Ezequiel 21
21
Papang isniparah
1Kaput laih Papang yang akat kaiwi yayulna: 2“Man, muih al, Jerusalén yakat nawatta yawa man yulma kidika, makat yulnin uni nining yakat yultah. Yang ayangki kau duta Israel sauni nining yakat yulta, 3dawak yultah: ‘Papang adika yulwi: yang yultayang man waihmalayang. Yang isparah yaktik īna awaki barangni muihni bik, dawak dutni muihni balna bik. 4Agha, yang iskiparah yaktik papatni bitik iki, barangni muihni dawak dutni muihni balna bik, tingpal niningkaupak dawak wadah niningyakat 5Muih bitik laih amanglalana karang, yang Papangyang adika isparah yaknayang bahang apaktas awaki pāni yakat.’
6“Dawak, man muih al, aidah tapalhni palni, ismang kidika bitik sahwi dis dana kapat; aidah tawan muihni tani yakat. 7Man aidanaman kidika muih mayulwi dakakawarang kat diyulta yul as kat kaiwi kalahnin manah kat yulni aidaman, kaput laih kidika kaiwi kalahwarang kat muih bitik laih kulninna parasni dis dawarang ki, dawak tingnina bik dulalauwas karang ki, muih as bik kulnin parasni dis dawarang ki, muih bitik laih diyukwarang kalnina, yamaduduwak. Kidika awarni kaiwi kawi, bahang mahka kalahwarang ki. Yang Papangyang kat yultayang.”
8Papang, yang akat kaiwi yayulna: 9“Man, muih al, yang ayangki kau duta yultah, yang mapaknayang yulna atnam:
‘¡Isparah, isparah!
Uman buhwi baini dana sakki.
10Buhwi baina sakki muih īna atnin yulni yamni baina alwana lapwi ruhmwa kapat kalawak kalahna datnin;#21.10 Hibru kau laih yulni balna amangladas balna kidika ulna ki.
11yamni buhwi babaina matingki yakat duna atnin.
Ismaparah kidika buhwi yamni baina sakki, muih iyang tingni yakat āna atnin.
12Dawak, man muih al, ¡sarahta kat yang tawanki kidika inin yakna bahang,
dawak Israel kingni balna bitik!
Yang tawanki karak daunin yayakna bahang,
man muihma yakat bautah dalani atnin.#21.12 Bautah dalani atnin: barangni yulnin laih barahnimak yakat baunin. Jer 31:19 yakat talah.
13Yang Papangyang kat yultayang.’#21.13 Hibru kau laih minitlakwi yulna: laihwi talna, dawak kau tanit nuhni kaldakawa laih dis karang.
14“Man, muih al, yang ayangki kau yulta isparah yakat kalatang kat wat-bu,
wat-bas praisni dutni yamnin kidika yamwang.
Kidika isniparah laih inin dini,
inin isniparah as yamadangni kidika tawan yakat inin yamwi pa bitik kau.
15Kidika yaklauwi yamwak muihsak dadauwarang mahni laih īna karang.
U balna bitik yakat inin isniparah kidika ānayang.
Kidika isniparah laih yamni palni baina alwana lapwa kapat kalawak kalahnin,
buhwi baina muih īna atnin yulni.
16¡Bainiman kat dukih yawi,#21.16 Bainiman kat dukih yawi: kaput kidik yamni ulna. Hibru kau laih amanglatayang kidikamanah ki uk diski.
tingpal niningkauh dawak wadah niningkauh bik dakna atnin, nabupak!
17Yang bik lawik pakki ki Kulnik daukalna kidika lunglakna atnin yulni.
Yang, Papangyang kat yultayang.”
18Papang, yang akat kaiwi yayulna: 19“Ta bu yamtang kat, Babilon kingni kidika isniparah duwi bayakwang. Sau as kaupak ta bu kidika kalahnin ki, ta kawa kidika bupak sainni maki, bahang kidika sainni kidika amanglawarang angdika tawanni nuhni kat kaldu'kiwarang kidika.#21.19 Ta kawa...kaldu'kiwarang kidika: kaput kidik yamni kapat ki. Hibru kau laih minit kau lakwi sainni usnitkat, dawak S.d. yulni kidika dakwi. 20King isniparah duwi bayakwi kiwarang tani kidika yaknam ki. Tawanni nunuhni balna kidika Amonita balna tawannina nuhni Rabá dawak Jerusalén Judá tawanni nuhni karak. 21Babilon kingni kidika ta bu kidika yakat kawi duna witing suerte yakat yulwi dakawi; sibang balna kidika banawi, dawan dauh balna yakat yulwi dakawi, dawak tinglau balna isning kidika bik laihwi talwi. 22Tingnipal nining kauh sibang as kalahna kidika laih Jerusalén niningyakat yuwi, kidika tanka laih mahka kalbaunin dawak bik inin kidika adar kalana atnin, wār kidika yulni parasni sarahna atnin, dūr balna yakat kalbaunin, mahka sau uhwi duwi kil'kiunin dawak bitik awaihdaknin. 23Kauna Jerusalén muihni balna laih adika yulni adik dauh kukulwi, witingna pramis yayamni kidika yulni. Kauna di as rahm kidika laih, witingna dutni yayamna kidika niningkauh yulna ki, dawak isningpakna as ki witingna kidika dilaihwi duwi kiuna atnin. 24Kaput bahang, yang, Papangyang kat yultayang: manna dutmana dawak inamana kidika lāih kalahna ki; manna yamtamana bitik yakat dutni yamnamana kidika lāih kalahna. Kidika bahang manalaihna karangki. 25Israel kingni man yakat laih, witni yakat wah dunam kidika ulisna, dutni yamyang.#Jr 21:7. 26Yang, Papangyang kat yultayang: Tamana balaktaman kidika namang-yayakna karang, king paknin paktaman kidika bik tingma kaupak dakyayakna karang, dawak di bitik kidika satuk karang. ¡Tuna yakat kilna karang sau langni kau kidika, dawak sau yakat bukna karang asang tuna kau kidika! 27Bitik laih daukaltik daki. Kauna adika kalahna karang yamwangtik paknayang muihni kidika kaiwarang mani kat, bahang lā yamnin laih witing tingni yakat ki.
Amonita balna wah duduna
28“Man, muih al, yang ayangki kau duta yulta dawak Amonita balna yakat diyulta#Jr 49:1-6; Ez 25:1-7; Am 1:3-15; Sof 2:8-11. witingna Israel kau uhuswa kidika, isparah laih uman uni kaupak muryakna, inin manah, dawak bik buhwi baini dana yaringni palni daukalnin manah. 29Manna mamaknapa kau talnamana kidika laih dauhki, dawak tamatna kau kalahwarang balna kidika bik alas manah ki. Isparah kidika muih dutni balna dininamak yakat bukna karang. Wah dunamna mani balna bik ulisna.
30“¡Isparah watta uma yakat awah! Yang maisdana awaki mayamnayang pāni yakat, sau yakat batanh danaman kidika, 31man mamat yakat kulnik daukalna kidika kalating kiwarang, kuh dahlwa yamadangni kapat; muih dudutni balna parasnina kidika maki. 32Mabuswi madaukalna karang, man āma kidika sauma bitik yakat kirana karang, dawak muih as bik man yakat isningkatwas karang. Yang Papangyang kat yultayang.”
Currently Selected:
Ezequiel 21: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
