Ezequiel 2
2
Papang yaklauwi Ezequiel yakat kalyulna witing yakat kiunin
1Usnit kat muih dinit as dakanayang bahang yayulna: “Man, muih,#2.1 Muih: Y.y. muih walanibis al. kalma kau lawah, yul mabauki ki.” 2Kidika yayulwa minitni yakat, yang muihki yakat yalaihna dai Papang parasni kidika, dawak yayamwakat kalki kau lawanayang. Kaput laih dakanayang dinit yayulwa kidika 3ban yayulwa sakdai: “Man, muih al, masihkiki Israel pasyakat, tawan as muih dutni yang niking kauh yaklauna kidika. Witingna dawak muihnina bararak balna kau bik, dawak warmani kat bik. 4Walaninabis balna bik dudutni ki, tunanina dadasni. Bahang kidika balna yakat masihki ki di yulna atnam aput: ‘Adika Papang yulwi.’ 5Yulna dakakawarang pa, kidika awaskat dakakawas karang pa, kat muih dudutni balna ki, witingna amanglalawarang ki witingna pasyakat prapit as likkidika. 6Man, muih al, witingna yakat yamanina duwinih, dawak ais mayuyulwarang kidika bik kulwinih, man muihma kidika wakal manah ma-awaihdak kapat kaldakama, kidika awaskat wakurus pasyakat sakman kapat kaldakama bik. Yamaduwinih mayuyulwarang kidika bik, dawak witingna muhnina ampat yayamwarang bik, dawak muih tanit dudutni karang bik. 7Man, yang yulki balna kidika diyultah, dakakawarang kidika awaskat dakakawas karang bik, kat uba muih dudutni bahang. 8Yang mayultayang kidika yamni dakah, man bik muih dutni atnah witingna kapat. Tamapas wakahta, dawak di maki kidika kastah.”
9Kaput laih ting as yang nikingyak yuwakat talnayang, kidika laih wauhtaya ulwi tulna as duaina dai. 10Tingni kau laihwi kurna tulna dai kidika. Muhni nabupak laih ulna dai#Zac 5:1-4; Rib 5:1. bahang kidika laih kaidinin dini, dawak dalani wauhnin dini, kaput bik laih maniking kau dutni maiyamnin dini kidika ulna dai.
Currently Selected:
Ezequiel 2: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
