Ezequiel 22
22
Jerusalén dutni yamna balna
1Papang, yang akat kaiwi yayulna: 2“Man, muih al, tawan nuhni nining yakat lani yamma. Di dutni yamna balna bitik kidika yakta yulma, 3dawak kalyulma: ‘Papang adika yulwi: tawan nuhni man muihma balna itamana kidika dawak dawan dauh wayani yamta man kidika, ¡uman awarma kaiwi kawarang ki! 4Muih inaman kidika yulni laih man yakat bukna, dawak dawan dauh wayani yamnaman yulni laih muihma yakat dutni makana, kidika yamnaman yulni laih awarma kidika ulisna, dawak ma balna witni kidika kiwi kana. Kaput laih yamting kat tawan ūk balna kidika yulnina kau dutni mayuyulna karang, dawak nisan balna bik. 5Yaihmatkau balna dawak naikau balna bik man yakat sarahni mayuyulna karang, tawan nuhni man dawan dauh usnit uinaman yulni dawak pini wauhnaman kidika yulni. 6Yakat bangki Israel tawanni tunan muihni balna, witingna man pasmang yakat yalalahwi dawak witingna ampus dutni yamnin sip kidika yakat yayamwi. 7Man muihma balna kidika papangnina yakat dawak nanangnina yakat ayangni nuhni yayamwas ki,#Ex 20:12; Lv 19:3; Dt 5:16; 27:16. pa ūk kau aiwa balna yakat dutni diyayamwi, warau balna dawak tingmak balna dinina dakyayakwi.#Ex 22:21-22; Dt 24:17. 8Yang paki maisihni dis balna dawak yakurupdinin mani#22.8 Yakurupdinin mani: kidika laih satadi mani.,#Lv 19:30; 26:2. bik kukulwas ki, 9alas yuyulwa yulni, muihma balna kidika as as witingna pātnina, ūk balna dadauwarang kidika; asang tuna kau alasna kasnin dini yayamwa kidika dawan dauh balna kau kidika yakat uiwi, dawak di dutni yayamwi. 10As as laih papangnina yalni karak dutni yayamwi, kidika awaskat, yayal ānina kalahwa tulutulu balna yakat laihwi dutni diyayamwi. 11Uk balna laih wanaihnina yalnina balna karak dutni yayamwi, kidika awas kat walaninabis yalni karak bik dutni yayamwi, dawak papangnina walanibis yal yakat laihwi dutni di yayamna.#Lv 18:7-20. 12Man muihma balna buas laih muih iwi minit duduna ki.#Ex 23:8; Dt 16:19. Lalah diayawi muih ūk yakat usnit dawak minit kau yakwi dunin yulni,#Ex 22:25; Lv 25:36-37; Dt 23:19. wanaihni kau taihwi dini dakyakwi dawak kalbilnin nuhni bik yamwi, kaput laih yang adika dinitnakahwi. Yang, Papangyang kat yultayang.
13‘Yang uba kulnik daukalna witingna muih taihwi dinina dakyayakwa kidika yulni dawak muih ihiwa kidika yulni bik. 14Man kulwinih yang niking kauh lawama, man namang yakat lā yamtingkat. Yang, Papangyang kat yultayang, bahang kaput laih yamki ki: 15nisan balna yakat maruhmting yawama,#Lv 26:33. kaput laih maisihni dutaman kidika bitik laih ustik yakki; 16yayamtang kat dutni alahwaki#22.16 Yayamtang kat dutni alahwaki: kaput kidik yamni ulna. Hibru kau laih yulwi yang akat riskipik yatas awama. nisan balna muhnina yakat, kaunah amanglama, yang laih Papangyang.’ ”
17Papang, yang akat kaiwi yayulna: 18“Israel tawanni kidika yang niking yakat di dauhki kapat as ki, sihm ayan, bras, lalah busnin pāni yakat adi busdak yayahni watwa kapat ki. 19Kidika bahang, yang, Papangyang kat yultayang: manna bitik di yayahni dauh as kapat alahwanamana bahang, Jerusalén pasyakat manadaukalki. 20Sihm, lalah, bras, ayan, lit, kidika balna bitik libitwi busnin pāni yakat awi kuhni bibiwak buswa kapat, yang kulnik daukalna yamadangni yulni, manna bitik manalaihtik mana-uduhtik busnin pāni yakat mana-atik manabustik maisihni dis manadaki. 21Agha, yang kulnik daukalna kuhni bīki ki, dawak manna bitik mana-uduhtik tawan nuhni papus yakat manabuski. 22Sihm lalah kuh payak awi buswi maisihni dis yamwa kapat, tawan nuhni papus yakat malaktik manabuski, kaput laih manna amanglatanama, yang laih Papangyang, dawak kulnik daukalna kidika manna mamatna yakat sihting kaina.”
