Ezequiel 25
25
Amonita balna niningna yakat
1Papang yang akat kaiwi yayulna: 2“Man, muih al, nawatta yawah Amonita#Jr 49:1-6; Ez 21:28-32; Am 1:13-15; Sof 2:8-11. balna yakat, dawak yang ayangki kau duta witingna niningna yakat yulta. 3Diyultang, Papang yulni witingna yakat sihwa kidika dakakawang: ‘Manna alasna duta pāuhnamana ūki kidika yakat dutni yayamwakat, kaput bik Israel muihni balna kidika daukakalna, dawak Judá muihni balna kidika laihwi puk kau duwi uina. 4Kaput bahang, manna kidika, ma kilwa muihni balna tingnina yakat manaāki dawak witingna yaklauwi saumana kidika duduna karang dawak yakat ūnina papakna karang. Witingna kidika manna dahnamana kaupak kakaswarang dawak tāwas ditamana dai kidika manadakyayakna karang. 5Rabá pāni kidika sihrsihr manah yamki kiamil kasnin, dawak Amón kidika laih sīp balna panina kalna karang. Kaput dawak manna amanglatanama, yang adika Papangyang.
6‘Yang, Papangyang kat yultayang: Manna Amonita muihni balna, tingmana tista dawak sutnamana alasta, dawak Israel kidika di dauh talnama. 7Kaput bahang tingki dulautik wah manaki, dawak nisan balna tingnina yakat manaāki, kaput laih manna ais dutamana kidika manadakyayakna karang bitik. Tawan balna paskaupak manadaktik yakki, dawak nisan balna pasyakat distanama manayamtingkat. Kaput dawak amanglatanama yang adika Papangyang.’
Moab niningkauh
8“Yang, Papangyang kat, yultayang: Moab#Is 15:1—16:14; 25:10-12; Jr 48; Am 2:1-3; Sof 2:8-11. dawak Seir karak yuyulwi, Judá laih nisan balna ūk kapatki. 9Kaput bahang Moab pirini yakat sulihni as ahlki, dawak sutni kaupak sutni askat tawan nunuhni dis kalna karang, kidika tawanni nunuhni balna kuduh kipala dahlwa sauni balna: Bet-jesimot, Baal-meón dawak Quiriataim. 10Yamtingkat ma kilwa muihni balna yaklauwi sauma kidika duduna karang, Amonita balna yakat kalahna kidika minit yakat, kaput laih nisan balna pasyakat muih as bik isningkatwas karang Amonita balna kidika. 11Moab niningyakat la yamki, dawak kaput laih amangkilalana karang yang adika Papangyang.
Edom niningyakat
12“Yang, Papangyang kat yultayang: Edom#Is 34:5-17; 63:1-6; Jr 49:7-22; Ez 35; Am 1:11-12; Abd 1-14; Mal 1:2-5. kidika biriwi kalyamna Judá yakat, kidika kau dutni uba yamna. 13Kidika bahang, yang Papangyang kat yultayang: Yang tingki dulautik wah kalaki Edom yakat, ahalni balna dawak tinglau duwa balna kidika bitik iki. Kaput laih daukalpamki. Temán kaupak Dedán kat, muih balna kidika laih isparah kau dadauna karang. 14Edom yakat biritik kalyamki yang tawanki Israel munah; witing yaklauwi Edom yakat kalyamna karang yang kulnik daukalna lani kaput. Kaput laih amanglalana karang aispa biriwi kalyamnin adika. Yang. Papangyang kat yultayang.
Filisteo balna niningna yakat
15“Yang, Papangyang kat yultayang: Filisteo#Is 14:29-31; Jr 47:1-7; Jl 3:4-8; Am 1:6-8; Sof 2:4-7; Zac 9:5-7. balna kidika biriwi yayamna, isningna bitik di dauh kapat kulwi biriwi yayamna; witingna kidika Israel waihnila ban kaput atnin kapat witingna daukakalna. 16Kidika bahang, yang Papangyang kat yultayang: Tingki dulautik filisteo balna yakat wah diaki; cereteo balna kidika bitik imukki, dawak kumakung kau bangkidika balna yakat bik iki. 17Yang biritik diyamki yamadangni dawak dutni palni, kulnik daukalna kau wah diaki. Dawak adika yamki kat, amanglalana karang yang adika Papangyang.”
Currently Selected:
Ezequiel 25: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
