Ezequiel 29
29
Prapit yulni balna Egipto niningyakat
1Kurih salap laihna kaupak waiku salap laihwak, ma salap minitkau bu laihna yakat, Papang yang akat kaiwi yayulna: 2“Man, muih al, waralaih fero yakat yawah, Egipto kingni yakat, dawak yang ayangki kau yakta witing niningyakat yulta, dawak Egipto niningyakat bik.#Is 19:1-25; Jr 46:2-26. 3kalyultah:
‘Adika Papang yulwi:
Yang man waihmala alahwayang, fero, Egipto kingni,
di dutni wayakani nuhni wasma pasyakat tusman kidika,
man yultaman: Nilo wasni kidika laih yang, yang yamnayang.#29.3 Yang yamnayang: sara mani kau ulbna kidika kaput ulna. Hibru kau laih yulwi yang kalyamna yang.
4Man nangmatak yakat di rahni duwa kidika kapat kat as āki,
dawak bik yamtingkat waspa dini balna kidika kisima yakat bibirwarang.
¡Man wasma kidika kaupak mayakki kisima kau waspa dini birna balna kidika bitik!
5Kauhmak wanilang yakat maruhmpamki,
wasmapa dini balna bitik karak libittik;
di dis ahni manah yakat bukma,
dawak muih as bik dis karang malaihwi manuna atnin.
Yamtingkat nawah anyang balna kidika makakasna karang,
dawak uhu balna bik makakasna karang.
6Egipto muihni balna bitik amanglalawarang,
yang adika laih Papangyang.
Israel muihni balna kidika man yakat ilp wawalna dai,
kauna man laih sihm suku kapatman dai:#2 Re 18:21; Is 36:6.
7tingnina kau malalaihna kat,
man bahnaman dai, dawak pirinina yakat daknaman dai;
witingna kidika man yakat madihunin yayamwakat,
man bahnaman dai, dawak yamtang kat bukna dai.#29.7 Yamtang kat buknadai: sara mani kau ulna kidika kaput ki. Hibru kau laih yamnaman ramhnina yakat atnin. Satuk bik wirlanin sipki: dawak yamtang kat kalnanahna.
8‘Kidika bahang yang Papangyang kat yultayang: Egipto, yamtingkat namangyakat isparah kau makalbabauna karang, dawak tingmalau balna dawak ahalma balna bitik laih ihina karang. 9Kauhmak wanilang kalma, dawakat muih balna kidika watwi amangkilalana karang, yang laih Papangyang. Man yulnaman: Nilo kidika laih yang diki, dawak yang yamnayang. 10Yamni ki, mayultayang yang laih man waihmala yang, dawak wasma murwatus kidika bik. Kauhmak wanilang mayamki, muihsak daunin dini dawak di balna bik diskarang, Migdol kaupak Asuán kat, dawak Etiopía sauni kiwi watwakat. 11Kidika yakat muih dawak tinglau balna bik bayayakwas karang. Kurih muihasluih bu kidika pāni yakat muih as bik yakat yalalahwas karang. 12Egipto yang mayamna awaki, sau as di dis pāni; kurih muihasluih bu tawanma nunuhni balna kidika daukakalna karang, dawak muihma balna kidika laih yaktik sau ūk nisan balna pasyakat sihki.
13‘Yang, Papangyang kat yultayang: Kurih muihasluih bu bayakwak usnitkat Egipto muihni balna kidika wattik uduhki, pa balna kau ruhwi uina kidika kaupak. 14Yamtingkat, Egipto muihni silak kau bangkidika pri kalahwi, Egipto sauni wadah niningkau yakat uiwi panina duduna karang, witingna nining panina dai yakat, bahang kidika yakat kaluduhwi king pāni as yayamwarang kauna parasni dis karangki. 15Kidika kingni lani laih dibin dauh karang ūk balna karak dawakat, dawak watwi yaklauwas karang nisan ūk balna minitna yakat. Dibin kalyamna awaki, sau ūk yakat taihnin-awas yulni; 16dawak Israel tawanni kidika watwi Egipto yakat kulnin awi duwas karang, bahang adika yaklauwi diyamwak tatalwarang, witingna mistik yayamna dai kidika Egipto yakat uiwi ilp wawalna dai kidika. Kaput laih watwi amangkilalana karang, yang adika laih Papangyang.’ ”
17Kurih muihasluih minitkau tiaskaubu laihna kaupak waiku tatuna kidika kawak, ma tatuna yakat; Papang yang yakat kiwi yayulna: 18“Babilon kingni Nebokatnesar, witing kalbauyang ahalni duwa dai kidika sihwak uina Tiro nining yakat kalbauna atnin; witingna tunanina bitik tulupna, dawak pul manah duwi salahnina kidika, kauna witing dawak kalbauyang ahalni balna bik kidika Tiro niningyakat yaklalauwa kaupak di as bik yayakwas ki. 19Kidika bahang, yang, Papangyang kat yultayang: Yamtingkat Nebokatnesar kidika Egipto yakat kawi duwarang, dawak ritsni balna duwa kidika bitik laih dakyakna karang, bahang malwa kidika kau sipkarang kalbauyang muihni balna duwa kidika minitnalauna atnin. 20Yamtingkat, Nebokatnesar witing Egipto yakat kawi duwarang, Tiro niningkauh yaklauna dai kidika minit duna atnin, kat yang warkki yamna bahang. Yang Papangyang kat yultayang.
21“Kidika mani balna yakat yamtingkat Israel parasni kidika nuhni kalna karang, dawakat man, Ezequiel, sip atnam lāih yulkalbauna atnin. Kaput laih watwi amangkilalawarang, yang adika laih Papangyang.”
Currently Selected:
Ezequiel 29: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