23Papang yang akat kaiwi yayulna: 24“Man, muih al, Israel yakat kalyulta: ‘Man laih kabamint sauni as man Papang yaklauwi wah mana kidika laih was kalawak lauwas ki,#22.24 Wah mana...lauwas ki: grik kau laih kaput ulna. Hibru kau laih yulwi maisihni dutaman kidika kaupak klin mayakwas ki. dawak bik was diski, 25kabamint sauni as, kabamintni kidika#22.25 Kabamint sauni as, kabamintni kidika: grik kau kaput yulwi. Hibru kau laih prapit balna niningkauh yaklalauwa kidika. laih layan kapat ki, bahang ihwi, dawak witing kasnin laihna kidik laih kaswi biswi; witing sauni yakat laih muih kidika laihwi kakaswi, dawak dinina balna yayamni kidika bitik mamalwi, kaput laih yayal balna kidika manas tingmak kakalwi. 26Adika sauni sumalyang balna yaklauwi yang sumaltayang kidika satuk wirlalawi, dawak yang di as maisihni dis kultayang kidi risnipik kalalawas ki, dawak witingna satuk tatalwas ki di as maisihni dis kidika dawak di as dutni kidika karak, kaput bik ūk balna yakat sumamalwas ki amanglana atnin di dutni dawak yamni karak.#Lv 10:10. Yang urupdinin mani#22.26 Urupdinin mani: kidika laih satadi mani. kukulwas ki, dawak ayangki bik nuhni yayamwas ki. 27Adika sauni tanituna balna laih nawah balna di iwi kaswi iswi biswa kapat ki, witingna laih ridi ki muih ani utuhna atnin, dawak muih iwi lalah duyang kalnin. 28Prapit balna laih di rahm kidika mamalwi, sihm tat yakat di pihni kahwa kapat; witingna miniknapa yakat di talwi yuyulwi, dawak muih balna yakat isningna papakwi kauna dauh manah kalahwi. Witingna yuyulwi yang ayangki kau yuldi atwi, kauna di rahm kidika laih yang yul as bik yultasyang. 29Muih balna kidika kulninna dutni manah dawak di malnin karak; muih minikunni yakat kaltataihwi, di dukih kalawa muihni yakat, dawak kulninna dutni bahang dutni yayamwi, dawak lā kat yayamwas ki muih pa ūk kaupak aina muihni balna yakat. 30Yang, kidika muihni balna pasyakat muih as walnayang, bahang witing kidika adik sauni ilpni yamna atnin yang muhki tani yakat, kaput laih yang daukalpamtas awaki, kauna yang muih as bik yaktasyang. 31Kidika bahang yang kulnik daukalna kidika witingna minitna yakat sihnayang, kaput laih kulnik daukalna kuhni kau bustik imuknayang, kaput witingna dutni yayamna kidika yulni. Yang, Papangyang kat yultayang.’ ”
Currently Selected:
Ezequiel 22: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
