Isaías 14
14
Muih panina kaupak nawatwi aina
1Dawan kidika Jacob yak dalani talwarang kat. Watwi Israel kidika witing dini kapat yakwi duna karang, dawak yamwak Israel balna kidika watwi saunina duduna karang. Pa ūk muihni balna kidika yaihnitna yakat uiwarang, Jacob tawanni yakat aslah kalbahahana karang. 2Sau ūk muihni balna kidika manas Israel balna yakat minikna dawi uinakarang saunina kat, Israel balna yaklauwi warau kapat laihwi duduna karang Dawan sauni pasyakat. Israel balna yaklauwi biriwi silak ahana karang tanit mani kau witingna yakat silak ahana dai kidika, dawak kidika balna minitna yak karang muhnilau kau ditataihna balna dai kidika.
Babilonia kingni yak sarahni tatalna
3Israel tawanni, man dalani wauhtaman kaupak Dawan yaklauwi wingmata puhnin mawarang kat, warau lani yakat maahana dai kidika kaupak, 4adika yulni damni yulna man karang Babilonia kingni yakat sarahni tala:
“¡Talnauh king dutni dai kidika angkat kaiwi yaklauna yah!
¡Talnauh kulnin parasni dutni dai kidika#14.4 Kulnin parasni dutni dai kidika: satuk wirlanin sipki: witing parasni: sara mani balna uhulna balna yakat kaput yulwi. Hibru yaklauwi arameo kaupak duna kidika laih aput yulwi, gol manah kalanin yulwa kidika. angkat sakyah!
5Muih dutni parasni dai kidika Dawan yaklauwi dakna,
kaput bik king dutni panani dai kidika bik bahna
6kulnin dutni kau muih balna yak wah diawa dai kidika
laihwatwas wiswa dai kidika,
anwi muih balna yak taihwa dai kidika,
kaput bik minikun talwas uiwi kiwa dai kidika.
7Sau bitik yak kulnin lani aslah ki dawak isningnalak ki,
dawak bik alasna duwi sararahwi.
8Awas balna dawak Líbano suhunni balna bik
alasna duduwi daukalna kidika yulni bahang aput yuyulwi:
‘Man bukna man kaupak,
muih as bik kidika yulni yana yuyulwas ki.’
9Sau kau, muih dadauna balna pasyakaupak
kalahwi uiwi man karak kalpapakwi.
Muih dauna balna wayani kidika sahmumuhwi,
sau tunan muihni balna bitik kalahwi uiwi man karak kalpapakwi;
sau kingni balna bitik yalalahwa pāni kaupak yaklalauwi.
10Witingna bitik laih yuyulwi:
‘Man bik parasma disna man,
yangna kapat alahwana man.
11Man manah kapat kaldakana man dai kidika akat
kaiwi watna unbautaman balna dai kidika.
Alangwaman pāni kidika wayāni ki,
babil balna kau dangmat ritaman.’
12“¡Amput bukna manh makau kisang#Rib 8:10; 9:1. kaupak,
payahlawa yaringni man kidika!
Sau yak matuklakna,
man muih balna yakat minitna bayakta man dai kaunah.
13Man kulnam pasyak kultaman dai:
‘Makau kisang kat ilwik yawaki;
yang tronki āki
Papang yalani balna minit yakat;
wadah nining kau naikau yakat yawik yalahki,
asang as dawan balna kalududuhwa pāni yakat.
14Mukus minit yakat ilwa ki tanit makau yakat;
Papang kapat awaki.’
15¡Kaunah di rahm kidika laih dadauna pāni dinit yakat āwa yawanaman,
kudungni tanit tuhni yakat!#Mt 11:23; Lc 10:15.
16Ma tatalwa muihni balna kidika watwi matalwa babangki,
man yak matalwi yuyulwi:
‘¿Adika alni yah yamwak sau kalyukwadai kidika,
muih balna yakat iwadai kidika,
17sau adika bitik kauhmak wanilang yamna dai kidika,
tawan nunuhni balna bitik daukalwa dai kidika
dawak silak muihni balna laih yakwas dai kidika?’
