Ezequiel 34
34
Prapit yulni balna sīp maintalyang balna niningna yakat yulna
1Papang yang akat kaiwi yayulna: 2“Man, muih al, yang ayangki kau duta yulta Israel muihni sīp maintalyang#Jr 10:21; 23:1-6. balna niningna yakat, aput diyulta: ‘Adika Papang yulwi: ¡Alakaih, Israel sīpni maintalyang balna, manna alas muihmana maintalamana! Sīp maintalyang balna warknina kidika laih sīp kidika maintalnin ki. 3Manna tāwas ditamana, dawak sīp butuni kidika kau asna yamtamana dawak sīp tanit salani balna kidika itamana, kauna sīp balna kidika maintalasmana. 4Manna sīp balna parasnina dis balna yakat ilp diatasmana, dawak siknis dilaihna balna kidika maintalasmana, dawak kalni bahna balna kidika asna kau sittasmana, dawak ta didiswa balna kidika walta duaitasmana, kauna nawatkauh laih dutni diyamtamana. 5Sīpki balna kidika maintalyang muihni dis kalna, dawakat pini ruhna,#Nm 27:17; 2 Cr 18:16; Jr 50:6-7; Zac 10:2; Mt 9:36; Mk 6:34. dawak di anyang balna kakasna. 6Asangpas bitik yakat ruhwi uina, asang malaluih balna yakat, kaput bik laih sau bitik yakat pini ta didisna, dawak muih as bik witingna yulnina kulwi kalbauwas ki kiwi walna atnin.
7‘Kaput bahang sīp maintalyang balna, yang yulki kidika yamni dakanauh. 8Yang, Papangyang kat, sangkika kau yaktik yultayang. Asangpas dini anyang satni balna kidika yaklauwi yang sīpki balna kakasna, kat maintalyang dis Zbahang. Sīp maintalyang balna dutayang kidika sīpki balna yakat uiwi wawalwaski. Sīp maintalyang balna kidika witingna alas muihnina manah maintatalwi, kauna sīpki balna yakat laih maintatalwaski. 9Kidika bahang, dakanauh sīp maintalyang balna yang yulki kidika 10yang Papangyang kat manna yakat manayultayang: sīp maintalyang balna yang manna waihmanala yang, dawak yang sīpki balna kidika manna yakat manayulki ki; dawak maintalnin dai kidika kaupak manadakyakki ki, manna alas muihmana manah maintalnin-awas yulni; sīpki balna laihtik yakki ki, manna ban kasta atnamna awas yulni.’
Sīp maintalyang yamni
11“Yang Papangyang kat yultayang: Yang silp sīpki balna kidika maintalki. 12Sīp maintalyang as#Is 40:11. witing sīpni balna kidika rani bangkat kulwi kalbauwa kapat, yang kultik kalbauna awaki sīpki balna yulnina, wattik laihtik yakna awaki kalruhna bangkidika kaupak ma as dutni puksani dai yakat. 13Muih ūk panina kaupak laihtik yakki, uduhtik, dawak duyawaki witingna panina palni yakat. Duyawing kat di kakasna karang Israel asangni yakat, wasni balna yakat dawak pa balna pakpak yakat bitik. 14Sihrsihr tanit yamni yakat duyawing kakaswarang, Israel asangni tanit maluihni kau sihrsihr kidika yakat. Kidika yakat wingninata pupuhwarang, dawak sihrsihr tanit auhni kidika kakaswarang. 15Yang alas sīpki balna kidika maintalyang alahwaki, yang lawik duyawingkat yakururupdarang.#Sal 23. Yang Papangyang kat yultayang. 16Sīp didisna balna kidika walki,#Lc 15:4-7. ta didisna balna kidika laihtik duaiki, kalnina bahna balna kidika sittik diaki, parasnina dis balna kidika ilp diaki, dawak maintalki#34.16 Maintalki: sara kau ulna yakat kaput yulwi. Hibru kau, bahtik dis yamki. salalani dawak pararasni balna kidika bik. Yang lawik amput maintalnin kaput maintalna awaki.
17“Yang, Papangyang kat yultayang: Dakanauh sīpki balna: la as yamkiki, sīp dawak kuts#Mt 25:31-34. balna karak libittik. 18¿Dibasta yamni kakaswa kamanah isningnalakwaski, kauna kakaswak sutni watwa balna kidika kalnina kau ataknin ya? Was sangni yamni kidika didiwi, dawak usnitkat kalnina kau kapahrwi buhuhutwi. 19Yang sīpki balna kidika witingna sihrsihr kasninki manna ataknamana kidika dawak was buhutnamana kidika. 20Kidika bahang yang Papangyang kat manayultayang: yang la as yamki sīp salalani dawak ararakni balna karak. 21Manna parasninadis balna yakat naikau tukta yaknamana, tammana kau panamana dawak kikirana. 22Kauna yang lawik sīpki balna kidika laihtik yakki. Datingkat baisa mamalwaskarang ki. Sīp balna pasyakat la yamki. 23Yamtingkat, diki yamyang Devid kidika watwi kaiwarang, dawak witing kidika manah sīp maintalyang āki, dawak maintalna karang. Dawak witing kidika sīp maintalyang karang.#Jn 10; Rib 7:17. 24Yang laih witing Papangni awaki, dawak diki yamyang Devid kidika tanituna karang.#Ez 37:24. Yang, Papangyang kat yultayang. 25Witingna karak pramis as yamki, kidika laih witingna sangninaka yakat yamadangni as dis atnin. Kidika sauni yakat anyang dini balna kidika diskarang, kaput laih yang sīpki balna kidika isningnalak ahni yakat bang- atnin, dawak asangpas yakat bik payahnin.
26“Yang sīpki balna kidika asangki holi yaihnit yakat dating bangkarang, dawak blisyamki; kaput bik laih waslaunin kidika blisyamtik sihki mani kat. 27Asangpas kau pan balna kidika minikyayakna karang, dawak sau bik minik balna kidika yakna karang, dawak witingna kidika isningnalak saunina yakat yalalahwarang. Yang tawanki kidika laihtik yakki kat, tataihwa balna tingnina kaupak, kaput laih amanglalawarang yang adika Papangyang. 28Tawan ūk balna kidika yaklauwi watwi laihwi duduwas karang, dawak nawah balna bik laihwi kakaswas karang. Witingna isningnalak karang, di as bik bilnina-lalauwas karang. 29Di dahna balna kidika minik dahni#34.29 Minik dahni: sara mani kau ulna kidika kaput ulna. Hibru kau laih ayangni nuhni. laihna karang, kaput laih witingna watwi yuh wawauhwas karang, dawak nisan ūk balna kidika watwi sarahni diyuyulwas karang. 30Kaput laih watwi amanglalawarang, yang Papangyang kidika witingna karakyang, dawak Israel kidika yang tawanki. Yang, Papang yang kat yultayang. 31Manna laih yang sīpki mana, sauki yakat bangmana.#34.31 Saramani kau ulna kidika laih kaput yulwi. Dawak Hibru kau laih yulwi: Muih ahal. Yang laih manna Papang-mana-yang. Yang Papangyang kat yultayang.”
Currently Selected:
Ezequiel 34: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
