Ezequiel 3
3
1Kaput laih yayulna: “Man, muih al, ulna adika kasta, usnit kat Israel ninisan yakat yawa yuldibautah.”
2Tikpas apahnayang, dawak witing yaklauwi yayamwak ulna balna dai kidika kasnayang. 3Usnit kat yayulna: “Dalpamtah adika ulna matayang adika, dawak bama mabangwas.”#Jr 15:16; Rib 10:9-11.
Yang kaldakanayang tikpas kidika damni kalna dai amak kapat. 4Kaput dawak yayulna: “Yawa Israel tawanni yakat kalyulta, yang kalyulnik dini dutayang kidika. 5Yang masihtasyang tawan as tuni aslah dadasni duwa kapat amanglanin, kauna masihtayang Israel tawanni yakat. 6Nisan balna muih mahni yakat masihtasyang, tuni dadasni yulwa kapat yakat, man amanglatas atnam. Kauna kidika tawanni kapat kat masihtasyang kat, witingna yulma dakakawarang ki. 7Nawatni kauh laih Israel tawanni laih yulma dakakawas karang ki, kat yang akat yulki dakanin kulwas bahang. Israel tawanni bitik laih dudutni, dawak tunanina dadasni ki. 8Kaunah yang lawik tunama dadasni mayamki sihm witingna kapat. 9Yang lawik dadasni mayamki kipala dahlwa kapat, dawak kipala kapat tanit dadasni mayamki. Yamaduwinih, dawak muihsak bik dauwinih muhnina dutni yayamwarang karang ki, tanit dudutni kalalahwarang bik.”
10Usnit kat yayulna: “Yamni dakah yang di balna bitik mayulki kidika, dawak kulnam yakat laihta dutah. 11Man pama muihni balna aslah man laihwi duwi aina balna bang yakat yawa talah, man yulma dakakawarang, dawak dakakawas karang bik, diyultah: ‘Adika Papang yulwi.’ ”
12Kaput laih Papang parasni kidika kau yadulauna, dawak yang dangkit yakat di parasni as dakanayang, sau isihwa kapat, Papang alasnina yaksihni kidika pāni kaupak dulauwak.#3.12 Dulauwak: kaput ulna kidika yamni kapat ki. Hibru kau laih, blisin. 13Di parasni yulna kidika laih, sangnika duwa balna lawanina biri biri bahlwi wiwiswak yulna dai, dawak wīlni balna witingna karak balna dai kidika bik; parasni yulna kidika laih sau isihwa kapat yulna dai. 14Papang parasni kidika yaklauwi yadulauna dai kidika pāni kaupak, dawak yang yawanayang dai kulnik bukwak dawak tapahlni karak bik, kidik ninitni yakat Papang tingni kau parasni yalaihwadai. 15Yawik āwanayang Tel-Abib kat, Quebar wasni kung yakat, kidika yakat Israel balna kidika laihwi duahaina bang dai, dawak ma tiaskaubu witingna karak sakyang dai, yang amanglatasyang dai ais yamnin dawak ais yulnin bik.
Papang yaklauwi Ezequiel kidika makau kilwi talwa muihni kapat as ana dai
(Ez 33:1-9)
16Ma tiaskaubu kidika laihwak, Papang yang yakat kiwi yayulna: 17“Man yakat, muih al, ma kau kilwi maintalwa muihni kapat as mahanayang#Is 21:6,11; Jr 6:17; Os 9:8. Israel dini. Yang yul as man yakat maki kidika, man lawa dianam ki yang kaupak kiwi kidika, kaput laih witingna amanglana bang atnin. 18Sip ki yang lawik lā parasni as yamna atnik muih dutni niningkauh, īna atnin; man kidika muihni dutni yakat kalyultas man kat, witing lani dutni kidika dawi sangka atnin, witing dutni yamna yakarak dauwarang, kauna yang lawik dauna kidika yulni man yakat malaihki. 19Kauna man muih dutni yakat kalyultang dutni yamwa kidika dawas karangkat, witing alas dutni yamna kidika yulni dauwarang, kauna man sangmaka laih laihta yakma. 20Sip ki aput as bik kalahnin, muih as barangni likki dawak kidika kaupak dawi dutni yamnin, dawak yang yamadangni as āki kidika yakat bukna atnin, kauna man lawa kalyultas awama kat dauwarang. Yang lawik di yamni balna yamna kidika talas awaki, dawak dutni yamna kidika yulni dauwarang, kauna dauna kidika yulni laih man yakat malaihki. 21Man lawa kalyulma kidika muihni yakat baisa dutni yamnin-awas, bahang kaput laih dutni yamwas dawarang, kaput laih ban sangka karang, kat man yulnaman yakat dakana bahang, dawak kaput laih man sangmaka laihta yakma.”
Ezequiel tubi kalna
22Kidika yakat Papang yaklauwi tingni kidika yang mikityak yuna, dawi yayulna: “Lauwa walang yakat alahwa yawah, bahang yakat yulmabauki ki.” 23Yang lawik walang yakat alahwik yawanayang, dawak yakat Papang alasnina yaksihni kidika talnayang, Quebar wasnikung yakat talnayang dai kapat. Limbabahtik saukat buknayang, 24kauna Papang parasni kidika yang akat yalaihna, dawak kalki kau lawanayang. Kaput laih Papang aput yulbauna: “Man yawa uma pasyakat awa putsakda sak-awah. 25Talah, wahkau masisitwarang ki, sip alahwas awamaki, tawan karak aslah atnam. 26Baisa minit yakat yang lawik yamting kat tuma kidika birwarang ki dawak yulbautas awama. Bilnam sip-awas awama, tawan as dutni karang bik. 27Kaunah, yang man yakat yul as mayulkih yawarang kat, wattik matingkat yulbauma, kaput laih witingna yakat diyulma: ‘Adika Papang yulwi.’ Dakakih kidika dakawarang, kauna dakakih kalawas kidika dakawas karang. Kat tawan as dutni bahang.
Currently Selected:
Ezequiel 3: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