18Sau kingni balna bitik risninapik kau wingninata pupuhwi
witingna saunina ū yakat;
19man yakat laih sau ū kaupak naikau maruruhmna
sihm bubuh#14.19 Bubuh: kaput ulna kidika yamni kapat ki. Hibru kau laih yulwi udungwi kalahwi. kapat,
muih dauna kat kal kau atatakwa kapat,
muih ihina, dininamak dadakna balna kidika bik
pa wakarhni kipala manah pasyak ruruhmna kapat.
20King ūk balna nununa kapat manunuwas karang,
kat man sauma kidika daukalpamna man bahang,
kaput bik tawanma muihni balna ina man bang.
muih dutni sulani balna kidika
nai ban kaput-awas karangki.
21Ridi alahwa walaninabis balna kidika itah
witingna papangnina balna dai kidika muih yakat ihina dai bahang,
kaput laih witingna baisa kukulwas karang sau adika laihwi dunin
dawakat tawan nunuhni manah yamnin.”
22Dawan parasni nuhni duwa kidika yulwi:
“Witingna niningna yakat lawaki,
Babilonia ayangni kidika dispamki
muihni balna buas wawatna kidika
manina balna dawak buhnina balna bik.
23Suamp manah diyamki panina kidika,
dawak kuah kasnin manah ukusna karang.
Daukalnin unibitna kau bitna awaki.”
Dawan parasni nuhni duwa kidika kaput yulwi.
Asiria kidika daukalpamna karang
24Dawan parasni nuhni duwa kidika, witing ayangni kau yakwi yulna:
“Rahm palni laih, yang yamnik kulnayang kidika laih, kaput yamna karang;
yang barangni yamnayang kidika yakat kalahna karang.
25Asirio#Is 10:5-34; Nah 1:1—3:19; Sof 2:13-15. tawanni balna kidika daukalmukki yang sauki paskau bangkidika,
yang asangkipas yakat īki.
Witing tawanki yakat taihwa kidika dana karang,
muih taihwa kidika baisa salahni yakat duwas karang.
26Kaput yamnik kulnayang, sau bitik yakat.
Yang tingki kidika sau muihni balna bitik niningna yakat yaklauwi.”
27Dawan parasni nuhni duwa kidika kaput yamnin kulna,
muih as bik yaklauwi yamnin-awas kaltas karang.
Witing tingni kidika niningna kauh yaklauwi,
muih as bik yaklauwi yamwakat satuk yamwas karang.
Prapit yulni balna kidika filisteo balna niningna yakat yulna
28King Acaz#2 Re 16:20; 2 Cr 28:27. dauna kurihni yakat, Isaías adika yulni balna yulna:
29Alalaswinih, filistea#Jr 47:1-7; Ez 25:15-17; Jl 3:4-8; Am 1:6-8; Sof 2:4-7; Zac 9:5-7. muihni balna,
mawiwiswādai kidika panani bahna yulni,
kat bil as kalahna pāni kaupak bil ūk kalahwarang ki,
baisa kaput bik waula lawani duwa kidika kalahwarang.
30Muih miniknakunni balna kidika yang sauki yakat tuninaruh kasnin sihr sihr yayakwarang,#14.30 Muih miniknakunni...yayakwarang: sara mani ulna balna yakat kaput yulwi, dawak Hibru kau barangni yulna kidika miniknakunni balna walaninabis tatuna balna kidika maintatalna karang.
muih di dis balna kidika isningnalak wingninata pupuhwarang.
Yang lawik, man namang yakat laih satuk yamki, yamtingkat muihma balna kidika bitik yuh dadauwarang,
dawakat buas wawatwarang kidika laih tani imukki.
31¡Filistea tawanni nunuhni balna aidanauh,
dalawak parasni sarahtanauh, muihsak dautanang manayukwang!
Tingpal niningkaupak mahni aiwi kalbauyang muihni balna kidika sihm wayau kapat;
muih al as bik aiwa bang kidika pasyakaupak kalahwas ki.
32¿Kidika sauni kaupak muih sihwak aiwa kidika balna yakat ais as nangnitna lanin sip yah?
Dawan yaklauwi Sayan yakat parasni kalana,
witing tawanni muihni balna kulninna bukna kidika yakat kawi yakmamaldana karang.
Currently Selected:
Isaías 14: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
