Isaías 11
11
Isaí sulani yaklauwi duaiwi king lani kulnin aslah dawak la kat kidika
1Sarani kidika laih Isaí, bahang yakaupak ukuswi kalahwi;#1 Sam 16:1-20.
bahang ukuswi kalahwa kidika laih rikni kaupak kalahwi.#Rib 5:5; 22:16.
2Dawan spiritni kidika ma bitik yakat witing minit yak karang,
sinsni lani nuhni kalana karang, dawak parasni bik,
kaput bik laih di amanglana atnin dawak Dawan yamanidunin bik.
3Witing laih muih muhni yak talwi la yamwas karang,#11.3 Hibru kau ulna kidika tatuna yakat minitkau apis lakwi aput ulna: Papang yamadunin yakat alasnina duna karang.
kaput bik laih muih yuyulwa kat dakawi muih lānina yamwas karang.
4Muih miniknakunni balna yakat la kat yamna karang
kaput bik laih muih miniknakunni rahmnina diana karang adika sau akat.
Witing yulni balna kidika pan as muih kulnin dutni#11.4 Muih kulnin dutni: kaput ulna kidika yamni kapat ki. Hibru kau laih yulwi sau. yakat wiswa kapat karang,
dawakat tinipas wingnita puhwa kidika kau kalawak muih dutni kidika dauna karang.#2 Ts 2:8.
5Di rahm kidika dawak la kat kidika witing parakni duwarang ban kaput.#Ef 6:14.
6Kaput laih nawah dawak sīp karak kulnin aslah yalalahwarang,
nawah bulni dawak kuts bin karak aslah kalangwi wingninata pupuhwarang,
turuh almuk dawak layan karak bararakwarang#11.6 Bararakwarang: kaput laih yamni ulna kapat ki. Hibru kau laih yulwi turuh bin cebada bayahna. kalpakwi,
kaput laih muihbin as yaklauwi didukiwang.
7Turuh yal dawak dangkatakalbas yal karak kaltalyang yamni karang,
dawak walaninabis balna kidika aslah kalangwi wingninata pupuhwarang.
Layan kidika sihrsihr kaswarang turuh kapat.
8Muihbin kidika bil pāni sulihni yakat yakisdarang,
dawak pāni yakat tingni uhr'āwarang.
9Yang asangki maisihni dis kidika yakat
muih as bik dutni yamnin diskarang,#Is 65:25.
was kidika kuma yakat kiwi bahngwa kapat laih Dawan sinsni lani kidik,
kidika sauni yakat bahngna karang.#Hab 2:14.
10Kidika mani,
rikni kaupak ukuswi kalahna bahang kidika laih Isaí#Rom 15:12. kaupak kidika
dulauna karang sain as tawan balna bitik muhnina yakat;
sau muihni balna kidika uiwi wawalwarang,
pāni sakkarang kidika laih pa as alasna yamni manah karang.
Muih panina kau yalalahwa balna watwi nawatwi aiwarang kidika
11Kidika mani yakat, Dawan watwi parasni kidika niningnakana karang
tawanni sutni kidika bitik laih'yakwi duwi,
Asiria dawak Egipto kaupak nawatwi duaiwak,
Patros kaupak, Etiopía kaupak, Elam kaupak,
Sinar kaupak, Hamat kaupak, kaput bik laih kuma paskau pa balna kidika kaupak bik.
12Sain as dulauna karang muih balna talna atninna
dawak Israel muihni balna pa ūk kau bang bang dai kidika kaupak duaiwi uduhwak;
wing sutni arungka kaupak duaiwi uduhwarang,
Judá muihni balna rana bangdai kidika.
13Efraín tumwa kidika dahn kalna karang,
Judá bik kulnin daukalwa kidika dana karang,
Efraín yaklauwi judá yakat tumwa kidika dana karang.
14Albupak kalpakwi ma kāwa kau filisteo balna niningna yakat uina karang,
dangnit munah uiwi minit yakat bubukna karang;
kalpakwi dinina dakyayakna karang, ma kāwa muihni balna yakat.
Parasnina kidika Edom dawak Moab kat kiuna karang,
dawakat Amón muihni balna yakat ditataihna karang.
15Dawan yaklauwi Kuma Pauni munah ta as yakwi diana karang,
tingni kidika uhrwi dukiuna karang Eufrates wasni kat,
wing parasni yamadangni as kalawak wauhwi
wasni kidika tingni tiaskaubu sahwi yakna karang,
dawak kaput laih susnina kidika yakwas ban sip karang dakyaklana atnin.#Rib 16:12.
16Papang tawanni sutni kidika Asiria kaupak nawatwi kaiwarang kat,
ta nuhni as yakna karang,
sihm Israel Egipto kaupak kalahna dai kapat.#Ex 14:21-22.
Currently Selected:
Isaías 11: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
