angkat bangyah sins duyang muihni balna dutaman kidika,
bahang witingna yaklauwi masumamalwarang dawak ismang papakwarang#19.12 Ismang papakwarang: sara mani uhulna kidika kaput kapat ki. Hibru kau laih yulwi dakakawang.
Dawan parasni nuhni duwa kidika
Egipto niningkauh wark yamnin duwa kidika?
13Zoán tunan muihni balna kidika laih mutu balna,
kaput bik Menfis tunan muihni balna kidika laih dadawak alas diyuyulna,
sau sahyakna tanituna balna kidika
yaklauwi Egipto kidika ta dutni yakat diduwi kiuna.
14Dawan yaklauwi
di amanglawas atnin piritni kidika diana;
bahang Egipto kidika ta dutni yakat duwi uiwi
di yayamwa balna bitik yakat,
sihm wasak dauna kat tiningyakwi dawak bik kalnanahwa kapat.
15Muih as bik tunan awaski, dawak mamahni sutni bik awaski,
kuku panani dawak junco panani,
bahang Egipto yulni di as bik yamnin sip-awas karang.
16Kidika mani Egipto muihni balna kidika yayal kapat kakalwarang; yamaduduwarang Dawan parasni nuhni duwa kidika witing tingni dulauwak witingna minitna yakat. 17Egipto muihni balna kidika muihsak dadauwarang Judá niningyakat; ayangni kidika manah dakawi yamaduduwarang Dawan warkni balna yamnin duwa kidika Egipto nining yakat. 18Kidika mani egipto yakat tawan nunuhni singka bangkarang, bahang kidika muihni balna laih hibru yulni yuyulwarang dawak papang ayangni kau yakwi yuyulwarang Dawan parasni nuhni duwa yakat barangni atnin. Kidika tawanni nuhni as laih ayangni pakwarang Ma#19.18 Ma: sara kau ulna balna yakat kaput kapat ki. Hibru kau laih daukalyang, hibru kau laih adika yulni bupak sihm kapapatki. Tawanni Nuhni.
19Kidika mani Egipto yakat walapni busnin pāni as pakkarang Dawan ayangni kau, kaput bik laih sauni kiwi watwa yakat Dawan ayangni kau kipala uduhwi dulalauna karang. 20Kidika laih sainni as karang Dawan parasni nuhni duwa kidika isningnakatwa atnin Egipto sauni yakat. Mampat mani Dawan yakat sararahwarang kat muih as yaklauwi ditaihwak, witing yaklauwi laihwi yaknin alni as sihwarang, nanitna dakna atnin kaput bik dilaihwi yakna atnin. 21Dawan yaklauwi Egipto balna kidika yakat amangnilalana karang, dawak biriwi bik amangnilalana karang witing yakat, Dawan yakat prinias yayamna karang kaput bik minitdis dini duaiwi kalalana karang, sakripais bik bubusna karang. Dawan yakat pramis yayamwarang dawak, praninamis kat yayamna karang. 22Dawang yaklauwi Egipto yakat dalani kalawarang, kaunah usnit kat watwi laihwi yamni kalyamna karang. Dawak witingna kidika Dawan yakat nawatwi uiwarang, dawak witing yaklauwi miniknakun ditalwi yamni diyamwarang.
23Kidika mani ta nuhni lāih as sakkarang ki Egipto kaupak Asiria kat. Asiria muihni balna kidika Egipto yakat uinin sip karang ki, dawak Egipto muihni balna kidika Asiria yakat biriwi kiunin sip karang ki, kaput laih Egipto muihni balna dawak asirio muihni balna karak kalpakwi Dawan ayangni nuhni yayamna karang.
24Kidika mani Israel kidika Egipto dawak Asiria karak kapapat karang, kaput laih Papang blisinni as karang sau akat.#Gn 12:3. 25Dawan parasni nuhni duwa kidika yaklauwi blis yamwi aput yulwarang: “Yang blis yamtayang tawanki Egipto dawak Asiria karak yang tingki kau laihtik yamnayang kidika, kaput bik laih Israel laih yang diki palni ki.”
Currently Selected:
Isaías 19: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
